പമ്പ, ശബരിമല ഉൾപ്പടെയുള്ള മേഖലകളിൽ കനത്ത മഴ പ്രവചിച്ചിരിക്കുന്നതിനാൽ കനത്ത ജാഗ്രതാ നിർദേശമാണ് നൽകിയിരിക്കുന്നത്. ശബരിമല തീർഥാടനത്തിന് കടുത്ത നിയന്ത്രണം ഏർപ്പെടുത്തിയിരിക്കുകയാണെന്ന് ജില്ലാ കളക്ടർ ഡോ. ദിവ്യ എസ് അയ്യർ അറിയിച്ചു. മൂന്ന് മണിക്ക് ശേഷം പമ്പയിൽ നിന്ന് സന്നിധാനത്തേക്ക് തീർഥാടകരെ കയറ്റി വിടില്ല. സന്നിധാനത്തുള്ളവർ ആറ് മണിക്ക് മുൻപായി മലയിറങ്ങി സുരക്ഷിത സ്ഥാനത്തേക്ക് മാറണമെന്നുമാണ് ജില്ലാ കളക്ടർ പുറപ്പെടുവിച്ചിരിക്കുന്ന ഉത്തരവ്.
നിലവിലുള്ള ചക്രവാതച്ചുഴി ഞായറാഴ്ചയോടെ ന്യൂനമർദ്ദമായേക്കുമെന്നും തിങ്കളാഴ്ച വരെ ശക്തമായ മഴയുണ്ടാകുമെന്നാണ് മുന്നറിയിപ്പ്. ബംഗാൾ ഉൾക്കടലിൽ ന്യൂനമർദ്ദത്തിന് സാധ്യതയുണ്ട്. പത്തനംതിട്ട ജില്ലയിലെ കക്കി, ആനത്തോട്, പമ്പ ഡാമുകളിലെ ജലനിരപ്പ് ഉയരുകയാണ്. അതെ സമയം, അപ്പർ കുട്ടനാട് മേഖലയിലെ വീടുകളിൽ വെള്ളം കയറുന്നത് ആശങ്കയുണ്ടാക്കുന്നുണ്ട്. തിരുവനന്തപുരം ജില്ലയിൽ മാത്രമാണ് ഇപ്പോൾ യെല്ലോ അലേർട്ട് ഉള്ളത്. അഞ്ച് ജില്ലകളിൽ ഓറഞ്ച് അലേർട്ടാണ് ഉള്ളത്. ഈ ജില്ലകളിൽ ഒറ്റപ്പെട്ട ശക്തമായ മഴക്ക് സാധ്യതയെന്നാണ് മുന്നറിയിപ്പ്. അപ്പർകുട്ടനാട്, പെരിങ്ങര, നെടുമ്പ്രം ഭാഗങ്ങളിലെ വീടുകളിൽ കയറുന്നുണ്ട്. കൂടാതെ റാന്നിയിലും വെള്ളക്കെട്ടുണ്ട്.