കൊല്ലം: കുണ്ടറ കൊളശ്ശേരിയില്‍ പോലീസ് മര്‍ദ്ദനമേറ്റ സംഭവത്തില്‍ പരാതി നൽകിയിട്ടും നീതി ലഭിക്കുന്നില്ലെന്ന് സൈനികന്‍. മുഖ്യമന്ത്രിക്കും, പോലീസ് അധികാരികള്‍ക്കും പരാതി നല്‍കിയിട്ടും നീതി ലഭിക്കുന്നില്ലെന്ന പരാതിയുമായി കുണ്ടറ മാമൂട് സ്വദേശിയും നായ്ക് റാങ്കില്‍ സേവനം ചെയ്യുന്ന സൈനികനുമായ ബിനുവാണ് രംഗത്ത് വന്നിരിക്കുന്നത്. ജനുവരിയില്‍ അവധിക്ക് നാട്ടിലെത്തിയപ്പോൾ പോലീസ് അകാരണമായി മര്‍ദ്ദിച്ചെന്നാണ് ബിനുവിന്‍റെ പരാതി. കുണ്ടറ പോലീസ് സ്റ്റേഷനിലെ ഗ്രേഡ് എസ്‌.ഐ ആയിരുന്ന ബാബു കുറുപ്പ്, സഹായി അജിത് കുമാര്‍ എന്നിവര്‍ക്കെതിരെയാണ് പരാതി നല്‍കിയിരിക്കുന്നത്. വീടിനു സമീപത്തുവച്ചു കാരണം കൂടാതെ മര്‍ദ്ദിക്കുകയും താനൊരു സൈനികനാണെന്ന് പറഞ്ഞതോടെ മൃഗീയമായി മര്‍ദ്ദിക്കുകയായിരുന്നു എന്ന് സൈനികന്‍റെ പരാതിയില്‍ പറയുന്നു. മുന്‍പ് വാഹന ചെക്കിങ്ങിലുണ്ടായ വ്യക്തിവിരോധമാണ് പോലീസ് തനിക്കെതിരെ കള്ളക്കേസ് എടുത്തതെന്നും, ജാതിപ്പേര് വിളിച്ചു അധിക്ഷേപിച്ചതെന്നും ബിനു പറയുന്നു. കസ്റ്റഡിയിലെടുത്ത സമയം പോലീസ് വയര്‍ലെസ്സ് സെറ്റിന് കേടുപാടുകള്‍ വരുത്തിയെന്ന പോലീസ് റിപ്പോര്‍ട്ടില്‍ 17 ദിവസം ജയിലില്‍ കിടക്കേണ്ടിവന്നതായും സൈനികന്‍ പറയുന്നു. പട്ടികജാതി വിഭാഗത്തിലുള്ള കുടംബത്തിലെ സൈനികനായ ബിജുവിന്റെ ജോലി നഷ്ടപെടുത്തുമെന്ന് പോലീസ് പറഞ്ഞതായും അമ്മയും പറഞ്ഞു. നടപടി ആവശ്യപ്പെട്ട് സൈനികന്‍ അധികൃതര്‍ക്ക് പരാതി നൽകിയിട്ടുണ്ട്. എന്നാല്‍ സൈനികന്‍ ബിനുവിനെ മര്‍ദ്ദിച്ചില്ലെന്നാണ് പോലീസിന്‍റെ വിശദീകരണം. കിളികൊല്ലൂര്‍ പോലീസ് സ്റ്റേഷനില്‍ സൈനികനേയും സഹോദരനെയും പോലീസ് മര്‍ദ്ദിച്ച സംഭവത്തിന് പിന്നാലെയാണ് ജില്ലയില്‍ മറ്റൊരു സൈനികനും കുണ്ടറ പോലീസില്‍നിന്ന് ദുരനുഭവം ഉണ്ടായതായ പരാതി ഉയര്‍ന്നിരിക്കുന്നത്.