തിരുവനന്തപുരം: വിഴിഞ്ഞം തുറമുഖ നിര്‍മ്മാണത്തിനെതിരായ സമരം ശക്തമാക്കുന്നതിന്റെ ഭാഗമായി ലത്തീന്‍ അതിരൂപതയുടെ നേതൃത്വത്തില്‍ റോഡ് ഉപരോധിച്ച് മത്സ്യത്തൊഴിലാളികള്‍. തിരുവനന്തപുരത്ത് 6 കേന്ദ്രങ്ങളിലായി വള്ളങ്ങള്‍ അടക്കം റോഡിലിറക്കിയാണ് സമരം. ആറ്റിങ്ങല്‍, പൂവാര്‍, വിഴിഞ്ഞം, ചാക്ക, സ്റ്റേഷന്‍കടവ്, ഉച്ചക്കട എന്നീ കേന്ദ്രങ്ങളിലാണ് റോഡ് ഉപരോധിച്ച് സമരം നടക്കുന്നത്. തിരുവനന്തപുരം വിമാനത്താവളത്തിലേയ്ക്കുള്ള ചാക്ക ബൈപാസിന്റെ താഴെയും മുകളിലുമുള്ള റോഡ് പൂര്‍ണമായും ഉപരോധിച്ചു. നഗരത്തിലെ റോഡ് ഉപരോധത്തെ തുടർന്ന് വിമാനത്താവളത്തിലേക്കുള്ള വഴികളെല്ലാം അടഞ്ഞു. വിമാനത്താവളത്തിലേക്ക് പോയ യാത്രക്കാരിൽ പലർക്കും വിമാനം നഷ്ടമായി. ചാക്ക, ഈഞ്ചക്കൽ ഉൾപ്പെടെയുള്ള ജങ്ഷനുകളിൽ പോലീസ് യാത്രക്കാരെ വഴിതിരിച്ചുവിടുകയാണ്. ഏത് വഴി വിമാനത്താവളത്തിലേക്ക് പോകണമെന്ന് നിർദ്ദേശിച്ചിരുന്നില്ല. മത്സ്യത്തൊഴിലാളികള്‍ നടത്താനിരുന്ന റോഡ് ഉപരോധത്തിന് കളക്ടര്‍ രണ്ടിടങ്ങളില്‍ നിരോധനം ഏര്‍പ്പെടുത്തിയിരുന്നു. ഇത് ലംഘിച്ചും റോഡ് ഉപരോധം തുടരുകയാണ്. വിഴിഞ്ഞം ജങ്ഷൻ, മുല്ലൂര്‍ എന്നിവിടങ്ങളിലാണ് റോഡ് ഉപരോധം നിരോധിച്ച് കലക്ടര്‍ ഇന്നലെ ഉത്തരവിറക്കിയത്. രണ്ടിടങ്ങളിലും മുദ്രാവാക്യം വിളിയും നിരോധിച്ചിട്ടുണ്ട്. അതിരൂപതയുടെ സമരവും ഇതിനെതിരായ ജനകീയ കൂട്ടായ്മയുടെ പ്രതിഷേധവും സ്ഥലത്ത് ക്രമസമാധാന പ്രശ്നങ്ങള്‍ക്ക് കാരണമാകും എന്നുള്ള റിപ്പോര്‍ട്ട് കണക്കിലെടുത്താണ് നിരോധനമെന്നും കലക്ടര്‍ ജെറോമിക് ജോര്‍ജിന്റെ ഉത്തരവില്‍ പറയുന്നു. മറ്റൊരു മാര്‍ഗവും ഇല്ലാത്തതിനാലാണ് സമരരീതി മാറ്റിയതെന്ന് സമരസമിതി കണ്‍വീനര്‍ ഫാ.