ചെറുപുഴയില്‍ സ്വകാര്യബസില്‍ യുവതിക്കെതിരെ നഗ്നതാ പ്രദര്‍ശനം നടത്തിയെന്ന സംഭവത്തില്‍ യാത്രക്കാരനെ തിരിച്ചറിഞ്ഞതായി പൊലീസ്. പ്രതി ചിറ്റാരിക്കല്‍ പൊലീസ് സ്റ്റേഷന്‍ പരിധിയിലെ ബിനു നിരപ്പേലാണ്(45) പ്രതിയെന്ന് പൊലീസ് പറഞ്ഞു. ഇയാള്‍ക്കെതിരെ ചെറുപുഴ പൊലീസ് കേസെടുത്തു.
സംഭവത്തെ കുറിച്ച് പൊലീസ് പറയുന്നത്: ടിപ്പര്‍ ലോറി ഡ്രൈവറാണ് ബിനു. രണ്ടു കുട്ടികളുടെ അച്ഛനാണ്. ഞായറാഴ്ച ഉച്ചയ്ക്ക് ചെറുപുഴ സ്റ്റാന്‍ഡില്‍ നിന്നും തളിപ്പറമ്പിലേക്ക് പോകാനായി നിര്‍ത്തിയിട്ടിരുന്ന ബസില്‍ നിന്നാണ് ഇയാള്‍ യുവതിക്ക് നേരെ നഗ്നതാപ്രദര്‍ശനവും സ്വയംഭോഗവും നടത്തിയത്. എതിര്‍വശത്തെ സീറ്റിലിരിക്കുകയായിരുന്ന യുവതിക്ക് നേരെയാണ് ഇയാള്‍ പരാക്രമം കാണിച്ചത്. ചെറുപുഴ – തളിപ്പറമ്പ് റൂടിലോടുന്ന ബസിലെ ജീവനക്കാര്‍ ഈ സമയത്ത് ബസിലുണ്ടായിരുന്നില്ല. ഉച്ചഭക്ഷണത്തിനായി പുറത്തേക്ക് പോയതിനാല്‍ യുവതിയും ബിനുവും മാത്രമേ ബസിലുണ്ടായിരുന്നുളളൂ.
മടിയില്‍ പത്രം വെച്ചുകൊണ്ടാണ് ഇയാള്‍ ഇരുന്നത്. യുവതി മൊബൈല്‍ ഫോണില്‍ ദൃശ്യങ്ങള്‍ പകര്‍ത്തിയപ്പോഴും കൂസലില്ലാതെ ഇയാള്‍ നഗ്നതാ പ്രദര്‍ശനം തുടരുകയായിരുന്നു. തുടര്‍ന്ന് യുവതി സമൂഹ മാധ്യമത്തില്‍ ദൃശ്യങ്ങള്‍ പോസ്റ്റു ചെയ്തപ്പോഴാണ് വിവരം പുറത്തറിയുന്നത്. പൊലീസ് യുവതിയുടെ മൊഴിയെടുത്തു. മൊഴിയുടെ അടിസ്ഥാനത്തില്‍ കേസെടുത്ത ചെറുപുഴ പൊലീസ് അന്വേഷണം ഊര്‍ജിതമാക്കുകയായിരുന്നു.