കാഠ്മണ്ഡു: നേപ്പാളിൽ 22 യാത്രക്കാരുമായി പറന്ന ചെറുവിമാനം കാണാതെയായി. പ്രൈവറ്റ് എയർലൈനിന്‍റെ വിമാനമാണ് കാണാതെയായതെന്ന് സർക്കാർ വൃത്തങ്ങളെ ഉദ്ധരിച്ച് റോയ്ട്ടേഴ്സ് റിപ്പോർട്ട് ചെയ്തു. 22 യാത്രികരാണ് വിമാനത്തിലുണ്ടായിരുന്നത്. ഇവരിൽ നാല് പേർ ഇന്ത്യക്കാരാണെന്നാണ് റിപ്പോർട്ടുകൾ. ടൂറിസ്റ്റ് നഗരമായ പൊഖാറയിൽ നിന്ന് പടിഞ്ഞാറൻ നേപ്പാളിലെ ജോംസോമിലേക്ക് പറക്കുകയായിരുന്നു ചെറുവിമാനം. വിമാനവുമായുള്ള ബന്ധം നഷ്ടപ്പെട്ടതായി ജില്ലാ അധികൃതരും പ്രതികരിച്ചു. താരാ എയർലൈൻസിന്‍റെ വിമാനമാണ് കാണാതെയായിരിക്കുന്നത്. നാല് ഇന്ത്യക്കാർക്ക് പുറമെ, മൂന്ന് ജപ്പാൻ സ്വദേശികളും വിമാനത്തിൽ ഉണ്ടായിരുന്നു എന്നാണ് ലഭിക്കുന്ന വിവരം. കൂടുതൽ വിശദാംശങ്ങൾ ലഭ്യമാകുന്നതേയുള്ളൂ. കാണാതായ വിമാനത്തിനായുള്ള തെരച്ചിലിന് രണ്ട് സ്വകാര്യ ഹെലികോപ്റ്ററുകൾ ആഭ്യന്തര മന്ത്രാലയം വിന്യസിച്ചിട്ടുണ്ട്. നേപ്പാൾ ആർമി ഹെലികോപ്റ്ററും തെരച്ചിലിന് രംഗത്തിറങ്ങുമെന്ന് അധികൃതർ അറിയിച്ചു.