ന്യൂയോർക്ക്: വിമാനത്തിൽ ജീവനക്കാരനെ ആക്രമിക്കുകയും ബഹളമുണ്ടാക്കുകയും ചെയ്ത യുവാവ് അറസ്റ്റിൽ. മെക്സിക്കോയിലെ ലോസ് കാബോസിൽ നിന്ന് ലോസ് ആഞ്ചസലിലേക്ക് (Los Angeles) പറക്കുകയായിരുന്ന അമേരിക്കൻ എയർലൈൻസിൻ്റെ (American Airlines) വിമാനത്തിലാണ് അലക്‌സാണ്ടര്‍ ടുംഗ് ക്യൂ ലീ എന്ന യുവാവ് അതിക്രമം നടത്തിയത്. പോലീസിന് കൈമാറിയ യുവാവിനെ ആജീവനാന്ത വിലക്ക് ഏർപ്പെടുത്തി. ബുധനാഴ്ച അമേരിക്കൻ എയർലൈൻസിന്റെ 377 വിമാനത്തിലാണ് സംഭവം. വിമാനം പറന്നുയർന്ന് ഇരുപത് മിനിറ്റുകൾക്ക് ശേഷമാണ് മൂപ്പത്തിമൂന്നുകാരനായ യുവാവ് വിമാനത്തിൽ ജീവനക്കാരെ ആക്രമിച്ചതെന്ന് ന്യൂയോർക്ക് ടൈംസ് റിപ്പോർട്ട് ചെയ്തു. യാത്രക്കാരിലൊരാൾ വിമാനത്തിനുള്ളിൽ വെച്ച് പകർത്തിയ ദൃശ്യങ്ങൾ സമൂഹമാധ്യമങ്ങളിൽ വൈറലായി. ആവശ്യപ്പെട്ട പ്രകാരം ഭക്ഷണവും പാനീയങ്ങളും യുവാവിന് നൽകിയിരുന്നു. ഇതിനിടെ ഫ്ലൈറ്റ് അറ്റൻഡന്റിന്റെ തോളിൽ പിടിച്ച് കാപ്പി വേണമെന്ന് യുവാവ് ആവശ്യപ്പെട്ടു. തുടർന്ന് ഫസ്റ്റ് ക്ലാസ് ക്യാബിന് സമീപത്തെ സീറ്റിൽ പോയിരുന്നു. സ്വന്തം സീറ്റിലേക്ക് മടങ്ങാൻ ആവശ്യപ്പെട്ടതോടെ ഫ്ലൈറ്റ് അറ്റൻഡറോട് ഇയാൾ മോശമായി പെരുമാറി. വിവരം പൈലറ്റിനെ അറിയിക്കാനായി നടന്ന് നീങ്ങിയ ഫ്ലൈറ്റ് അറ്റൻഡറെ പിന്നിൽ കൂടിയെത്തിയ യുവാവ് ഇടിച്ചു വീഴുത്തുകയായിരുന്നു. യുവാവിൻ്റെ ഇടിയേറ്റ് വീണ ഫ്ലൈറ്റ് അറ്റൻഡർ വീഴുന്നത് പുറത്തുവന്ന ദൃശ്യങ്ങളിൽ വ്യക്തമാണ്. ഒരു എയർഹോസ്റ്റസാണ് ജീവനക്കാരനെ സഹായിച്ചത്. തുടർന്നും ബഹളം വെച്ച യുവാവിനെ മറ്റൊരു യാത്രക്കാരൻ തടഞ്ഞ് വെക്കുകയും വിമാനം ലോസ് ഏഞ്ചൽസ് വിമാനത്താവളത്തിൽ ലാൻഡ് ചെയ്തതിന് പിന്നാലെ പോലീസിന് കൈമാറുകയുമായിരുന്നു. ജീവനക്കാരെ മർദിച്ച കുറ്റമാണ് യുവാവിനെതിരെ ചുമത്തിയിരിക്കുന്നത്. ഇത് തെളിഞ്ഞാൽ 20 വർഷം വരെ തടവ് അനുഭവിക്കേണ്ടിവരും. കാലിഫോർണിയ സ്വദേശിയാണ് അലക്‌സാണ്ടര്‍ ടുംഗ് ക്യൂ ലീ എന്ന് പോലീസ് അറിയിച്ചു. സംഭവത്തിൽ എഫ്ബിഐ സത്യവാങ്മൂലം സമർപ്പിച്ചു. ജീവനക്കാർക്കെതിരെ ഉണ്ടാകുന്ന അതിക്രമം അംഗീകരിക്കാൻ കഴിയില്ലെന്ന് അമേരിക്കൻ എയർലൈൻസ് പ്രസ്താവനയിലൂടെ അറിയിച്ചു. ജീവനക്കാരനെ ആക്രമിച്ച യുവാവിനെ തങ്ങളുടെ വിമാനത്തിൽ യാത്ര ചെയ്യാൻ ഇനി അനുവദിക്കില്ലെന്നും കമ്പനി അറിയിച്ചു.