കൊല്ലം: കേരളത്തിൽ നിന്നും സ്ഫോടക വസ്തുക്കളുമായുള്ള സംഘം തമിഴ്നാട്ടിലേക്ക് കടക്കുന്നുവെന്ന വിവരത്തിൻ്റെ അടിസ്ഥാനത്തി അതിർത്തിയിൽ പരിശോധന നടത്തി തമിഴ്നാട്. ചെക്ക് പോസ്റ്റുകൾ കേന്ദ്രീകരിച്ചാണ് പരിശോധന നടത്തുന്നത്. തമിഴ്നാട് പോലീസിൻ്റെ നക്സൽ ഡിവിഷൻ്റെ നേതൃത്വത്തിലാണ് പരിശോധന. കമാൻഡോ വിഭാഗവും പരിശോധനയിൽ പങ്കെടുത്തു. കേരളത്തിൽ നിന്നും നക്സലൈറ്റുകളടക്കം നിരോധിത സംഘടനകൾ ആയുധങ്ങളുമായി അതിർത്തിയോട് ചേർന്ന വനപ്രദേശത്ത് എത്താനിടയുണ്ടെന്ന റിപ്പോർട്ടുകളെ തുടർന്നാണ് തമിഴ്നാട് കമാൻഡോ വിഭാഗം പരിശോധന നടത്തിയത്. വാഹനങ്ങളിൽ ആയുധങ്ങളും സ്ഫോടക വസ്തുക്കളും കടത്തുന്നുണ്ടേന്നും തമിഴ്നാട് രഹസ്യാന്വേഷണ വിഭാഗത്തിന് വിവരം ലഭിച്ചിരുന്നു. കേരളത്തിൽ നിന്നും തമിഴ്നാട്ടിലേക്ക് പോകുന്ന വാഹനങ്ങൾ കൊല്ലം ജില്ലയുടെ അതിർത്തിയായ പുളിയറയിലും മേക്കരയിലും തടഞ്ഞ് പരിശോധിക്കുന്നുണ്ട്. മറ്റ് ചെക് പോസ്റ്റുകളിലും പരിശോധന ആരംഭിച്ചിട്ടുണ്ട്. തമിഴ്നാട്ടിലേക്ക് പോകുന്ന ചരക്ക് വാഹനങ്ങളടക്കം കർശനമായി പരിശോധിക്കുന്നുണ്ട്. ചെങ്കോട്ട ഭാഗത്ത് തെങ്കാശി എസ്പിയുടെ പ്രത്യേക സ്ക്വാഡിലുള്ള പത്തംഗ സായുധ സംഘമാണ് പരിശോധനക്ക് നേതൃത്വം നൽകുന്നത്. കഴിഞ്ഞ ദിവസം നടന്ന പോപ്പുലർ ഫ്രണ്ട് ഹർത്താലിലെ അക്രമ സംഭങ്ങളിൽ സംസ്ഥാനത്ത് നിരവധി പേർ പിടിയിലായ പശ്ചാത്തലത്തിൽ കൂടിയാണ് പരിശോനയെന്ന് തമിഴ്നാട് പോലീസ് വ്യക്തമാക്കി.