കൊളംബോ: ശ്രീലങ്കയിൽ എല്ലാ രാഷ്ട്രീയ പാർട്ടികളേയും ഉൾപ്പെടുത്തി ദേശീയ സമിതി രൂപീകരിക്കുമെന്ന് പ്രധാനമന്ത്രി റനിൽ വിക്രമസിംഗെ. ജനങ്ങളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. രാജ്യത്തെ സാമ്പത്തിക സ്ഥിതി അപകടകരമായ രീതിയിലാണ് നിലകൊള്ളുന്നതെന്ന് അദ്ദേഹം പറഞ്ഞു. "രാജ്യത്തെ സാമ്പത്തിക സ്ഥിതി അപകടകരമായ രീതിയിലാണ് നിലകൊള്ളുന്നത്. ഇത് പരിഹരിക്കേണ്ടത് രാജ്യത്തിന്റെ പ്രധാനപ്പെട്ട ആവശ്യമാണ്. ഇതിനായി എല്ലാ രാഷ്ട്രീയ പാർട്ടികളേയും ഉൾപ്പെടുത്തി ദേശീയ സമിതി രൂപകരിക്കും." റനിൽ വിക്രമസിംഗെ പറഞ്ഞു. മഹിന്ദ രാജപക്സെയുടെ രാജിയെതുടർന്നാണ് റനിൽ വിമക്രമസിംഗെ പ്രധാനമന്ത്രിയായത്. യുണൈറ്റഡ് നാഷ്ണൽ പാർട്ടിയുടെ (യുഎൻപി) നേതാവാണ് അദ്ദേഹം. ഭരണകക്ഷിയായ ശ്രീലങ്ക പൊതുജന പെരമുന പുതിയ പ്രധാനമന്ത്രിക്ക് പിന്തുണ പ്രഖ്യാപിച്ചിരുന്നു. ഇടക്കാല സർക്കാർ രൂപീകരണ നടപടികൾ പുരോഗമിക്കവെ റനിൽ നാല് മന്ത്രിമാരെ നിയോഗിച്ചിരുന്നു. മുൻ പ്രധാനമന്ത്രിയുടെ പാർട്ടിയായ ശ്രീലങ്ക പൊതുജന പെരമുനയുടെ പാർട്ടിയിൽ നിന്നുള്ളവരാണ് എല്ലാവരും. ഇടക്കാല സർക്കാരിൽ അംഗങ്ങളാകാൻ അഭ്യർത്ഥിച്ച് മുഖ്യ പ്രതിപക്ഷ കക്ഷികളായ സമാഗി ജന ബലവേഗയ നേതാവ് സജിത് പ്രേമദാസയ്ക്ക് റനിൽ കത്ത് നൽകിയിട്ടുണ്ട്.