അബുദാബി: യുഎഇയില് മൂന്നുപേര്ക്കു കൂടി കുരങ്ങുപനി സ്ഥിരീകരിച്ചു. ഇതോടെ രാജ്യത്ത് കുരങ്ങുപനി സ്ഥിരീകരിച്ചവരുടെ എണ്ണം നാലായി. നിലവില് ആശങ്കപ്പെടേണ്ട സാഹചര്യമില്ലെന്നും രോഗവ്യാപനം തടയുന്നതിനുള്ള മുന്കരുതല് നടപടികള് സ്വീകരിച്ചിട്ടുണ്ടെന്നും ആരോഗ്യ മന്ത്രാലയം അറിയിച്ചു.
സംശയാസ്പദമായ കേസുകള് റിപ്പോര്ട്ട് ചെയ്യാനും രോഗബാധ കണ്ടെത്തുന്നതിന് സുരക്ഷാ നടപടികള് സ്വീകരിക്കാനും ആശുപത്രികള് ഉള്പ്പെടെ എല്ലാ ആരോഗ്യകേന്ദ്രങ്ങള്ക്കും നിര്ദേശം നല്കിയിട്ടുണ്ടെന്നും മന്ത്രാലയം വ്യക്തമാക്കി. നിലവില് ഗള്ഫ് രാജ്യങ്ങളില് യുഎഇ ഒഴിച്ച് മറ്റെവിടെയും കുരങ്ങുപനി സ്ഥിരീകരിച്ചിട്ടില്ല. മുമ്പ് വിദേശ രാജ്യത്ത് നിന്ന് വന്നയാള്ക്ക് യുഎഇയില് കുരങ്ങുപനി സ്ഥിരീകരിച്ചിരുന്നു.
പശ്ചിമ ആഫ്രിക്കന് രാജ്യത്തു നിന്നെത്തിയ 29കാരിയിലാണ് രോഗം കണ്ടെത്തിയത്. ഇവര് ഏത് രാജ്യക്കാരിയാണെന്ന് അധികൃതര് വ്യക്തമാക്കിയിട്ടില്ല. യുഎഇയില് സന്ദര്ശകയായി എത്തിയതായിരുന്നു യുവതി. യുവതിക്ക് ആവശ്യമായ ചികിത്സ നല്കി വരുന്നുണ്ടെന്ന് ആരോഗ്യ മന്ത്രാലയം അധികൃതര് അറിയിച്ചു.
കഴിഞ്ഞ ഏതാനും ദിവസങ്ങളിലായി വിവിധ യൂറോപ്യന് രാജ്യങ്ങളിലും വടക്കന് അമേരിക്കന് രാജ്യങ്ങളിലും കുരങ്ങു പനി കേസുകള് കണ്ടെത്തിയിരുന്നു. ബ്രിട്ടന്, സ്പെയിന്, പോര്ച്ചുഗല്, ഇറ്റലി, യുഎസ്, സ്വീഡന്, കാനഡ എന്നിവിടങ്ങളിലാണ് രോഗം റിപ്പോര്ട്ട് ചെയ്തത്. ഏഷ്യയില് ഇസ്രായേലിലും കഴിഞ്ഞ ദിവസം കുരങ്ങുപനി കേസ് കണ്ടെത്തിയിരുന്നു. ഇതിന്റെ അടിസ്ഥാനത്തില് അതീവ ജാഗ്രതയാണ് യുഎഇ ഉള്പ്പെടെയുള്ള ഗള്ഫ് രാജ്യങ്ങളില് തുടരുന്നത്. നേരത്തെ ആഫ്രിക്കന് രാജ്യങ്ങളില് മാത്രമായി കണ്ടുവരാറുള്ള കുരങ്ങു പനി ലോകത്തിന്റെ മറ്റു രാജ്യങ്ങളിലേക്കും പടര്ന്നത് ആരോഗ്യ മേഖലയില് ആശങ്ക സൃഷ്ടിച്ചിട്ടുണ്ട്.
