കൊളംബോ: സർക്കാർ വിരുദ്ധ സമരം അതിരൂക്ഷമായി നടക്കുന്ന ശ്രീലങ്കയിൽ അപ്രതീക്ഷിത സൈനിക നടപടി. നൂറു കണക്കിന് സൈനികർ എത്തി പ്രസിഡന്റിന്റെ കൊട്ടാരത്തിലുണ്ടായിരുന്ന പ്രക്ഷോഭകരുടെ ക്യാമ്പിൽ റെയ്ഡ് നടത്തുകയും പ്രതിഷേധക്കാരെ അടിച്ചോടിക്കുകയും ചെയ്തു.
ഇന്നലെ ശ്രീലങ്കയുടെ പുതിയ പ്രസിഡന്റായി റെനിൽ വിക്രമസിംഗെ അധികാരത്തിൽ എത്തിയതിന് പിന്നാലെയാണ് പുതിയ സൈനിക നടപടിയുണ്ടായിരിക്കുന്നത്. 225 അംഗ പാർലമെന്റിൽ 134 പേരുടെ പിന്തുണയോടെയാണ് വിക്രമസിംഗെ അധികാരത്തിലേക്ക് എത്തിയത്. ദിനേശ് ഗുണവർധനെ പ്രധാനമന്ത്രിയായി പ്രഖ്യാപിച്ചിട്ടുണ്ടെന്നാണ് റിപ്പോർട്ടുകൾ.
സർക്കാർ വിരുദ്ധ പ്രക്ഷോഭം നടത്തുന്നവരുടെ പ്രധാനക്യാമ്പുകളിൽ ശ്രീലങ്കൻ സേനയും പോലീസും ചേർന്ന് പരിശോധനകളും നടത്തിയതായും റിപ്പോർട്ടുകളുണ്ട്. രണ്ട് വിഭാഗം പ്രതിഷേധ സംഘാടകരാണ് ഇത് സംബന്ധിച്ച് ആരോപണങ്ങൾ ഉന്നയിച്ചിരിക്കുന്നത്. അന്താരാഷ്ട്ര വാർത്ത ഏജൻസിയായ എഎഫ്പിയാണ് ഇത് സംബന്ധിച്ച് വാർത്ത റിപ്പോർട്ട് ചെയ്തിരിക്കുന്നത്.
സായുദ്ധധാരികളായ സൈനികരും പോലീസ് ഉദ്യോഗസ്ഥരും ക്യാമ്പുകളിൽ കയറിച്ചെല്ലുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്. ഇന്നലെ രാത്രിയോടെ നിരവധി വരുന്ന കലപാധാരികൾ പ്രതിഷേധ പ്രകടനവുമായി രംഗത്തുവന്നിരുന്നു. ഈ സമയത്താണ് സൈന്യത്തിന്റെ അപ്രതീക്ഷിത നീക്കമുണ്ടായിരിക്കുന്നത്.
സൈന്യം പ്രസിഡന്റിന്റെ സെക്രട്ടേറിയറ്റിന് മുന്നിൽ തമ്പടിച്ചിരുന്ന പ്രക്ഷോഭകരെ അടിച്ചോടിക്കുകയും ചെയ്തു. സെക്രട്ടേറിയേറ്റിന് മുന്നിലുള്ള പ്രധാന റോഡിന്റെ ഇരുവശത്തും ഉണ്ടായിരുന്ന സമര പന്തലുകളുടെ നിരകൾ പൂർണ്ണമായും നീക്കം ചെയ്തു.
ക്യാമ്പുകൾ പോലീസിന്റെ നേതൃത്വത്തിലുള്ള സംഘം വളയുകയും തങ്ങളെ ആക്രമിച്ചതായും പ്രതിഷേധപ്രവർത്തകർ ആരോപിച്ചു. സംഭവത്തിൽ 50 പേർക്ക് സാരമായി പരിക്കേറ്റിട്ടുണ്ടെന്ന് സംഘാടകർ ആരോപിച്ചു. ഇവരേക്കൂടാതെ ചില മാധ്യമപ്രവർത്തകരേയും പോലീസ് ആക്രമിച്ചുവെന്നാണ് റിപ്പോർട്ട്. ഇവരേയെല്ലാം ആശുപത്രിയിൽ പ്രവേശിപ്പിച്ചിരിക്കുകയാണ്.
ജനങ്ങളുടെ പ്രക്ഷോഭത്തിന്റെ ഫലമായി ഗോതാഭയ രാജപക്സെ രാജ്യം വിടുകയായിരുന്നു. ഇതിനേത്തുടർന്നാണ് റെനിൽ വിക്രമസിംഗെ അധികാരത്തിൽ എത്തിയത്. വിക്രമസിംഗെയുടെ കാലാവധി രാജപക്സെയുടെ അവശേഷിക്കുന്ന 2024 നവംബർ വരെയാണുള്ളത്.
ഇടക്കാല പ്രസിഡന്റ് ആയി തെരഞ്ഞെടുക്കപ്പെട്ടതിന് പിന്നാലെ ശ്രീലങ്കയിൽ അടിയന്തിരാവസ്ഥ പ്രഖ്യാപിച്ചിരിക്കുകയാണ്. അടിയന്തിരാവസ്ഥാ നിയമങ്ങൾ അനുസരിച്ച് പ്രതിഷേധക്കാരെ അറസ്റ്റ് ചെയ്യാനും തടവിൽ വയ്ക്കാനും സൈന്യത്തിന് അനുമതി നൽകിയിട്ടുണ്ട്.
ഏഴ് പതിറ്റാണ്ടിനിടെ കണ്ട ഏറ്റവും മോശം സാമ്പത്തികാവസ്ഥയാണ് ശ്രീലങ്കയിൽ റിപ്പോർട്ട് ചെയ്തിരിക്കുന്നത്. ശ്രീലങ്കയുടെ പ്രസിഡന്റായി റെനിൽ വിക്രമസിംഗെ തെരഞ്ഞെടുക്കപ്പെട്ടതിൽ നിരാശരായി പ്രക്ഷോഭകർ നേരത്തെ രംഗത്തുവന്നിരുന്നു. രാജപക്സെ കുടുംബത്തിന്റെ അടുപ്പക്കാരനായ റെനിൽ അധികാരത്തിൽ തിരികെ എത്തിയതാണ് പ്രക്ഷോഭകരെ നിരാശയിലാക്കിയത്. അതേസമയം, താക്കോൽ സ്ഥാനത്തേക്ക് വീണ്ടും എത്തിയതോടെ രാജ്യം വീണ്ടും ജനകീയ പ്രക്ഷോഭങ്ങൾക്ക് വേദിയാകുമോ എന്നാണ് കണ്ടറിയേണ്ടത്.