പെരുന്നാളിന് മുന്നോടിയായി പുതിയ കൊവിഡ് നിയന്ത്രണങ്ങള്‍ ഏര്‍പ്പെടുത്തി യുഎഇ

ദുബായ്: പെരുന്നാള്‍ അവധി പ്രമാണിച്ച് പുതിയ കോവിഡ് നിയന്ത്രണങ്ങള്‍ പ്രഖ്യാപിച്ച് യുഎഇ. പെരുന്നാള്‍ ആഘോഷവേളകളില്‍ കോവിഡ് വ്യാപനത്തിനുള്ള സാധ്യത മുന്നില്‍ക്കണ്ടാണ് നാഷനല്‍ എമര്‍ജന്‍സി ക്രൈസിസ് ആന്റ് ഡിസാസ്റ്റര്‍ മാനേജ്‌മെന്റ് അതോറിറ്റി പുതിയ നിര്‍ദ്ദേശങ്ങളുമായി രംഗത്തെത്തിയിരിക്കുന്നത്. ആഘോഷങ്ങൾ സുരക്ഷിതമാക്കാൻ പെരുന്നാളിന് 72 മണിക്കൂർ മുമ്പ് പിസിആർ പരിശോധനക്ക് വിധേയമാകണമെന്ന് ദേശീയ ദുരന്തനിവാരണ സമിതി നിർദേശം നൽകി. കോവിഡ് ബാധയുള്ളവർ ആഘോഷ സ്ഥലങ്ങളിൽ എത്തുന്നില്ല എന്ന കാര്യം ഉറപ്പുവരുത്താൻ വേണ്ടിയാണിത്. ടെസ്റ്റ് നെഗറ്റീവായ ആളുകൾ മാത്രമേ ആഘോഷങ്ങളിൽ പങ്കെടുക്കാവൂ. പെരുന്നാൾ ദിവസം അയൽ വീടുകളിൽ ബലിമാംസവും സമ്മാനങ്ങളും എത്തിക്കാൻ സമിതി അനുമതി നൽകി. എന്നാൽ വൃത്തിയുള്ളതും അണുവിമുക്തമാക്കിയതുമായ ബാഗുകളിലോ ബോക്സുകളിലോ ആയിരിക്കണം ഇവ വിതരണം ചെയ്യേണ്ടതെന്നും സമിതി നിർദേശിച്ചു.

അതേപോലെ ബലിയറുക്കാൻ ലൈസൻസില്ലാത്ത തൊഴിലാളികളെ ചുമതലപ്പെടുത്തരുതെന്നും നിർദ്ദേശമുണ്ട്. ഇതിനായി അംഗീകൃത ചാരിറ്റി സംഘടനകളുടെ മൊബൈൽ ആപ്ലിക്കേഷൻ സംവിധാനം  ഉപയോഗപ്പെടുത്തണം. അറവുശാലകളിൽ ജനക്കൂട്ടം പാടില്ലെന്നും ഇക്കാര്യം ഉറപ്പുവരുത്താൻ പരിശോധന കർശനമാക്കുമെന്നും സമിതി അറിയിച്ചു. കൊവിഡ് വ്യാപന സാധ്യത പരമാവധി കുറയ്ക്കുകയെന്ന ലക്ഷ്യത്തോടെയാണ് നിർദ്ദേശങ്ങൾ.

ആഘോഷങ്ങളിൽ പരസ്പരം ഹസ്തദാനം ഒഴിവാക്കണം. കുട്ടികൾക്ക് പെരുന്നാൾ പണം നൽകുന്നതിന് ആപ്പുകളും മറ്റു ഓൺലൈൻ സംവിധാനങ്ങളും ഉപയോഗിക്കണം. ആഘോഷങ്ങൾ പരമാവധി സ്വന്തം കുടുംബത്തിനകത്ത് പരിമിതപ്പെടുത്താൻ ശ്രമിക്കണം. ബന്ധുക്കളെ സന്ദർശിക്കുമ്പോൾ മാസ്‌ക് ധരിക്കണം, സാമൂഹിക അകലം പാലിക്കണം. ഗൃഹസന്ദർശനങ്ങൾ കാരണം വീടുകളിലെ പ്രായമുള്ളവർക്കും കുട്ടികൾക്കും രോഗബാധ ഉണ്ടാവാനുള്ള സാധ്യത കണക്കിലെടുത്താണിത്.

ഹജ്ജ് തീർഥാടനം കഴിഞ്ഞ് രാജ്യത്തേക്ക് മടങ്ങിയെത്തുന്നവർ ഏഴു ദിവസം സ്വന്തം വീട്ടിൽ നിന്ന് പുറത്തിറങ്ങാതെ അകത്ത് ക്വാറന്റൈനിൽ കഴിയണമെന്ന് യുഎഇ സർക്കാർ നിർദേശിച്ചു. വീട്ടിലെത്തിയ ശേഷമുള്ള നാലാമത്തെ ദിവസമോ രോഗ ലക്ഷണം പ്രകമായാലോ കോവിഡ് പിസിആർ പരിശോധന നടത്തണം. പരിശോധനയിൽ ഫലം നെഗറ്റീവ് ആണെങ്കിൽ അൽ ഹുസ്ൻ അപ്പിൽ പച്ച തെളിയുമെന്ന് നാഷനൽ എമർജൻസി ക്രൈസിസ് ആന്റ് ഡിസാസ്റ്റർ മാനേജ്‌മെന്റ് അതോറിറ്റി വാർത്താക്കുറിപ്പിൽ അറിയിച്ചു. ഹജ്ജ് തീർഥാടനം കഴിഞ്ഞ് എത്തുന്നവർക്ക് വിമാനത്താവളത്തിൽ തന്നെ പിസിആർ ടെസ്റ്റിനുള്ള സൗകര്യം ഏർപ്പെടുത്തും. എന്നാൽ ഇത് എല്ലാവർക്കും നിർബന്ധമില്ല. അതേസമയം, യാത്രാ വേളയിൽ കോവിഡ് ലക്ഷണങ്ങൾ പ്രകടിപ്പിക്കുന്നവർക്ക് ഇത് നിർബന്ധമാണ്.