12 രാജ്യങ്ങളിലായി 100ഓളം പേരെ ഇതിനകം കുരങ്ങുപനി ബാധിച്ചിട്ടുണ്ടെന്നാണ് ലോകാരോഗ്യ സംഘടന പുറത്തുവിട്ട കണക്കുകള് വ്യക്തമാക്കുന്നത്. കുരങ്ങുപനിയാണെന്ന് സംശയിക്കുന്ന നിരവധി കേസുകള് നിരീക്ഷണം നടന്നുവരികയാണ്. കുരുങ്ങുപനിയെ തുടര്ന്ന് എവിടെയും ഇതുവരെ മരണം റിപ്പോര്ട്ട് ചെയ്യപ്പെട്ടിട്ടില്ല. അതേസമയം, കുരങ്ങുപനി സാധാരണ കണ്ടുവരാത്ത രാജ്യങ്ങളില് അടക്കം നിരീക്ഷണം വ്യാപിപ്പിച്ചിരിക്കുന്നതിനാല് വലിയ വ്യാപനം ഉണ്ടാവാന് സാധ്യതയില്ലെന്നാണ് കണക്കുകൂട്ടല്. രോഗപ്രതിരോധം ശക്തമാക്കുന്നതിനായി ആരോഗ്യ മേഖലയില് പ്രവര്ത്തിക്കുന്നവര്ക്ക് ഇതുമായി ബന്ധപ്പെട്ട കൂടുതല് വിവരങ്ങളും നിര്ദ്ദേശങ്ങളും കൈമാറിക്കൊണ്ടിരിക്കുകയാണെന്ന് ലോകാരോഗ്യ സംഘടന അറിയിച്ചു. ലോകത്തിന്റെ മറ്റു ഭാഗങ്ങളിലും രോഗം കണ്ടെത്താനുള്ള സാധ്യതയാണ് മുന്നില് കാണുന്നതെന്നും അധികൃതര് അറിയിച്ചു.
രാജ്യത്ത് ഇതുവരെ കുരങ്ങുപനി കേസുകള് റിപ്പോര്ട്ട് ചെയ്യപ്പെട്ടിട്ടില്ലെന്ന് സൗദി അറേബ്യയും ഒമാനും വ്യക്തമാക്കി. ഇതുവരെ ആര്ക്കും കുരങ്ങുപനി സ്ഥിരീകരിച്ചിട്ടില്ലെന്നും എല്ലാ മുന്കരുതലുകളും സ്വീകരിച്ചിട്ടുണ്ടെന്നും സൗദി ആരോഗ്യവകുപ്പ് അറിയിച്ചു. രോഗബാധ കണ്ടെത്തുകയാണെങ്കില് അതിന്റെ വ്യാപനം തടയാനുള്ള എല്ലാ മുന്കരുതലുകളും സജ്ജീകരിച്ചിട്ടുണ്ട്. വിദേശ രാജ്യങ്ങളിലേക്ക് യാത്ര ചെയ്യുന്നവര്, പ്രത്യേകിച്ച് രോഗബാധ റിപ്പോര്ട്ട് ചെയ്യപ്പെട്ട രാജ്യങ്ങളിലേക്ക് പോകുന്നവര്, എല്ലാ ആരോഗ്യ മാനദണ്ഡങ്ങളും വ്യവസ്ഥകളും പാലിക്കണമെന്നും മന്ത്രാലയം ആവശ്യപ്പെട്ടു.
കുരങ്ങുപനി സംശയിക്കുന്നതോ സ്ഥിരീകരിച്ചതോ ആയ ഒരു കേസും ഇതുവരെ കണ്ടെത്തിയിട്ടില്ലെന്ന് ഒമാന് ആരോഗ്യമന്ത്രാലയവും അറിയിച്ചു. കുരങ്ങുപനി റിപ്പോര്ട്ട് ചെയ്ത രാജ്യങ്ങളില് നിന്ന് വരുന്നവരുമായി പൊതുവിലും ചുണങ്ങ്, ചര്മ്മ രോഗങ്ങള്, ശ്വാസ കോശ സംബന്ധമായ അസുഖങ്ങള് തുടങ്ങിയ രോഗ ലക്ഷണങ്ങളുള്ളവരുമായി പ്രത്യേകിച്ചും മറ്റുള്ളവര് സമ്പര്ക്കം ഒഴിവാക്കണം. രോഗം പകരുന്നത് തടയാന് ആവശ്യമായ മുന്കരുതല് നടപടികള് സ്വദേശികളും വിദേശികളും സ്വീകരിക്കണമെന്നും മന്ത്രാലയം പ്രസ്താവനയില് പറഞ്ഞു.