ജോവാൻ മധുമല
മധ്യപ്രദേശിലെ ദമ്പതികൾ തങ്ങളുടെ പൂന്തോട്ടത്തിലെ രണ്ടു മാവും അതിലെ മാങ്ങകളും സംരക്ഷിക്കാൻ നാലു കാവൽക്കാരെയും ആറു നായ്ക്കളെയും ചുമതലപ്പെടുത്തിയിരുന്നു. വീട്ടുമുറ്റത്തെ ഒരു മാവും അതിലെ മാങ്ങകളും സംരക്ഷിക്കാൻ എന്തിനാണ് ഇതൊക്കെ യെന്നു ചിന്തിച്ചേക്കാം. അത്ഭുതപ്പെടേണ്ട. ദമ്പതികളുടെ പൂന്തോട്ടത്തിലുണ്ടായിരിക്കുന്നത് ലോകത്തിലെ ഏറ്റവും വിലപിടിപ്പുള്ള മാങ്ങകളാണ്.
ലോകത്തിലെ ഏറ്റവും വില കൂടിയ ജപ്പാനിലെ മിയാസക്കി മാങ്ങകൾക്കും മാവിനുമാണ് ഇത്ര കണ്ടു സുരക്ഷ ഏർപ്പെടുത്തിയിരിക്കുന്നത്. ഉയർന്നതോതിൽ ബീറ്റാ കരോട്ടിൻ, ഫോളിക് ആസിഡ്, ആൻറി ഓക്സിഡൻറുകൾ തുടങ്ങിയവ അടങ്ങിയിരിക്കുന്ന മാമ്പഴമാണ് മിയാസക്കി. കാഴ്ചശക്തി വർധിപ്പിക്കാൻ ഉത്തമമാണെന്നാണ് നിഗമനം. ജപ്പാനിലെ മിയാസക്കി നഗരത്തിലാണ് ആദ്യം ഈ മാങ്ങകളുണ്ടായത്.
അതിനാലാണ് മിയാസക്കി എന്ന് മാമ്പഴത്തിന് പേരുവന്നത്. ഇന്ത്യയിൽ അപൂർവമായി മാത്രം ലഭ്യമാകുന്ന മിയാസക്കി മാങ്ങകൾക്ക് ലക്ഷങ്ങൾ ആണ് വില. ജബൽപുർ സ്വദേശിയായ സങ്കൽപ്പ് പരിഹാസിന് ചെന്നൈയിലെ ഒരു ട്രെയിൻ യാത്രക്കിടെ ഒരാൾ നൽകിയതാണ് മിയാസക്കി മാവിന്റെ തൈകൾ. സങ്കല്പ്പും ഭാര്യ റാണിയും വീട്ടുമുറ്റത്തെ പൂന്തോട്ടത്തിൽ ആണ് മാവിൻ തൈകൾ നട്ട് സംരക്ഷിച്ചു വരുന്നത്. നട്ടു വളർത്തുമ്പോൾ സാധാരണ മാങ്ങകളാണെന്നായിരുന്നു അവർ ചിന്തിച്ചിരുന്നത്.
മരം വളർന്നതോടെ സാധാരണ മാവ് പോലെ ആയിരുന്നില്ല. അതിലുണ്ടായ മാങ്ങകളാകട്ടെ പല പ്രത്യേകതകൾ നിറഞ്ഞതും ആയിരുന്നു. ഇതോടെ ദമ്പതികൾ ഈ മാങ്ങയെക്കുറിച്ച് ഗവേഷണം തന്നെ നടത്തി. ഗവേഷണത്തിൽ അവർക്ക് ലഭിക്കുന്നത് മധുരമുള്ള സമ്മാനമായിരുന്നു. ലോകത്തിലെ തന്നെ ഏറ്റവും വിലകൂടിയ മാങ്ങകളിലൊന്നാണ് മിയാസക്കി മാങ്ങകൾ. അന്താരാഷ്ട്ര വിപണിയിലാണ് ഈ മാങ്ങകൾക്ക് ആവശ്യക്കാരേറെ ഉള്ളത്. പോയ വർഷം അന്താരാഷ്ട്ര വിപണിയിൽ 2.70 ലക്ഷം രൂപക്കാണ് ഇവർ മാങ്ങകൾ വിൽപ്പന നടത്തിയത്.
മാങ്ങയിൽ ഒളിഞ്ഞിരിക്കുന്ന രഹസ്യം പുറത്തായതോടെ പോയ വർഷം നിരവധി മാങ്ങകൾ മോഷണം പോയി. അത്യപൂർവമായ മാങ്ങയാണെന്ന വിവരം പ്രദേശത്ത് പരന്നതോടെയാ യിരുന്നു മോഷ്ട്ടാക്കൾ മാങ്ങകൾ കവർച്ച നടത്തുന്നത്. മാങ്ങ മോഷണം പോകുന്നത് പതിവായതോടെ മാങ്ങകളുടെ സംരക്ഷണത്തിനായി നാലു കാവൽക്കാരെയും ആറു നായ്ക്കളെയും ദമ്പതികൾ നിയോഗിക്കുകയായിരുന്നു. ഇത്തവണ സീസണിൽ മാവുകൾ പൂവിട്ടു തുടങ്ങിയപ്പോൾ തന്നെ ദമ്പതികൾക്ക് മാങ്ങകൾക്ക് ഓർഡറുകൾ കിട്ടി. ഗുജറാത്ത് ആസ്ഥാനമായ ബിസനിസുകാരൻ ഒരു മാങ്ങക്ക് 21,000 രൂപ വീതം നൽകാമെന്ന് ദമ്പതികൾക്ക് വാഗ്ദാനം ചെയ്തതായി ‘ദ മിൻറ്’ റിപ്പോർട്ട് ചെയ്തിരിക്കുന്നു.