ജറുസലെം: പുരാതന ഇതിഹാസങ്ങളിലും വേദങ്ങളിലും ശപിക്കപ്പെട്ട ചിലയിടങ്ങളെ കുറിച്ച് പറയുന്നുണ്ട്. അവിടങ്ങളില്‍ മനുഷ്യന്മാര്‍ക്ക് പോലും പ്രവേശനമില്ല. ഇത്തരത്തില്‍ ഇസ്രയേലില്‍ ഒരിടം കണ്ടെത്തിയിരിക്കുകയാണ്. നട്ടെല്ലിനെ വിറപ്പിക്കുന്ന തരത്തിലുള്ള മുന്നറിയിപ്പാണ് ശവകുടീരത്തില്‍ നിന്നും കാണാനാകുന്നത്. ഇസ്രയേലില്‍ കണ്ടെത്തിയ ശവകുടീരത്തിന്റെ പുറംഭാഗത്ത് ചുവന്ന നിറത്തിലാണ് മുന്നറിയിപ്പ് എഴുതിയിരിക്കുന്നത്. ഇവ ശവകുടീരത്തിന്റെ കണ്ടെത്തലും അതോട് ചേര്‍ന്നുള്ള മുന്നറിയിപ്പും ഇത് ശപിക്കപ്പെട്ടതാണെന്നും മനുഷ്യരാശിയുടെ നാശത്തിലേക്ക് നയിക്കുമെന്നും വിശ്വസിക്കാന്‍ ആളുകളെ പ്രേരിപ്പിക്കുന്ന തരത്തിലുള്ളതാണ്.
ഇസ്രയേലില്‍ നിന്നുള്ള ശവകുടീരത്തിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിട്ടുണ്ട്. പ്രഥമ ദൃഷ്ട്യാ രക്തം കൊണ്ടെഴുതിയ പോലെ തോന്നിക്കുന്ന പുരാതന വാചകമാണിത്. ഇസ്രയേലിലെ ഗലീലിയിലുള്ള ജൂത ബെയ്റ്റ് ഷിയാരിം സെമിത്തേരിയിലെ പഴയ സെമിത്തേരിയിലെ ഒരു ഗുഹയില്‍ നിന്നാണ് പുരാവസ്തു ഗവേഷകര്‍ ഈ ശവകുടീരം കണ്ടെത്തിയത്.
65 വര്‍ഷത്തിനിടെ യുനെസ്‌കോയുടെ ലോക പൈതൃക സൈറ്റില്‍ കണ്ടെത്തിയ ആദ്യത്തെ ശവകുടീരമാണിതെന്ന് വിദഗ്ധര്‍ പറയുന്നു. എന്നാല്‍, ചുവരുകളില്‍ കണ്ടെത്തിയ മുന്നറിയിപ്പ് അത് 'തുറക്കാന്‍ പാടുള്ളതല്ലെ'ന്ന് പറയുന്നു. പുരാതന ഹീബ്രു ഭാഷയില്‍ ചുവന്ന നിറത്തില്‍ എഴുതിയ വാചകം ഇങ്ങനെ, 'ഈ ശവക്കല്ലറ തുറക്കുന്ന ആരെയും ശപിക്കുമെന്ന് യാക്കോവ് ഹാഗെര്‍ പ്രതിജ്ഞ ചെയ്യുന്നു. അതിനാല്‍ ആരും ഇത് തുറക്കരുത്'.
'നിങ്ങള്‍ തുറക്കാന്‍ പാടില്ലാത്ത കാര്യങ്ങള്‍- പണ്ടോറയുടെ പെട്ടി- പുരാതന ശവകുടീരങ്ങള്‍' എന്ന അടിക്കുറിപ്പോടെയാണ് ഇസ്രയേലിന്റെ ഔദ്യോഗിക അക്കൗണ്ട് ട്വിറ്ററില്‍ ചിത്രങ്ങള്‍ പങ്കുവെച്ചത്. യാക്കോവ് ഹഗേര്‍ എന്നതിന്റെ വിവര്‍ത്തനം സൂചിപ്പിക്കുന്നത് മതപരിവര്‍ത്തനത്തെയാണ്. അതിനര്‍ഥം യഹൂദമതത്തിലേക്ക് പരിവര്‍ത്തനം ചെയ്തവന്‍ എന്നാണ്. എന്നാല്‍, ഈ കല്ലറയുടെ പുറത്ത് അത് തുറക്കരുതെന്ന് എഴുതി വച്ചിരിക്കുന്നത് ആരാണെന്നത് വ്യക്തമല്ല. മരിച്ചവരുടെ വിശ്രമസ്ഥലം ശല്യപ്പെടുത്തലില്ലാതെ തുടരുന്നെന്ന് ഉറപ്പാക്കാനായിരിക്കണം ഇത്തരത്തില്‍ ഒരു കുറിപ്പ് എഴുതി വച്ചിരിക്കുന്നതെന്ന് ഹൈഫ സര്‍വകലാശാലയിലെ പുരാവസ്തു ഗവേഷകര്‍ പറഞ്ഞു.