ദുബായ്: കെട്ടിടത്തിന്റെ ലിഫ്റ്റില്‍ നിന്ന് കളഞ്ഞുകിട്ടിയ രണ്ടു കോടിയിലേറെ രൂപ (10 ലക്ഷം ദിര്‍ഹം) പോലീസില്‍ ഏല്‍പിച്ച് ഇന്ത്യക്കാരന്‍. അല്‍ ബര്‍ഷയില്‍ താമസിക്കുന്ന താരിഖി മഹ്മൂദ് ഖാലിദ് മഹ്മൂദിനാണ് താമസിക്കുന്ന കെട്ടിടത്തില്‍ നിന്ന് ഇത്രയധികം തുക ലഭിച്ചത്. ശേഷം യുവാവിനെ ഉന്നത പോലീസ് ഉദ്യോഗസ്ഥരുടെ നേതൃത്വത്തില്‍ ആദരിച്ചു. പണം കിട്ടിയ ഉടന്‍ തന്നെ താരിഖി പോലീസ് സ്‌റ്റേഷനിലെത്തി തുക കൈമാറിയതായി അല്‍ ബര്‍ഷ പോലീസ് സ്‌റ്റേഷന്‍ ഡയറക്ടര്‍ ബ്രി. അബ്ദുല്‍ റഹീം ബിന്‍ ഷാഫി പറഞ്ഞു. ഇദ്ദേഹത്തിന്റെ സത്യസന്ധത സമൂഹത്തിന്റെ മഹത്തായ മൂല്യങ്ങളെ പ്രതിനിധീകരിക്കുന്നെന്ന് പോലീസ് പറഞ്ഞു. ബ്രി. ബിന്‍ ഷാഫി താരിഖിന് പ്രശംസാപത്രം നല്‍കി ആദരിച്ചു. സമൂഹവും പോലീസും തമ്മിലുള്ള സഹകരണത്തിന്റെ പ്രാധാന്യം അദ്ദേഹം ചൂണ്ടിക്കാട്ടി. ഇതിനുമുമ്പും സമാന സംഭവങ്ങള്‍ ഉണ്ടായിട്ടുണ്ട്. കളഞ്ഞുകിട്ടയ സാധനങ്ങളും പണവും ഉടമസ്ഥര്‍ക്കോ പോലീസ് സ്‌റ്റേഷനിലോ ഏല്‍പ്പിക്കാന്‍ നിരവധി പേര്‍ മുന്‍കൈ എടുക്കാറുണ്ട്. ഫിലീപ്പീന്‍സ് സ്വദേശിയായ അഞ്ചു വയസുകാരന്‍ നൈജല്‍ നേര്‍സ് ഖിസൈസില്‍ നിന്ന് കണ്ടെത്തിയ 4000 ദിര്‍ഹം അടുത്തിടെ പോലീസിന് കൈമാറിയിരുന്നു.