ലണ്ടന്‍: മലയാളി യുവ ഡോക്ടര്‍ ബ്രിട്ടനില്‍ കാറപകടത്തില്‍ മരിച്ചു. ബ്രിട്ടനിലെ എം- 6 മോട്ടോര്‍ വേയില്‍ ഇന്നലെ (ശനിയാഴ്ച) രാവിലെ ഉണ്ടായ കാറപകടത്തിലാണ് ലിവര്‍പൂളില്‍ താമസിക്കുന്ന ചങ്ങനാശേരി സ്വദേശി ഡോ. ജോതിസ് മണലിയില്‍ (ജോയല്‍- 27) മരിച്ചത്. രാത്രി ജോലി കഴിഞ്ഞു മടങ്ങി വരുമ്പോഴാണ് അപകടം സംഭവിച്ചത്. ജോയലിന്റെ മാതാപിതാക്കള്‍ നാട്ടില്‍ ആയിരുന്നതിനാല്‍ വാര്‍ത്ത സ്ഥിരീകരിച്ച് പുറത്തുവരാന്‍ സമയമെടുത്തു. ലിവര്‍പൂളിലെ ബോള്‍ട്ടണ്‍ ആശുപത്രിയില്‍ ആയിരുന്നു ജോയല്‍ ജോലി ചെയ്തിരുന്നത്. ജോലി കഴിഞ്ഞ് ലിവര്‍പൂളിലെ സെന്റ് ഹെലന്‍സിലുള്ള വീട്ടിലേക്ക് വരുന്ന വഴി ആയിരുന്നു അപകടം സംഭവിച്ചത്. ജോയല്‍ ഓടിച്ചിരുന്ന കാര്‍ എം- 6 മോട്ടോര്‍വേയിലെ ഡിവൈഡറില്‍ ഇടിച്ചു തീപിക്കുകയായിരുന്നെന്നാണ് പ്രാഥമിക വിവരം. പഠനം പൂര്‍ത്തിയാക്കി ജോയല്‍ ജോലിയില്‍ പ്രവേശിച്ചിട്ട് ഒരു വര്‍ഷം പൂര്‍ത്തിയാകുന്നതേയുള്ളൂ. അപകട കാരണം ഉള്‍പ്പെടെയുള്ള കൂടുതല്‍ വിശദാംശങ്ങള്‍ പോലീസ് പുറത്തുവിട്ടിട്ടില്ല. മൃതദേഹം ഇപ്പോഴും മാഞ്ചസ്റ്റര്‍ പോലീസിന്റെ കസ്റ്റഡിയിലാണ്. ജോയലിന്റെ പിതാവ് ജോജപ്പന്‍ വാര്‍ത്തയറിഞ്ഞ് ശനിയാഴ്ച രാത്രി തന്നെ ബ്രിട്ടനിലെത്തി. അമ്മയ്ക്ക് ഇനിയും ബ്രിട്ടനിലേക്ക് തിരിക്കാനായിട്ടില്ല. ചങ്ങനാശേരി മണലിയില്‍ കുടുംബാംഗങ്ങളായ ജോജപ്പന്‍- ജെസ്സി ദമ്പതികളുടെ മൂത്തമകനാണ് ജോയല്‍.