✒️ ജിബിൻ പാതേപ്പറമ്പിൽ
ന്യൂസ് ബ്യൂറോ ബഹറിൻ
ദുബായ്: ഒമാന്‍ ഒഴികെ എല്ലാ ഗള്‍ഫ് രാജ്യങ്ങളിലും ഈദ് അല്‍- ഫിത്ര്‍ തിങ്കളാഴ്ച. ശനിയാഴ്ച ഗള്‍ഫില്‍ എവിടെയും ശവ്വാല്‍ മാസപ്പിറവി ദൃശ്യമാകാത്തതിനാല്‍ ഇന്ന് റമദാന്‍ 30 പൂര്‍ത്തിയാക്കി സൗദി അറേബ്യ, ഖത്തര്‍, കുവൈറ്റ്, യുഎഇ, ബഹ്‌റൈന്‍ എന്നിവിടങ്ങളില്‍ പെരുന്നാള്‍ തിങ്കളാഴ്ചയാണ് പ്രഖ്യാപിച്ചത്. ഒരു ദിവസം വൈകി നോമ്പെടുത്ത ഒമാനില്‍ ഇന്ന് (ഞായറാഴ്ച മെയ് 1) രാത്രി മാസപ്പിറവി കാണുന്നത് അനുസരിച്ചായിരിക്കും തീരുമാനംഒമാനില്‍ റമദാന്‍ 29 ഞായറാഴ്ച ആയതിനാല്‍ ചെറിയ പെരുന്നാള്‍ സംബന്ധിച്ച് തീരുമാനം ആയിട്ടില്ല. ഞായറാഴ്ച മാസപ്പിറവി കണ്ടാല്‍ തിങ്കളാഴ്ചയും അല്ലെങ്കിലും ചൊവ്വാഴ്ചയും ആയിരിക്കും ഒമാനില്‍ പെരുന്നാള്‍.
സൗദിയില്‍ മാസപ്പിറവി ദൃശ്യമാകാത്തതിനാല്‍ പെരുന്നാള്‍ തിങ്കളാഴ്ച ആയിരിക്കുമെന്ന് ചന്ദ്ര നിരീക്ഷണ കമ്മിറ്റി അറിയിച്ചു. തുമൈര്‍, ഹോത്ത, സുദൈര്‍, തായിഫ് തുടങ്ങിയ വിവിധ സ്ഥലങ്ങളില്‍ മാസപ്പിറവി നിരീക്ഷകര്‍ രംഗത്തുണ്ടെങ്കിലും എവിടെയും മാസപ്പിറവി ദൃശ്യമായില്ല.
അതേസമയം, മാസപ്പിറവി ദൃശ്യമാകാത്തതിനാല്‍ യുഎഇയിലും ചെറിയ പെരുന്നാള്‍ തിങ്കളാഴ്ച ആയിരിക്കുമെന്ന് യുഎഇ മൂണ്‍ സൈറ്റിങ് കമ്മിറ്റി അറിയിച്ചു. യുഎഇയില്‍ പെരുന്നാള്‍ നമസ്‌കാര സമയം പ്രഖ്യാപിച്ചു. അബുദാബി രാവിലെ 6.03, ദുബായ് 5.59, ഷാര്‍ജ 5.58, അല്‍ഐന്‍ 5.57, ഫുജൈറ 5.58, ഉമ്മുല്‍ഖുവൈന്‍ 5.57, റാസല്‍ഖൈമ 5.56.
യുഎഇയില്‍ പെരുന്നാള്‍ നമസ്‌കാരവും ഖുതുബയും (പ്രഭാഷണം) 20 മിനിറ്റില്‍ കൂടാന്‍ പാടില്ലെന്ന് ദേശീയ ദുരന്ത നിവാരണ സമിതി അറിയിച്ചു. ആരാധനാലയങ്ങളിലും ഈദ് ഗാഹുകളിലെയും തിരക്ക് നിയന്ത്രിക്കാന്‍ പോലീസും വൊളന്റിയര്‍മാരും ഉണ്ടാകും. പെരുന്നാള്‍ ആഘോഷ പരിപാടികളില്‍ 100 % പേര്‍ക്ക് പങ്കെടുക്കാന്‍ അബുദാബി ദുരന്ത നിവാരണ സമിതി അനുമതി നല്‍കി. വാണിജ്യ പ്രവര്‍ത്തനങ്ങള്‍, വിനോദസഞ്ചാര കേന്ദ്രങ്ങള്‍ എന്നിവിടങ്ങളിലെ നിയന്ത്രണങ്ങള്‍ എടുത്തു കളഞ്ഞു.