തൃശൂർ : സാംസ്കാരിക നഗരിക്ക് നൃത്തത്തിന്‍റെയും സംഗീതത്തിന്‍റെയും അഴകും, മിഴിവും നല്‍കുന്ന സൂര്യകാന്തി
ഫെസ്റ്റിവല്‍ 2022 ന് തിരിതെളിഞ്ഞു.
.
കേരള സംഗീത നാടക അക്കാദമിയുടെ റീജണൽ തിയറ്ററിൽ ആരംഭിച്ച ഫെസ്റ്റിവൽ 22 നു വൈകിട്ടു നടക്കുന്ന സാംസ്കാരിക സമ്മേളനത്തോടെ സമാപിക്കും .
ക്ലാസിക്കൽ കലകളുടെ പരിപോഷണത്തിനു വേണ്ടി കഴിഞ്ഞ 10 വർഷങ്ങളായി തൃശ്ശൂർ ആസ്ഥാനമായി പ്രവർത്തിക്കുന്ന സൂര്യകാന്തി സംഗീത നൃത്ത സഭയാണ് ഫെസ്റ്റിവൽ സംഘടിപ്പിക്കുന്നത്. അവതരണങ്ങളുടെ പുതുമകൊണ്ടും സംഘാടനത്തിന്റെ മികവുകൊണ്ടും തൃശ്ശൂരിലെ ഏറ്റവും വലിയ കലാമാമാങ്കമായി മാറിയ സൂര്യകാന്തി ഫെസ്റ്റിവൽ 20ന് വൈകുന്നേരം പത്മശ്രീ കലാമണ്ഡലം ക്ഷേമാവതി ആണ് ഉദ്ഘാടനം ചെയ്തത് . വയലാ രാജേന്ദ്രൻ,അനുപമ മോഹൻ , ഗീത പത്മകുമാർ എന്നിവർ പങ്കെടുത്തു
.ഡോ. മിനി പ്രമോദ് മേനോനും സംഘവും (കലന്ദിക സ്കൂള്‍ ഓഫ് ഡാന്‍സ്, കൊച്ചി) അവതരിപ്പിച്ച 'വന്ദേവിനായകം' മോഹിനിയാട്ട സംഘാവതരണം, സുരേന്ദ്രനാഥ്- ബിജിനാ സുരേന്ദ്രനാഥ് (നൃത്ത്യരാവലി കള്‍ച്ചറല്‍ അക്കാദമി, ഹൈദരാബാദ്) ദമ്പതികളുടെ കൂച്ചിപ്പുഡി രംഗാവതരണം തുടങ്ങിയവ പ്രേക്ഷകരുടെ മനം കവർന്ന പ്രകടനങ്ങൾ ആയിരുന്നു .
വരും ദിവസങ്ങളിൽ മഞ്ജു വി നായരും സംഘവും അവതരിപ്പിക്കുന്ന പ്രമേയാധിഷ്ഠിത ഭരതനാട്യ സംഘാവിഷ്ക്കാരം 'ഭൗമി', ഡോ. സ്വാതിനാരായണന്‍റെ കൂച്ചിപ്പുഡി, സൂര്യകാന്തിയിലെ മുതിര്‍ന്ന വിദ്യാര്‍ത്ഥികളുടെ ഭരതനാട്യ-മോഹിനിയാട്ട അവതരണങ്ങള്‍, പത്മശ്രീ കലാമണ്ഡലം ഗോപി, പ്രൊഫ. ജോര്‍ജ്ജ് എസ് പോള്‍ എന്നിവര്‍ക്ക് സൂര്യകാന്തി പുരസ്ക്കാര സമര്‍പ്പണം, സാംസ്കാരിക സമ്മേളനം എന്നിവയൊക്കെയാണ് സൂര്യകാന്തി ഫെസ്റ്റിവലിന്‍റെ ഭാഗമായി അരങ്ങിലെത്തുന്നത്.
ഈ വർഷത്തെ സൂര്യകാന്തി പുരസ്ക്കാരം ലഭ്യമായ കലാമണ്ഡലം ഗോപിയാശാൻ ജോര്‍ജ്ജ് എസ് പോൾ എന്നിവരെ
ഫെസ്റ്റിവലിൽ വച്ച് ആദരിക്കും.
22ന് വൈകുന്നേരം 5.00 മണിക്ക് നടക്കുന്ന സാംസ്കാരിക സമ്മേളനത്തിൽ . ഡോ. എന്‍.ആര്‍. ഗ്രാമപ്രകാശ് അധ്യക്ഷനാകും. ചടങ്ങില്‍ പത്മശ്രീ കലാമണ്ഡലം ക്ഷേമാവതി, പത്മശ്രീ കലാമണ്ഡലം ഗോപി,
പ്രൊഫ. ജോര്‍ജ്ജ് എസ് പോള്‍, കൂച്ചിപ്പുഡി - യക്ഷഗാന ആചാര്യന്‍ ശ്രീ പസുമാര്‍ത്തി രത്തയ്യ ശര്‍മ്മ, വി. കലാധരന്‍,
എം.ജെ.ശ്രീചിത്രന്‍ തുടങ്ങിയവർ പങ്കെടുക്കും..
സൂര്യകാന്തിയില്‍ പരിശീലനം പൂര്‍ത്തിയാക്കിയ ഏഴു ഭരതനാട്യം നര്‍ത്തകിമാരുടെ രംഗപ്രവേശം കൂടി ഫെസ്റ്റിവലിനോടനുബന്ധിച്ച് നടക്കും. . കലാക്ഷേത്ര രാഖി സതീഷിന്‍റെ കീഴില്‍ അഭ്യസനം പൂര്‍ത്തിയാക്കിയ ദുര്‍ഗ്ഗപ്രിയ എ.എസ്., അഞ്ജലി നിര്‍മ്മല്‍ പി, അപര്‍ണ്ണ മനേഷ്, നിഹാര ബാബു, അല്‍ക്ക രാജേഷ്, വരദ
നന്ദകിഷോര്‍, ആന്‍വില കരോള്‍ ബിജു എന്നിവരാണ് 22ന് വൈകീട്ട് 6.30ന് രംഗപ്രവേശനം നടത്തുന്നത്.