യൂജിന്‍ പെരേര പറഞ്ഞു. കഴിഞ്ഞ 85 ദിവസമായി സമരം തുടര്‍ന്നിട്ടും മത്സ്യത്തൊഴിലാളികളോട് നിഷേധാത്മക സമീപനമാണ് സര്‍ക്കാര്‍ സ്വീകരിച്ചത്. ക്യാമ്പുകളില്‍ കഴിയുന്ന ആളുകളെ പുനരധിവസിപ്പാന്‍ 5500 രൂപ സര്‍ക്കാര്‍ ഏകപക്ഷീയമായാണ് പ്രഖ്യാപിച്ചത്. ഇത് മതിയായ തുകയല്ലെന്ന പരാതി അറിയിച്ചിട്ടും നടപടിയുണ്ടായില്ല. ഇവരെ ശാശ്വതമായി പുനരധിവസിപ്പിക്കാനുള്ള ഒരു നടപടിയും സര്‍ക്കാരിന്റെ ഭാഗത്തുനിന്ന് ഉണ്ടായില്ലെന്നും അദ്ദേഹം പറഞ്ഞു. സമരത്തിന്റെ ഭാഗമായി പതിനൊന്ന് മണിക്ക് മത്സ്യത്തൊഴിലാളികള്‍ സെക്രട്ടറിയേറ്റ് മാര്‍ച്ച് നടത്തും. സമരം ഇന്ന് 62- ാം ദിനത്തിലേക്ക് കടക്കുമ്പോഴാണ് പ്രക്ഷോഭ പരിപാടികള്‍ ശക്തിപ്പെടുത്തിയിരിക്കുന്നത്. അതേസമയം, വിഴിഞ്ഞം തുറമുഖ വിഷയത്തില്‍ മത്സ്യത്തൊഴിലാളികള്‍ മുന്നോട്ടു വച്ച ആവശ്യങ്ങള്‍ക്കു പരിഹാരം കാണുന്നതിനു പകരം ധാര്‍ഷ്ട്യ മനോഭാവമാണു സര്‍ക്കാരിനെന്നും സമരം കൂടുതല്‍ ശക്തമാക്കുമെന്നും തിരുവനന്തപുരം ലത്തീന്‍ അതിരൂപതയുടെ സര്‍ക്കുലറിൽ പറയുന്നു. സര്‍ക്കാരിന്റേത് ഏകപക്ഷീയ നിലപാടുകളാണെന്നും സമരസമിതി മുന്നോട്ടു വച്ച 7 ആവശ്യങ്ങളില്‍ ഒന്നു പോലും അംഗീകരിച്ചില്ലെന്നും അതിരൂപതയ്ക്കു കീഴിലുള്ള പള്ളികളില്‍ കുര്‍ബാന മധ്യേ ഇന്നലെ വായിച്ച സര്‍ക്കുലറില്‍ പറയുന്നു. ഇന്നത്തെ പ്രതിഷേധ പരിപാടികള്‍ വിജയിപ്പിക്കണമെന്നും ആര്‍ച്ച് ബിഷപ് ഡോ. തോമസ് ജെ. നെറ്റോ സര്‍ക്കുലറില്‍ ആവശ്യപ്പെട്ടു.തുറമുഖ കവാടത്തിലെ സമരം തുടങ്ങിയ ശേഷം ഇത് അഞ്ചാം തവണയാണ് തിരുവനന്തപുരം അതിരൂപതയ്ക്കു കീഴിലുള്ള പള്ളികളില്‍ സര്‍ക്കുലര്‍ വായിക്കുന്നത്. തുറമുഖ നിര്‍മാണം മൂലമുള്ള സാമൂഹികാഘാതങ്ങള്‍ പഠിക്കാന്‍ സമരസമിതിയുടെ നേതൃത്വത്തില്‍ രൂപീകരിക്കുന്ന ജനകീയ കമ്മിഷനുമായി സഹകരിക്കണമെന്നും ഇതില്‍ നിര്‍ദേശിച്ചു. തുറമുഖ കവാടത്തിലെ സമരം തുടങ്ങിയതിനു ശേഷം ഇത് അഞ്ചാം തവണയാണ് തിരുവനന്തപുരം ലത്തീന്‍ അതിരൂപതക്ക് കീഴിലെ പള്ളികളില്‍ സര്‍ക്കുലര്‍ വായിക്കുന്നത്.