ദുബായ്: ശക്തമായി തുടരുന്ന മഴയില്‍ യുഎഇയിലെ വിവിധ പ്രദേശങ്ങളില്‍ വെള്ളം കയറി. മഴ തുടരുമെന്ന കാലാവസ്ഥാ മുന്നറിയിപ്പിന്റെ പശ്ചാത്തലത്തില്‍ പുറത്തിറങ്ങുന്നവര്‍ ജാഗ്രത പാലിക്കാന്‍ അധികൃതര്‍ നിര്‍ദ്ദേശം നല്‍കി. അനിവാര്യ സന്ദര്‍ഭങ്ങളില്‍ മാത്രമേ വീടുകളില്‍ നിന്ന് പുറത്തിറങ്ങാവൂ എന്നും നിര്‍ദ്ദേശമുണ്ട്. കനത്ത മഴ പെയ്ത ഫുജൈറയിലും റാസല്‍ഖൈമയിലും ഷാര്‍ജയുടെ വിവിധ ഭാഗങ്ങളിലും റോഡുകളും താഴ്ന്ന പ്രദേശങ്ങളും വെള്ളത്തിന് അടിയിലായി.
കൂടുതല്‍ മഴയുണ്ടാവുമെന്ന കാലാവസ്ഥാ പ്രവചനത്തിന്റെ അടിസ്ഥാനത്തില്‍ ഇവിടങ്ങളില്‍ റെഡ് അലേര്‍ട്ട് പ്രഖ്യാപിച്ചിരിക്കുകയാണ് അധികൃതര്‍. സുരക്ഷ മുന്‍നിര്‍ത്തി റാസല്‍ഖൈമയിലെയും മറ്റും വിനോദ സഞ്ചാര കേന്ദ്രങ്ങള്‍ തല്‍ക്കാലം അടച്ചിരിക്കുകയാണ്. റാസല്‍ ഖൈമ മുതല്‍ ഒമാന്‍ അതിര്‍ത്തി വരെയുള്ള പ്രദേശങ്ങളില്‍ വ്യാഴാഴ്ചയും ശക്തമായ മഴ പെയ്യുമെന്നാണ് കാലാവസ്ഥാ നിരീക്ഷണ കേന്ദ്രം നല്‍കുന്ന മുന്നറിയിപ്പ്. ഉച്ചയോടെ ദുബായിലും അബൂദാബിയുടെ ചില പ്രദേശങ്ങളിലും കനത്ത മഴയുണ്ടാവുമെന്നും പ്രവചനമുണ്ട്. പലയിടങ്ങളിലും മണിക്കൂറില്‍ 55 കിലോമീറ്റര്‍ വരെ വേഗതയില്‍ കാറ്റ് അടിച്ചുവീശാന്‍ സാധ്യതയുണ്ടെന്നും ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു.
റോഡുകളിലെയും മറ്റും വെള്ളക്കെട്ടുകള്‍ നീക്കി ഗതാഗതം പുനസ്ഥാപിക്കുന്നതിനും പ്രളയത്തില്‍ കുടുങ്ങിയവരെ രക്ഷപ്പെടുത്തുന്നതിനുമായി സുരക്ഷാ സേനകള്‍ സജീവമായി രംഗത്തുണ്ട്. ശക്തമായ മഴ തുടരുന്ന ഷാര്‍ജയില്‍ രണ്ടു ദിവസമായി റോഡുകള്‍ വെള്ളത്തിനടിയിലാണ്. കഴിഞ്ഞ ഏതാനും ദിവസങ്ങളിലായി മഴ തിമിര്‍ത്തു പെയ്യുന്ന ഖോര്‍ഫുഖാനിലും സമാനമാണ് സ്ഥിതി.