ദോഹ: ഖത്തറില്‍ ഇന്നു മുതല്‍ മഴക്കാലം. ഇന്നലെ രാജ്യത്തെ വിവിധ പ്രദേശങ്ങളില്‍ മഴ പെയ്തു. പ്രാദേശികമായി അല്‍ വാസ്മി എന്ന് അറിയപ്പെടുന്ന മഴക്കാലം 52 ദിവസം നീളും. അല്‍ വാസ്മിയുടെ പ്രാരംഭത്തില്‍ മഴ പെയ്യുന്നത് വരും ദിവസങ്ങളില്‍ നല്ല മഴയുടെ സൂചനയാണെന്നാണ് വിലയിരുത്തല്‍. ഇന്ന് മുതല്‍ ഡിസംബര്‍ 6 വരെയാണ് അല്‍ അല്‍ വാസ്മിക്കാലം. ഈ സമയത്ത് പടിഞ്ഞാറ് നിന്ന് കിഴക്കോട്ട് ആയിരിക്കും മേഘത്തിന്റെ സഞ്ചാരം. പകല്‍ സമയം ചൂടും രാത്രി മിതമായ കാലാവസ്ഥയുമുണ്ടാകും. വരണ്ട വടക്കുപടിഞ്ഞാറന്‍ കാറ്റും രൂപപ്പെടും. അല്‍ വാസ്മിക്കാലം വിവിധതരം പ്രാദേശിക ചെടികളുടെ വളര്‍ച്ചയ്ക്ക് ഏറ്റവും അധികം ഗുണകരമാണ്. ശനിയാഴ്ച രാജ്യത്തിന്റെ വടക്കന്‍ പ്രദേശങ്ങളില്‍ മഴ പെയ്തു. ചിലയിടങ്ങളില്‍ ഇടിയോടു കൂടിയ മഴയാണ് രേഖപ്പെടുത്തിയത്. ഇടിയും മഴയും മിന്നലും ഉള്ളപ്പോള്‍ പൊതുജനങ്ങള്‍ ജാഗ്രത പാലിക്കണമെന്ന് കാലാവസ്ഥ വകുപ്പ് നിര്‍ദേശിച്ചു. ഇടിമിന്നലുള്ള സമയത്ത് വീടിന് പുറത്താണെങ്കില്‍ സുരക്ഷിതമായ സ്ഥലത്തേക്ക് മാറി നില്‍ക്കണം. തുറസ്സായ സ്ഥലങ്ങളിലും മരങ്ങളുടെയും വൈദ്യുത തൂണുകളുടെയും താഴെയും വീടിന്റെയും കെട്ടിടങ്ങളുടെയും ടെറസുകളിലും നില്‍ക്കരുത്. മോശം കാലാവസ്ഥയുള്ള സമയത്ത് വാഹനം ഓടിക്കുന്നവര്‍ അമിത വേഗവും ഡ്രൈവിങ്ങിനിടെയുള്ള മൊബൈല്‍ ഫോണ്‍ ഉപയോഗവും ഒഴിവാക്കണം. വൈപ്പറുകള്‍ പ്രവര്‍ത്തനക്ഷമമായിരിക്കണം. കാറിന്റെ ജനലുകള്‍ അടച്ചെന്നും ഉറപ്പാക്കണം. വെള്ളക്കെട്ടുള്ള സ്ഥലങ്ങളിലൂടെ വാഹനം ഓടിക്കരുത്. വീട്ടിനകത്തും ജാഗ്രത വേണം. നനഞ്ഞ കൈ കൊണ്ട് സ്വിച്ച് ബോര്‍ഡുകളില്‍ സ്പര്‍ശിക്കരുത്. ഇടിമിന്നലുള്ളപ്പോള്‍ വീട്ടിനുള്ളിലെ വൈദ്യുത ഉപകരണങ്ങളുടെ പവര്‍ സപ്ലൈ ഓഫ് ചെയ്യണമെന്നും അധികൃതര്‍ നിര്‍ദേശത്തില്‍ പറയുന്നു. അടിയന്തര ഘട്ടത്തില്‍ സഹായത്തിനായി 999 എന്ന നമ്പറില്‍ സേവനം നേടാം.