ഇരിങ്ങാലക്കുട : കനത്തമഴയിൽ കാറളത്തും പൂമംഗലത്തും കിണർ ഇടിഞ്ഞുതാഴ്ന്നു. കാറളം എട്ടാം വാർഡിൽ പട്ടാട്ട് മിഥുന്റെ വീട്ടിലെ കിണറും പൂമംഗലം പഞ്ചായത്ത് അഞ്ചാം വാർഡിലെ എടക്കുളത്ത് ഊക്കൻ പോൾസൺ മാത്യുവിന്റെ വീടിനോട് ചേർന്നുള്ള കിണറുമാണ് ഇടിഞ്ഞുതാഴ്ന്നത്. കാറളം പഞ്ചായത്തിൽ പത്താം വാർഡിൽ കണ്ടംകുളത്തി ഈനാശുവിന്റെ കിണറിന്റെ അരിക് ഇടിഞ്ഞു. എട്ടാം വാർഡിൽ വേലംകുളത്തിന്റെ സംരക്ഷണ ഭിത്തിയും തകർന്നു.
പഞ്ചായത്ത് ഫണ്ടുപയോഗിച്ച് നിർമ്മിച്ച സംരക്ഷണ ഭിത്തിയാണ് മഴയിൽ തകർന്നത്. താഴ്ന്ന പ്രദേശങ്ങളിൽ വെള്ളം കയറിയിട്ടുണ്ടെങ്കിലും എവിടേയും ക്യാമ്പുകൾ ആരംഭിച്ചിട്ടില്ല. കനത്ത മഴയിൽ മാള വലിയപറമ്പിൽ ഓട് മേഞ്ഞ വീട് ഭാഗികമായി തകർന്നു. മാരിക്കൽ ഗണേശന്റെ വീടാണ് തകർന്നത്. തൃശൂര് പെരിങ്ങല് കുത്ത് ഡാമിന്റെ ഒരു ഷട്ടര് തുറന്നു. ഡാമിന് താഴെ ചാലക്കുടി പുഴയുടെ ഇരുകരകളിലും താമസിക്കുന്നവര് ജാഗ്രത പാലിക്കണമെന്ന് അധികൃതര് അറിയിച്ചു.
അതേ സമയം തൃശൂർ ജില്ലയിൽ കനത്ത മഴ തുടരുകയാണ്. അതിശക്തമായ മഴയ്ക്ക് സാധ്യതയുള്ളതിനാൽ തൃശൂരിൽ നാളെ ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. തൃശൂരിന് പുറമെ മലപ്പുറം, എറണാകുളം ജില്ലകളിലും ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. അതേസമയം സംസ്ഥാന വ്യാപകമായി കനത്ത മഴ തുടരുകയാണ്. 7 ദുരന്ത നിവാരണ സേനയെ വിന്യസിച്ചു. തൃശൂരിലേക്ക് രണ്ടും ഇടുക്കി, വയനാട്, എറണാകുളം, മലപ്പുറം, കോഴിക്കോട് എന്നിവിടങ്ങളിലേക്ക് ഒന്നും സംഘങ്ങളെയാണ് വിന്യസിക്കുക