ധാക്ക: ബംഗ്ലാദേശിലെ ചിറ്റഗോങില്‍ ഷിപ്പിങ് കണ്ടെയ്‌നര്‍ ഡിപ്പോയിലുണ്ടായ വൻ തീപിടിത്തത്തിൽ 35 പേർ വെന്തുമരിച്ചു. 450 ലേറെ പേർക്ക് പൊള്ളലേൽക്കുകയും ചെയ്തിട്ടുണ്ട്. ഇവരിൽ പലരുടെയും നില ഗുരുതരമാണെന്നാണ് റിപ്പോർട്ട്. മരണസംഖ്യ ഉയരാൻ സാധ്യതയുണ്ട്. ചിറ്റഗോങ്ങിലെ സീതാകുണ്ഡയിൽ ഇന്നലെ രാത്രിയോടെയാണ് തീപിടത്തമുണ്ടായത്. പലരുടെയും നില ഗുരുതരമാണെന്നും മരണസംഖ്യ ഉയർന്നേക്കുമെന്നും അധികൃതർ പറഞ്ഞു. "ഇതുവരെ 35 മൃതദേഹങ്ങൾ ഇവിടെയെത്തിയിട്ടുണ്ട്" ചറ്റഗ്രാം മെഡിക്കൽ കോളേജിൽ നിന്ന് ഒരു പോലീസ് ഓഫീസർ പറഞ്ഞതായി വാർത്താ ഏജൻസിയായ പിടിഐ റിപ്പോർട്ട് ചെയ്തു. ഡിപ്പോയിലുണ്ടായ രാസപ്രവര്‍ത്തനം മൂലമാണു തീപിടിത്തം ഉണ്ടായതെന്നാണ് പ്രാഥമിക നിഗമനമെന്ന് മെഡിക്കൽ കോളേജ് ഔട്ട്പോസ്റ്റ് പോലീസ് ഓഫീർ നുറുൽ അസ്ലാം പറഞ്ഞു. പൊട്ടിത്തെറിക്ക് പിന്നാലെയാണ് പ്രദേശത്ത് തീ പടർന്നതെന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്. രാത്രി 9 മണിയോടെ ആയിരുന്നു തീപിടിത്തമുണ്ടായത്. അർധരാത്രിയോടെ വലിയ പൊട്ടിത്തെറിയുണ്ടായതോടെ തീ അതിവേഗം വ്യാപിക്കുകയായിരുന്നു. അഗ്നിശമന സേനയുടെ 19 യൂണിറ്റുകൾ സ്ഥലത്തെത്തിയാണ് രക്ഷാപ്രവർത്തനം നടത്തിയത്. ആംബുലൻസുകളും പ്രദേശത്ത് ഉണ്ടെന്ന് ചിറ്റഗോങ് ഫയർ സർവീസ് ആൻഡ് സിവിൽ ഡിഫൻസ് അസിസ്റ്റന്‍റ് ഡയറക്ടർ ഫാറുഖ് ഹുസൈൻ പറഞ്ഞു. 2011 മേയിലാണ് അപകടമുണ്ടായ കണ്ടെയ്നർ ഡിപ്പോ പ്രവർത്തനം ആരംഭിച്ചത്.