വെള്ളരിക്കുണ്ട് : നിയന്ത്രണം വിട്ട് പിന്നോട്ട് നീങ്ങിയ കെഎസ്ആര്‍ടിസി
ബസിന്റെ അടിയിൽപ്പെട്ട് ബൈക്ക് യാത്രക്കാരനായ ടാപ്പിങ്‌ തൊഴിലാളിക്ക് ദാരുണാന്ത്യം. മലയോര ഹൈവേയിലെ കാറ്റാകവല മലയിലാണ് സംഭവം. ചിറ്റാരിക്കാൽ ഈട്ടിത്തട്ടിലെ കപ്പിലുമാക്കൽ ജോഷി (53) ആണ് മരിച്ചത്.
ശനിയാഴ്ച രാവിലെ 7.50നാണ് സംഭവം. മാലോത്തു നിന്ന് ചിറ്റാരിക്കാലിലേക്ക്‌ പോകുകയായിരുന്നു ബസ്. എതിരേവന്ന ബസിനെ കടന്ന്‌ ഇറക്കം ഇറങ്ങി പോകുകയായിരുന്ന ജോഷിയുടെമേൽ പിന്നോട്ട് വന്ന ബസ് ഇടിക്കുകയായിരുന്നു. മുപ്പത് മീറ്ററോളം പിന്നിലേക്ക് ഉരുണ്ട ബസ് ഇടതുവശത്തെ മൺതിട്ടയിൽ ഇടിച്ചാണ് നിന്നത്.
ബൈക്കും ജോഷിയും ബസിനടിയിൽപ്പെട്ടു. ജോഷിയുടെ ശരീരത്തിൽകൂടി ബസ് കയറിയിറങ്ങി. ബസ് ജീവനക്കാരും പരിസരത്തുണ്ടായിരുന്നവരും ശ്രമിച്ചെങ്കിലും ജോഷിയെ പുറത്തെടുക്കാനായില്ല. മണ്ണുമാന്തിയന്ത്രംകൊണ്ട് ബസ് ഉയർത്തിയാണ് മുക്കാൽമണിക്കൂറിനുശേഷം പുറത്തെടുത്തത്.