ഭൂവനേശ്വർ: ഗർഭസ്ഥ ശിശുക്കളെ ലിംഗനിർണയം നടത്തി കൊന്നൊടുക്കുന്ന സംഘം ഒഡീഷയിൽ പിടിയിൽ. 13 പേരെയാണ് പോലീസ് അറസ്റ്റ് ചെയ്തത്. അൾട്രാസൗണ്ട് സ്കാനിങ്ങിലൂടെ ലിംഗ നിർണയം നടത്തിയ ശേഷം കുട്ടി പെണ്ണാണെങ്കിൽ ഗർഭഛിദ്രം നടത്തുന്നതായിരുന്നു സംഘത്തിന്റെ രീതി. രഹസ്യ വിവരത്തിന്റെ അടിസ്ഥാനത്തിൽ പോലീസ് എത്തുമ്പോൾ ലാബിൽ 11 സ്ത്രീകൾ പരിശോധനയ്ക്ക് എത്തിയിരുന്നു. ഒഡീഷയിലെ ബെ‍ർഹാംപൂരിലാണ് സംഭവം.സ്വകാര്യ ക്ലിനിക്ക് നടത്തുകയായിരുന്ന ദു‍ർഗാപ്രസാദ് നായിക്കും സംഘവുമാണ് പിടിയിലായത്. ആശാ വ‍ർക്കർമാരുടെ സഹായത്തോടെയും മറ്റ് ആശുപത്രികളിലെ ജീവനക്കാരുടെ സഹായത്തോടെയുമാണ് ഗർഭിണികളെ ക്ലിനിക്കിൽ എത്തിച്ചിരുന്നത്. സംഭവത്തിൽ ആശാവർക്കർമാരും അറസ്റ്റിലായിട്ടുണ്ട്. ഗർഭിണികളെ ക്ലിനിക്കിൽ എത്തിക്കുന്നവർക്ക് കമ്മീഷൻ നൽകിയിരുന്നതായാണ് അന്വേഷണ സംഘത്തിന്റെ കണ്ടെത്തൽ.ദു‍ഗാപ്രസാദിന്റെ വീടിനോടു ചേ‍ർന്ന കെട്ടിടത്തിലാണ് ക്ലിനിക്ക് നടത്തിയിരുന്നത്. അൾട്രാസൗണ്ട് സ്കാനിങ്ങിലൂടെ ഗർഭസ്ഥ ശിശുവിന്റെ ലിംഗം തിരിച്ചറിഞ്ഞ ശേഷം ഗർഭഛിദ്രം നടത്തുന്നതായിരുന്നു സംഘത്തിന്റെ രീതി. ഗർഭഛിദ്രത്തിലൂടെ കുട്ടിയെ കൊലപ്പെടുത്താനുള്ള സൗകര്യം ക്ലിനിക്കിൽ ഉണ്ടായിരുന്നു. 11 അൾട്രാസൗണ്ട് സ്കാനിങ് മെഷീനുകളും പണവും മൊബൈൽ ഫോണുകളും അന്വേഷണ സംഘം പിടിച്ചെടുത്തു.ക്ലിനിക്കുമായി ബന്ധപ്പെട്ട് വലിയൊരു റാക്കറ്റ് പ്രവ‍ർത്തിക്കുന്നുണ്ടെന്നാണ് പോലീസ് സംശയിക്കുന്നത്. ആശാ വർക്കർമാർ ഉൾപ്പെടെ സംഘത്തിൽ ഉൾപ്പെടുന്നു. ആശാ വർക്കർമാരും നഗരത്തിലെ ആശുപത്രികളുമായി ബന്ധപ്പെട്ട് പ്രവ‍ർത്തിക്കുന്നവരുമാണ് ഗർ‍ഭിണികളുടെ വിവരങ്ങൾ ക്ലിനിക്കുമായി ബന്ധപ്പെട്ടവർക്ക് കൈമാറിയിരുന്നത്. തുടർന്ന് ക്ലിനിക്കുമായി ബന്ധപ്പെട്ടവർ ഗർഭിണിയേയും ഭർത്താവിനേയും ബന്ധപ്പെടുകയും ലിംഗനിർണയത്തിനുള്ള അവസരം ഒരുക്കി നൽകുകയും ചെയ്യും. ആശാ വർക്കർമാർ ഉൾപ്പെടെയുള്ളവർക്ക് കമ്മീഷൻ ലഭിച്ചിരുന്നതായാണ് പോലീസ് പറയുന്നത്.