കണ്ണൂര്‍: '14 വര്‍ഷം ശിക്ഷയല്ലേ, 39 ആകുമ്പോഴേക്കും പുറത്തിറങ്ങും, ശിക്ഷയൊക്കെ ഞാന്‍ ഗൂഗിളില്‍ നോക്കി മനസിലാക്കിയിട്ടുണ്ട്', ചോദ്യം ചെയ്യുന്നതിനിടെ ഒരു കൂസലുമില്ലാതെ ശ്യാംജിത്ത് പോലീസിനോട് പറഞ്ഞതാണിത്. പ്രണയം അവസാനിപ്പിച്ചതിനുള്ള പകയാണ് പാനൂര്‍ നഗരസഭയ്ക്കടുത്തെ മൊകേരി പഞ്ചായത്തിലെ വള്ള്യായിയില്‍ വിഷ്ണുപ്രിയയെ (23) കൊലപ്പെടുത്താനുള്ള കാരണം. മൂന്നുദിവസമായി കൊലപാതകത്തിനുള്ള ആസൂത്രണത്തിലായിരുന്നു പ്രതിയായ മാനന്തേരി സ്വദേശി ശ്യാംജിത്ത് (25). കൊലപാതകം നടത്തിയതിനു ശേഷം വീടിനു സമീപത്തെ കുളത്തില്‍ നിന്നാണ് കുളിച്ച് വൃത്തിയായത്. അങ്ങാടിക്കുള്ളത്തില്‍ ആയുധം ഉപേക്ഷിച്ചു. വീടിനകത്തെ കിടപ്പുമുറിയില്‍ താന്‍ വിഷ്ണുപ്രിയയെ കഴുത്തറുത്തു കൊലപ്പെടുത്തിയത് ചുറ്റികയ്ക്ക് അടിച്ചുവീഴ്ത്തിയ ശേഷമാണെന്ന് ശ്യാംജിത്ത് മൊഴി നല്‍കിയിരുന്നു. തലയ്ക്ക് ചുറ്റിക കൊണ്ട് അടിച്ച് ബോധരഹിതയായപ്പോള്‍ വിഷ്ണുപ്രിയയെ കഴുത്തറുത്ത് കൊലപ്പെടുത്തുകയായിരുന്നു പ്രതി പോലീസിനോടു പറഞ്ഞു. കൊലപ്പെടുത്തണം എന്ന ഉദ്ധേശ്യത്തോടെ ആയിരുന്നു പ്രതി പെണ്‍കുട്ടിയുടെ വീട്ടിലേക്ക് എത്തിയത്. വീടിന്റെ പിന്‍വശത്തെ ഗ്രില്‍ തുറന്നാണ് അകത്ത് കയറിയതെന്നും പ്രതി മൊഴി നല്‍കി. അഞ്ച് വര്‍ഷമായി വിഷ്ണുപ്രിയയുമായി പ്രണയത്തിലായിരുന്നുവെന്ന് ശ്യാംജിത്ത് പറഞ്ഞു. എന്നാല്‍ ആറു മാസം മുമ്പ് വിഷ്ണുപ്രിയ അകന്നു, മറ്റൊരാളുമായി അടുപ്പത്തിലായിരുന്നു. ഇതിലുള്ള പ്രതികാരമാണ് കൊലപാതകത്തിലേക്ക് നയിച്ചതെന്നും ശ്യാംജിത്ത് മൊഴി നല്‍കി. വിഷ്ണുപ്രിയയെ കൊന്നത് ആസൂത്രിതവും മൃഗീയവുമായാണെന്ന് പോലീസിന്റെ പ്രാഥമിക അന്വേഷണ റിപ്പോര്‍ട്ട്. വിഷ്ണുപ്രിയയുടെ ശരീരത്തില്‍ ആഴത്തിലുള്ള 18 മുറിവുകളുണ്ടെന്നാണ് ഇന്‍ക്വസ്റ്റ് റിപ്പോര്‍ട്ട്. കൈയിലും കഴുത്തിലും കാലിലും വെട്ടേറ്റെന്ന് ഇന്‍ക്വസ്റ്റ് റിപ്പോര്‍ട്ടില്‍ പറയുന്നു. കൂത്തുപറമ്പിലെ ഒരു കടയില്‍ നിന്ന് വാങ്ങിയ ചുറ്റികയുമായാണ് വിഷ്ണുപ്രിയയുടെ വീട്ടില്‍ എത്തിയതെന്നും വെട്ടുകത്തിയും ചുറ്റികയും കയറും ഉപയോഗിച്ചാണ് കൊല നടത്തിയതെന്നും പ്രതി ശ്യാംജിത്ത് മൊഴി നല്‍കി. നാല് മാസമായി പാനൂര്‍ നൂക്ലിയസ് ആശുപത്രിയിലെ ഫാര്‍മസി ജീവനക്കാരിയായിരുന്നു വിഷ്ണുപ്രിയ. ഖത്തറില്‍ പ്രവാസിയായ വിനോദ്-ബിന്ദു ദമ്പതികളുടെ മകളാണ്. പിതാവ് വിനോദിന്റെ അമ്മ മരണപ്പെട്ടതിന്റെ അഞ്ചാം ദിവസം മരണാനന്തര ചടങ്ങുകള്‍ നടക്കുന്നതിനാല്‍ വിഷ്ണുപ്രിയ തൊട്ടടുത്ത തറവാട്ടു വീട്ടില്‍ നിന്നും സ്വന്തം വീട്ടിലേക്ക് വസ്ത്രം വന്നതിനു ശേഷം അരമണിക്കൂര്‍ കഴിഞ്ഞാണ് കൊലപാതകം നടക്കുന്നത്. ശ്യാംജിത്തിന്റെ സഹോദരിയും വിഷ്ണുപ്രിയയും സഹപാഠികളായിരുന്നു. സഹോദരിമുഖേനെയുള്ള പരിചയമാണ് കഴിഞ്ഞ അഞ്ചുവര്‍ഷക്കാലം വിഷ്ണുപ്രിയയുമായുള്ള പ്രണയത്തിലെത്തിയത്. എന്നാല്‍ കഴിഞ്ഞ കുറച്ചുമാസങ്ങളായി വിഷ്ണുപ്രിയ തന്നില്‍ നിന്നും അകലുന്നുവെന്ന തോന്നല്‍ ശ്യാംജിത്തിനുണ്ടായിരുന്നു. ഇതാണ് ഈയാളെ പ്രകോപിതനാക്കിയത്. വിഷ്ണുപ്രിയയുടെ പിതാവ് വിനോദ് 10 ദിവസം മുന്‍പാണ് നാട്ടില്‍ വന്നു പോയത്.