ദാവോസ്: ഒരിക്കലും ഉണങ്ങാത്ത മുറിവാണ് ഫലസ്തീനെന്ന് അവരോടുള്ള അതിക്രമങ്ങള്‍ അവസാനമില്ലാതെ തുടരുകയാണെന്നും ഖത്തര്‍ അമീര്‍ ശെയ്ഖ് തമീം ബിന്‍ ഹമദ് അല്‍താനി. സ്വിറ്റ്‌സര്‍ലന്‍ഡിലെ ദാവോസില്‍ നടന്ന വേള്‍ഡ് ഇക്കണോമിക് ഫോറത്തില്‍ ബിസിനസ് മേഖലയില്‍ നിന്നുള്ള പ്രമുഖരെ അഭിസംബോധന ചെയ്ത് സംസാരിക്കുകയായിരുന്നു ഖത്തര്‍ അമീര്‍. യുക്രെയിന്‍ യുദ്ധം പോലെ തന്നെ പ്രധാനമാണ് ഇസ്രായേല്‍- ഫലസ്തീന്‍ സംഘര്‍ഷവും. ലോകം വിസ്മരിക്കുകയും അവഗണിക്കുകയും ചെയ്യുന്ന ഇത്തരം സംഘര്‍ഷങ്ങളും പരിഹരിക്കുന്നതിനുള്ള സത്വര നടപടികള്‍ ഉണ്ടാവേണ്ടതുണ്ട്. അതിന് അന്താരാഷ്ട്ര സമൂഹം ഉണര്‍ന്നു പ്രവര്‍ത്തിക്കണമെന്നും ഖത്തര്‍ അമീര്‍ പറഞ്ഞു. യുക്രെയിന്‍ പ്രതിസന്ധിക്ക് നയതന്ത്ര പരിഹാരം കണ്ടെത്താന്‍ ശ്രമിക്കുന്നതു പോലെ മറ്റെല്ലാ സംഘര്‍ഷങ്ങളിലെ ഇരകളോടും വര്‍ഗ, ദേശ, മത വ്യത്യാസമില്ലാതെ ഐക്യപ്പെടാന്‍ നമുക്ക് സാധിക്കണം. അതില്‍ ഏറ്റവും ഭീകരമായതാണ് ഫലസ്തീന്‍ പ്രശ്‌നം. ഐക്യരാഷ്ട്ര സഭ സ്ഥാപിതമായത് മുതല്‍ ഉണങ്ങാത്ത മുറിവായി നിലനില്‍ക്കുകയാണത്. പതിറ്റാണ്ടുകളായി അധിനിവേശത്തിന് വിധേയമായിക്കൊണ്ടിരിക്കുകയാണ് ഫലസ്തീന്‍ കുടുംബങ്ങള്‍. ആശ്വാസത്തിന്റെ ഒരു കണിക പോലും അവര്‍ക്ക് പ്രതീക്ഷയായി കാണാനില്ല. അവരുടെ ഭൂമിയില്‍ അനധികൃത കുടിയേറ്റം ഇപ്പോഴും തുടരുകയാണ്. ഫലസ്തീന്‍ ജനതയ്ക്കെതിരായ ആക്രമണങ്ങളും ഇസ്രായേല്‍ തുടരുകയാണെന്നും ഖത്തര്‍ അമീര്‍ പറഞ്ഞു. ഈ അനീതിക്കും അക്രമത്തിനുമെതിരെ ലോകം ഉണര്‍ന്നു പ്രവര്‍ത്തിക്കണമെന്നാണ് തന്റെ പ്രാര്‍ഥനയെന്നും ഖത്തര്‍ അമീര്‍ കൂട്ടിച്ചേര്‍ത്തു. അധിനിവിഷ്ട വെസ്റ്റ് ബാങ്കില്‍ ഈ മാസം ആദ്യം ഇസ്രായേല്‍ സൈന്യം കൊലപ്പെടുത്തിയ അല്‍ ജസീറ മാധ്യമപ്രവര്‍ത്തക ഷിറീന്‍ അബു ആഖിലയുടെ കാര്യവും സമ്മേളനത്തില്‍ ഖത്തര്‍ അമീര്‍ ഓര്‍മിപ്പിച്ചു. ഈ വര്‍ഷം മാര്‍ച്ച് മുതല്‍ യുക്രൈനില്‍ കൊല്ലപ്പെട്ട ഏഴ് മാധ്യമപ്രവര്‍ത്തകരുടേതെന്നത് പോലെ തന്നെ ഭീതിജനകമാണ് ഷിറീന്റെ കൊലപാതകവും. 2000 മുതല്‍ ഫലസ്തീനില്‍ 18 പത്രപ്രവര്‍ത്തകരാണ് കൊല്ലപ്പെട്ടത്. ഇറാഖിലും സിറിയയിലും യെമനിലും ജോലിക്കിടെ കൊല ചെയ്യപ്പെട്ട മാധ്യമ പ്രവര്‍ത്തകര്‍ നിരവധിയാണ്. മാധ്യമപ്രവര്‍ത്തകര്‍ക്കെതിരായ ആക്രമണങ്ങളോട് സഹിഷ്ണുത പാടില്ലെന്നും ഖത്തര്‍ അമീര്‍ ഓര്‍മിപ്പിച്ചു. മതത്തിന്റെയോ ദേശത്തിന്റെയോ വംശത്തിന്റെയോ അടിസ്ഥാനത്തില്‍ ആളുകള്‍ക്ക് മൂല്യം കല്‍പ്പിക്കുന്ന സര്‍ക്കാരുകളുടെ ഇരട്ടത്താപ്പ് അംഗീകരിക്കാനാവില്ലെന്നും അദ്ദേഹം തുറന്നടിച്ചു. ഒരോ യൂറോപ്പ്യന്‍ പൗരന്റെയും മൂല്യം തങ്ങളുടെ നാട്ടില്‍ നിന്നുള്ള ഒരാളുടേത് പോലെ തന്നെ വിലപ്പെട്ടതായാണ് തങ്ങള്‍ കരുതുന്നതെന്നും ഖത്തര്‍ അമീര്‍ കൂട്ടിച്ചേര്‍ത്തു.