വെര്‍ജീനിയ: ഒന്നര വയസുള്ള മകൻ തനിക്ക് പറ്റിയ പിഴവിനെത്തുടർന്ന് മരിച്ചതിന് പിന്നാലെ പിതാവ് സ്വയം നിറയൊഴിച്ച് ജീവനൊടുക്കി. യുഎസിലെ വെർജീനയിൽ കഴിഞ്ഞദിവസമാണ് ദാരുണമായ സംഭവം നടന്നത്. 18 മാസം പ്രായമുള്ള മകൻ കാറിനുള്ളിൽ ചൂടേറ്റ് മരിച്ചതിന് പിന്നാലെയാണ് പിതാവ് ആത്മഹത്യ ചെയ്തതെന്ന് ചെസ്റ്റര്‍ ഫീല്‍ഡ് കൗണ്ടി പോലീസ് അറിയിച്ചു.
ഇത് അതിദാരുണമായ സംഭവമാണ്' ചെസ്റ്റര്‍ ഫീല്‍ഡ് പോലീസ് ഉദ്യോഗസ്ഥനായ ക്രിസ്റ്റഫർ ഹെൻസ്‍ലി പറഞ്ഞു. രാവിലെ ജോലിക്ക് പോയ പിതാവ് കുട്ടിയെ ഡേ കെയറിൽ ആക്കാൻ വിട്ട് പോവുകയായിരുന്നു. കാറിനകത്ത് മൂന്ന് മണിക്കൂറോളമാണ് കുട്ടി പെട്ട് പോയതെന്നാണ് റിപ്പോർട്ട്.
കൊടുംചൂടായിരുന്നു സംഭവദിവസം പ്രദേശത്ത് അനുഭവപ്പെട്ടത്. ഇതിനിടെയാണ് മൂന്ന് മണിക്കൂറോളം കുട്ടി കാറിനകത്ത് ഇരിക്കേണ്ടി വന്നതും മരണത്തിന് കീഴടങ്ങിയതും. കുട്ടിയെ മരിച്ച നിലയിൽ കാറിനകത്ത് കണ്ടെത്തിയതിന് പിന്നാലെയാണ് അച്ഛൻ ആത്മഹത്യ ചെയ്തതെന്നാണ് പ്രാഥമിക അന്വേഷണത്തിൽ വ്യക്തമായത്.
കുടുംബാംഗങ്ങളില്‍ ഒരാളെ വിളിച്ചു കുട്ടി മരിച്ചുവെന്നും, ഞാന്‍ ആത്മഹത്യ ചെയ്യുകയാണെന്നും ഇയാൾ അറിയിച്ചിരുന്നെന്നും റിപ്പോർട്ടുണ്ട്. കുട്ടിയുടെയോ, പിതാവിന്‍റെയോ പേര് അധികൃതർ പുറത്ത് വിട്ടിട്ടില്ല. വിവരം ലഭിച്ച് പോലീസ് വീട്ടിലെത്തുമ്പോള്‍ വീട്ടിനകത്ത് കുട്ടി മരിച്ചു കിടക്കുന്നതും പിതാവ് വീടിനു പുറകിലുള്ള മരങ്ങള്‍ക്കിടയില്‍ വെടിയേറ്റു മരിച്ചു കിടക്കുന്നതുമാണ് കണ്ടത്.
മൂന്ന് മണിക്കൂറോളം കുട്ടി കാറിനകത്ത് ഇരുന്നെന്നാണ് കരുതുന്നത്. കാറിനകത്ത് അമിതമായി ചൂടേറ്റതിനാലായിരിക്കും മരണം സംഭവിച്ചിട്ടുണ്ടാവുക എന്നാണ് പ്രാഥമിക അന്വേഷണത്തിൽ വ്യക്തമായത്. ഇതിൽ മനംനൊന്തായിരിക്കണം പിതാവ് ജീവനൊടുക്കിയത്. കുട്ടിയെ വീട്ടില്‍ കൊണ്ടുവന്ന് കിടത്തിയ ശേഷം സ്വയം നിറയൊഴിച്ച് ആത്മഹത്യ ചെയ്യുകയായിരുന്നുവെന്നും പോലീസ് പറയുന്നു.