കുവൈറ്റ് സിറ്റി: കുവൈറ്റ് യൂനിവേഴ്‌സിറ്റിയില്‍ വിദേശ വിദ്യാര്‍ഥികള്‍ക്ക് പഠിക്കാന്‍ അവസരം ഒരുങ്ങുന്നു. യൂനിവേഴ്‌സിറ്റിയുടെ ചരിത്രത്തില്‍ ആദ്യമായാണ് ഇത്തരമൊരു തീരുമാനം വരുന്നത്. യൂനിവേഴ്‌സിറ്റിക്കു കീഴിലെ കോളേജ് ഓഫ് അഡ്മിനിസ്‌ട്രേറ്റീവ് സയന്‍സസ്, എഞ്ചിനീയറിംഗ് ആന്റ് പെട്രോളിയം എന്ന സ്ഥാപനത്തിലാണ് വിദേശവിദ്യാര്‍ഥികള്‍ക്ക് പഠിക്കാന്‍ അവസരം നല്‍കുക. ഇതുമായി ബന്ധപ്പെട്ട അംഗീകാരം കുവൈറ്റ് യൂനിവേഴ്‌സിറ്റി കൗണ്‍സില്‍ ഉടന്‍ നല്‍കുമെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഇതുമായി ബന്ധപ്പെട്ട് യൂനിവേഴ്‌സിറ്റിയിലെ പ്ലാനിംഗ് വിഭാഗം വൈസ് പ്രസിഡന്റ് സമര്‍പ്പിച്ച ശുപാര്‍ശയ്ക്കാണ് കൗണ്‍സില്‍ അംഗീകാരം നല്‍കുക.
ഓരോ വിഷയത്തിനും 100 ദിനാര്‍ ഫീസ് ഈടാക്കിയാണ് വിദേശ വിദ്യാര്‍ഥികള്‍ക്ക് അഡ്മിഷന്‍ നല്‍കുകയെന്നും ഉന്നത വൃത്തങ്ങളെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. ആദ്യ ഘട്ടത്തില്‍ കുവൈറ്റില്‍ താമസമാക്കിയ വിദേശ വിദ്യാര്‍ഥികള്‍ക്കാവും അവസരം നല്‍കുക. അടുത്ത ഘട്ടത്തില്‍ വിദേശത്തുള്ള വിദ്യാര്‍ഥികള്‍ക്കും അഡ്മിഷന്‍ നല്‍കുന്നതിനുള്ള നടപടികള്‍ സ്വീകരിക്കും.
2022-2023 അക്കാദമിക വര്‍ഷത്തിലേക്ക് സ്വദേശികളും വിദേശികളും ഉള്‍പ്പെടെ ആകെ 7953 വിദ്യാര്‍ഥികള്‍ക്ക് അഡ്മിഷന്‍ നല്‍കാനാണ് യൂനിവേഴ്‌സിറ്റി കൗണ്‍സില്‍ തീരുമാനം എടുത്തിരിക്കുന്നത്. ആദ്യ സെമസ്റ്ററിന് അപേക്ഷ നല്‍കിയ മുഴുവന്‍ വിദ്യാര്‍ഥികള്‍ക്കും അഡ്മിഷന്‍ നല്‍കണമെന്ന യൂനിവേഴ്‌സിറ്റി ഡീനിന്റെ ശുപാര്‍ശയുടെ അടിസ്ഥാനത്തിലാണിത്.
മെഡിസിന്‍ -165, ഡെന്റിസ്ട്രി- 60, ഫാര്‍മസി- 100, ആലീഡ് മെഡിക്കല്‍ സയന്‍സസ്- 310, പബ്ലിക് ഹെല്‍ത്ത്- 60, നിയമം- 450, ആര്‍ക്കിട്ടേക്ചര്‍- 150, സയന്‍സ്- 1253, എഞ്ചിനീയറിംഗ് ആന്റ് പെട്രോളിയം- 900, ലൈഫ് സയന്‍സസ്- 800, അഡ്മിനിസ്‌ട്രേറ്റീവ് സയന്‍സസ്- 950, ആര്‍ട്‌സ്- 1055, എഡ്യുക്കേഷന്‍- 950, സോഷ്യല്‍ സയന്‍സസ്- 500, ശരീഅ ആന്റ് ഇസ്ലാമിക് സ്റ്റഡീസ്- 250 എന്നിങ്ങനെയാണ് വിവിധ കോഴ്‌സുകളിലേക്ക് അഡ്മിഷന്‍ നല്‍കിയിരിക്കുന്നത്.
യൂനിവേഴ്‌സിറ്റിയില്‍ അഡ്മിഷന്‍ നല്‍കുന്നതിന് അഭിരുചി പരീക്ഷ പാസ്സായിരിക്കണമെന്ന നിബന്ധന ഒഴിവാക്കാനും യൂനിവേഴ്‌സിറ്റി കൗണ്‍സില്‍ തീരുമാനിച്ചതായി അധികൃതര്‍ അറിയിച്ചു.