പത്തനംതിട്ട: പുനർവിവാഹ പരസ്യം നൽകിയയാളെ ഫോണിലൂടെ പരിചയപ്പെട്ട്, പ്രലോഭിപ്പിച്ച് ലക്ഷങ്ങൾ തട്ടിയെടുത്ത യുവതിയെ പോലീസ് പിടികൂടി. കുറ്റിപ്പുറത്ത് വാടകയ്ക്ക് താമസിക്കുന്ന വിജയന്‍റെ മകൾ ആര്യ വി (36) ആണ് കോയിപ്രം പോലീസിന്‍റെ പിടിയിലായത്. ആലപ്പുഴ കൃഷ്ണപുരം സ്വദേശിനിയാണ് യുവതി. സഹോദരിയ്ക്ക് വിവാഹത്തിന് താൽപ്പര്യമുണ്ടെന്ന് പറഞ്ഞ് ബന്ധപ്പെട്ടാണ് യുവതി പണം തട്ടിയതെന്നാണ് പരാതി. കോയിപ്രം കടപ്ര സ്വദേശിയായ അജിത്ത് എന്ന നൽകിയ പുനർവിവാഹ പരസ്യം കണ്ട് 2020 മെയ് മാസത്തിലാണ് ആര്യ ഇയാളെ ബന്ധപ്പെടുന്നത്. രണ്ട് മൊബൈൽ ഫോണുകളിൽ നിന്നും നിരന്തരം അജിത്തുമായി ബന്ധപ്പെട്ട ഇവർ തന്‍റെ സഹോദരിക്ക് വിവാഹം കഴിക്കാൻ താൽപ്പര്യമുണ്ടെന്ന് അറിയിക്കുകയായിരുന്നു. ഇക്കാര്യം പറഞ്ഞ് വിശ്വസിപ്പിച്ച് തന്നിൽ നിന്ന് പണം തട്ടുകയായിരുന്നെന്നാണ് യുവാവിന്‍റെ പരാതി. മേയ് 17 മുതൽ ഡിസംബർ 22 വരെയുള്ള കാലയളവിൽ അമ്മയുടെ ചികിത്സയ്ക്കെന്നു പറഞ്ഞു പലതവണയായി 4,15,500 രൂപ ബാങ്ക് ഇടപാടിലൂടെ തട്ടിയെടുത്തു എന്നാണ് കേസ്. കറ്റാനം സൗത്ത് ഇന്ത്യൻ ബാങ്ക് അക്കൗണ്ടിലേക്കാണ് തുക കൈമാറ്റം ചെയ്തെടുത്തത്. ഇതിന് പുറമെ 22,180 രൂപ വിലയുള്ള ഓപ്പോ കമ്പനിയുടെ പുതിയ മൊബൈൽ ഫോണും യുവതി കൈക്കലാക്കി. ചതിക്കപ്പെട്ടെന്ന് മനസിലാക്കിയ അജിത് ഈ വർഷം ജനുവരി ഒന്നിനാണ് പത്തനംതിട്ട ഡിവൈഎസ്പിയ്ക്ക് പരാതി നൽകിയത്. പരാതിയെ തുടർന്ന് കോയിപ്രം എസ്ഐ രാകേഷ് കുമാർ, കേസെടുത്ത് വിശദമായ അന്വേഷണം നടത്തിയാണ് ആര്യയെ പിടികൂടിയത്. മൊബൈൽ ഫോൺ കോളുകൾ സംബന്ധിച്ച വിവരങ്ങൾ ജില്ലാ പോലീസ് സൈബർ സെല്ലിന്‍റെ സഹായത്തോടെ അന്വേഷണസംഘം ശേഖരിച്ചു. പണം ഇടപാട് സംബന്ധിച്ച രേഖകളും കണ്ടെടുത്തു. പ്രതി ആവശ്യപ്പെട്ടതനുസരിച്ച് വാങ്ങിക്കൊടുത്ത മൊബൈൽ ഫോൺ വാങ്ങിയ തിരുവല്ലയിലെ മൊബൈൽ കടയിലും, ഫോൺ കൊടുക്കാൻ ഏൽപ്പിച്ച കായംകുളത്തെ ബേക്കറി ഉടമയെ കണ്ടും അന്വേഷണം നടത്തി. തുടർന്ന് നടന്ന അന്വേഷണത്തിൽ പ്രതിക്ക് സഹോദരിയില്ലെന്നും, ഇല്ലാത്ത സഹോദരിയുടെ പേരുപറഞ്ഞു വിവാഹത്തിന് താൽപ്പര്യമുണ്ടെന്ന് അറിയിച്ച് യുവാവിനെ കബളിപ്പിക്കുകയായിരുന്നെന്നും തെളിഞ്ഞു. പിന്നീട്, യുവതിയുടെ ഫോൺ ലൊക്കേഷൻ അന്വേഷിച്ചുകൊണ്ടിരിക്കുകയായിരുന്നു പോലീസ്. ഇതിനിടെയാണ് ഇവർ പാലക്കാട് കിഴക്കൻചേരിയിൽ ഉണ്ടെന്ന വിവരം ലഭിച്ചത്. തുടർന്ന് നടത്തിയ നീക്കത്തിലാണ് പ്രതി കുടുങ്ങിയത്. വിശദമായ ചോദ്യം ചെയ്യലിൽ യുവതി കുറ്റം സമ്മതിച്ചു. പ്രതിയുടെ കയ്യിൽ നിന്നും പിടിച്ചെടുത്ത ഫോൺ, യുവാവിൽ നിന്നും തട്ടിപ്പ് നടത്തി ലഭ്യമാക്കിയതാണെന്ന് വ്യക്തമായി. സമാന രീതിയിലുള്ള കുറ്റകൃത്യം പ്രതി നടത്തിയിട്ടുണ്ടോ എന്നതും, പണത്തിന്‍റെ ക്രയവിക്രയം സംബന്ധിച്ചും, കൂടുതൽ പ്രതികളുണ്ടോ എന്നതിനെപ്പറ്റിയും വിശദമായ അന്വേഷണം നടക്കുകയാണ്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.