കൊല്ലം : കൊട്ടിയത്ത് നിർമ്മാണം നടന്നുകൊണ്ടിരുന്ന കെട്ടിടത്തിൻ്റെ രണ്ടാം നിലയിൽ നിർമ്മിച്ച കൂര ഇടിഞ്ഞു വീണ് രണ്ട് നിർമ്മാണ തൊഴിലാളികൾ മരിച്ചു. കൊല്ലം വാളത്തുംഗൽ സ്വദേശി രഘു (43) അയത്തിൽ സ്വദേശി അജന്തൻ (43) എന്നിവരാണ് മരിച്ചത്. തിരുവനന്തപുരം സ്വദേശി വിനോദ് കുമാറിന് വേണ്ടി കരാർ അടിസ്ഥാനത്തിൽ നിർമ്മിക്കുന്ന വീട്ടിലായിരുന്നു അപകടം. കെട്ടിടത്തിൻ്റെ രണ്ടാം നിലയുടെ മുകളിൽ പുറത്തോട്ട് തള്ളി നിൽക്കുന്ന നിലയിൽ അലങ്കാരത്തിന് വേണ്ടി നിർമ്മിച്ച കൂരയാണ് തകർന്നത്. കൂരയ്ക്ക് അടിയിൽ ജോലി ചെയ്യുകയായിരുന്നു ഇരുവരും. നിർമ്മാണത്തിലെ അപാകമാണ് തകർച്ചയ്ക്ക് കാരണമായതെന്നാണ് പ്രാഥമിക നിഗമനം. മറ്റ് തൊഴിലാളികളും നാട്ടുകാരും ചേർന്ന് കോൺക്രീറ്റിനടിയിൽ കുരുങ്ങിക്കിടന്ന ഇവരെ പുറത്തെടുത്ത് തൊട്ടടുത്ത സ്വകാര്യ ക്ലിനിക്കിൽ എത്തിച്ചു. പ്രാഥമിക ചികിത്സ നൽകിയ ശേഷം ഇരുവരെയും ഉടൻ പാരിപ്പള്ളി മെഡിക്കൽ കോളേജ് ആശുപത്രിയിലേക്ക് മാറ്റി. അവിടെയെത്തി ഏറെ കഴിയും മുൻപെ രഘു മരിച്ചു. അജന്തനെ വിദഗ്‌ധ ചികിത്സയ്ക്കായി തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. രഘുവിൻറെ ഭാര്യ കാർത്തിക.,മകൾ.കീർത്തന. പ്രശാന്തിയാണ് അജന്തൻ്റെ ഭാര്യ. മക്കൾ. കാശിനാഥ്, കൈലാസ് നാഥ്.