കൊച്ചി: നഗരത്തിൽ ഒരു മണിക്കൂർ നടത്തിയ മിന്നൽ പരിശോധനയിൽ കുടുങ്ങിയത് 175 ബസ്സുകൾ. ഓപ്പറേഷൻ സിറ്റി റൈഡ് എന്ന പേരിലായിരുന്നു മോട്ടോർ വാഹന വകുപ്പും പോലീസും സംയുക്തമായി നഗരത്തിലെ പത്തോളം ബസ് സ്റ്റേഷനുകളിൽ മിന്നൽ പരിശോധന നടത്തിയത്. 60 ബസ്സുകളിലെ കണ്ടക്ടർമാർക്കും ചില ഡ്രൈവർമാർക്കും ലൈസൻസ് പോലും ഇല്ലാത്തവരാണെന്ന് കണ്ടെത്തി. ഒരു മണിക്കൂറിൽ 286 ബസ്സുകളിൽ നടത്തിയ പരിശോധനയിൽ 175 എണ്ണത്തിലും നിയമലംഘനം കണ്ടെത്തി. ലൈസൻസ് ഇല്ലാത്ത ഡ്രൈവർമാരും ഇൻഷുറൻസും നികുതിയും അടക്കാത്ത ബസ്സുകളും പിടിയിലായി. ഫസ്റ്റ് എയ്ഡ് ബോക്സുകളിൽ നിന്നും പുകയില ഉൽപ്പന്നങ്ങളും കണ്ടെത്തി. ചില ബസ്സുകളിൽ പൗഡറും സോപ്പും ആണ് കണ്ടെത്തിയത്. ഫസ്റ്റ് എയ്ഡ് ബോക്സുകൾ ഇല്ലാത്ത ബസ്സുകളും നിരവധിയായിരുന്നു. യൂണിഫോം ഇല്ലാത്ത 30 പേർക്കെതിരെയും നടപടിയെടുത്തു. വാതിൽ പാളി തുറന്നിട്ട് സർവീസ് നിർത്തിയ 10 ബസുകൾക്കെതിരെയും കേസെടുത്തു. അനധികൃതമായി ഓഡിയോ സംവിധാനങ്ങൾ ഘടിപ്പിച്ച 27 വാഹനങ്ങളും എയർ ഹോൺ പിടിപ്പിച്ച ആറുവാഹനങ്ങളും അറ്റകുറ്റപ്പണി ചെയ്യാതിരുന്ന ഒൻപതു വാഹനങ്ങളും പിടിയിലായി. ട്രിപ്പ് കട്ട് ചെയ്ത ബസ്സുകൾക്കെതിരെയും നടപടിയെടുത്തു. സ്വകാര്യ ബസുകൾക്കെതിരെ വ്യാപകമായ പരാതി ഉയർന്ന സാഹചര്യത്തിൽ ആയിരുന്നു മിന്നൽ പരിശോധന.വരും ദിവസങ്ങളിൽ പരിശോധന തുടരുമെന്ന് മോട്ടോർ വാഹന വകുപ്പ് അറിയിച്ചു. ഒമ്പത് സ്ക്വാഡുകളായി നടത്തിയ പരിശോധനയിലാണ് ക്രമക്കേട് കണ്ടെത്തിയത്.