കോതമംഗലം: സകല നിയമങ്ങളും കാറ്റില്‍ പറത്തി കൊണ്ട് കല്യാണ യാത്രയുമായി കെഎസ്ആര്‍ടിസി ബസ്. കോതമംഗലം നെല്ലിക്കുഴിയില്‍ നിന്നും അടിമാലിയിലേക്ക് പുറപ്പെട്ട കെഎസ്ആര്‍ടിസി ബസാണ് ഹരിത ശോഭയില്‍ അലങ്കരിച്ചത്. ദിലീപ് നായകനായെത്തിയ ഈ പറക്കും തളിക എന്ന സിനിമയിലെ 'താമരാക്ഷന്‍ പിള്ള' എന്ന ബസിനെ അനുകരിച്ചാണ് കെഎസ്ആര്‍ടിസി ബസ് നിരത്തിലിറക്കിയത്. സിനിമയില്‍ ചിത്രീകരിച്ചിരിക്കുന്ന പോലെ തന്നെ ഇലകൊണ്ടും വലിയ മരക്കൊമ്പുകള്‍ കൊണ്ടും തെങ്ങിന്റെ ഓലകൊണ്ടുമെല്ലാം അലങ്കരിച്ച രീതിയിലാണ് ബസ്. ബസിന് താമരാക്ഷന്‍ പിള്ള എന്ന പേരും നല്‍കിയിട്ടുണ്ട്. ചിത്രത്തില്‍ കല്യാണ ചടങ്ങിനായാണ് ബസിനെ അലങ്കരിച്ചതെങ്കില്‍ ഇവിടെയും സമാന സാഹചര്യത്തിനാണ് കെഎസ്ആര്‍ടിസി ബസിനെ താമരാക്ഷന്‍ പിള്ളയായി മാറ്റിയിരിക്കുന്നത്. അര്‍ജന്റീനയുടെയും ബ്രസീലിന്റെയും ആരാധകരുടെ കൊടികള്‍ വീശിയുള്ള ആഘോഷ തിമിര്‍പ്പിലാണ് കല്യാണ യാത്ര. കോതമംഗലം നെല്ലിക്കുഴിയില്‍ നിന്നും അടിമാലിക്ക് കല്യാണ ഓട്ടം പോകുന്ന ബസിന്റെ വീഡിയോ ആണിത്. നിയമ ലംഘനം നടത്തുന്ന ടൂറിസ്റ്റ് ബസ്സുകള്‍ക്കെതിരെ നടപടി സ്വീകരിക്കുമ്പോഴാണ് സര്‍ക്കാരിന്റെ ഒരു വാഹനം ഇത്തരത്തിലുള്ള എല്ലാ നിയമങ്ങളും ലംഘിച്ചുകൊണ്ട് ഓടുന്നത്.