അരൂര്‍: ക്ഷേത്രത്തില്‍ നിന്ന് സ്വര്‍ണ്ണാഭരണം മോഷ്ടിച്ച കള്ളന്‍ പിടിയില്‍. ആലപ്പുഴയിലെ അരൂരിലുള്ള ശ്രീകുമാരവിലാസം ക്ഷേത്രത്തിലാണ് മോഷണം നടത്തിയത്. ക്ഷേത്രത്തിലെ ശ്രീകോവിലിന്റെ പൂട്ട് തകര്‍ത്ത് മോഷണം നടത്തിയ അമ്പലപ്പുഴ സ്വദേശി രാജേഷാണ് പിടിയിലായത്. ഇയാളെ വെള്ളിയാഴ്ച വൈകീട്ടോടെ അമ്പലപ്പുഴയില്‍ നിന്നാണ് അരൂര്‍ പോലീസ് കസ്റ്റഡിയിലെടുത്തത്. ക്ഷേത്രത്തിലെ പ്രതിഷ്ഠയായ സുബ്രഹ്മണ്യസ്വാമിക്ക് ചാര്‍ത്തുന്ന പത്ത് പവനോളം വരുന്ന സ്വര്‍ണാഭരണങ്ങളാണ് മോഷ്ടിച്ചത്. മോഷണത്തിന് മുമ്പ് ക്ഷേത്രത്തില്‍ പ്രാര്‍ഥിക്കുന്ന ഇയാളുടെ സിസിടിവി ദൃശ്യങ്ങള്‍ പുറത്തുവന്നിരുന്നു. ക്ഷേത്രത്തില്‍ തൊട്ടുവണങ്ങി പ്രാര്‍ഥിച്ച ശേഷമാണ് കള്ളന്‍ മോഷണകൃത്യം നടത്തിയത്. മുഖം മൂടി ധരിച്ച നിലയില്‍ ആയിരുന്നു കള്ളന്‍. ഇത് സിസിടിവി ദൃശ്യങ്ങളില്‍ വ്യക്തമായി കാണാം. വെള്ളിയാഴ്ച പുലര്‍ച്ചെ 12.55 നാണ് മോഷണം നടത്തിയത്. ക്ഷേത്രത്തിന്റെ നാലമ്പലത്തിനുള്ളില്‍ ഒരു മണിക്കൂറോളം ചെലവിട്ടതിനു ശേഷമാണ് മോഷ്ടാവ് മോഷണം നടത്തിയത്. കാവിമുണ്ടും നീല ഷര്‍ട്ടും ധരിച്ചെത്തിയ മോഷ്ടാവ് മുഖംമൂടിയും ധരിച്ചിരുന്നു. അഞ്ചരപ്പവന്‍ തൂക്കം വരുന്ന കിരീടം, മൂന്നു പവന്റെ നെക്ലേസ്, ഒന്നരപ്പവന്റെ കുണ്ഡലം എന്നിവയാണ് നഷ്ടമായതെന്ന് ദേവസ്വം പ്രസിഡന്റ് എം വി സുരേന്ദ്രന്‍ പറഞ്ഞിരുന്നു. സാധാരണ ദീപാരാധന സമയത്ത് ചാര്‍ത്തുന്ന ഇവ അത്താഴ പൂജയോടെ അഴിച്ച് ശ്രീകോവിലിനുള്ളിലെ പലകയില്‍ വെക്കാറാണ് പതിവ്. ക്ഷേത്രവളപ്പിലെ ശാന്തിമഠത്തില്‍ താമസിക്കുന്ന കഴകക്കാരനും മാല കെട്ടുകാരനുമാണ് മോഷണം ആദ്യം അറിഞ്ഞത്. ഇവര്‍ പുലര്‍ച്ചെ എഴുന്നേറ്റപ്പോള്‍ തെക്കുഭാഗത്തെ നാലമ്പല വലാതില്‍ തുറന്നുകിടക്കുന്നത് ശ്രദ്ധയില്‍പ്പെടുകയായിരുന്നു. ഉടന്‍ തന്നെ ദേവസ്വം ഭാരവാഹികളെ വിവരം അറിയിച്ചു. ഇവര്‍ എത്തിയപ്പോഴാണ് ശ്രീകോവിലിന്റെ താഴ് തകര്‍ത്ത് സ്വര്‍ണ ഉരുപ്പടികള്‍ മോഷ്ടിച്ചതായി മനസ്സിലായത്.