.jpeg)
ഇരിട്ടി: കണ്ണൂര്‍ ഇരിട്ടി തന്തോട് ചോംകുന്ന് പഴശി ശിവക്ഷേത്രത്തിന് സമീപം ഗണേശ വിഗ്രഹം കണ്ടെത്തി. തന്തോട് ചോംകുന്ന് ശിവക്ഷേത്രത്തിന് സമീപം ബലിതര്‍പ്പണം നടക്കുന്ന പഴശ്ശി ജലാശയത്തിലാണ് ഗണേശ വിഗ്രഹം കണ്ടെത്തിയത്. ലോഹ നിര്‍മ്മിതമായ വിഗ്രഹം മൂന്നടിയിലേറെ പൊക്കമുണ്ട്. ക്ഷേത്രത്തില്‍ എത്തിയ കമ്മിറ്റി അംഗങ്ങളാണ് വെള്ളത്തില്‍ വിഗ്രഹം കണ്ടെത്തുന്നത്.
മുക്കാല്‍ ഭാഗത്തോളം വെള്ളത്തില്‍ മുങ്ങിക്കിടന്ന വിഗ്രഹത്തിന്റെ കഴുത്തിനു മുകളിലുള്ള ഭാഗവും പ്രഭാവലയവും മാത്രമാണ് പുറത്തു കാണാനായത്. സംഭവം കേട്ടറിഞ്ഞ് നിരവധി പേരാണ് വെള്ളത്തില്‍നിന്നും ഉയര്‍ന്നു വന്ന വിഗ്രഹം കാണാനെത്തിയത്. ഗണേശോത്സവവുമായി ബന്ധപ്പെട്ട് എത്തിയ കമ്മറ്റിക്കാരാണ് ഇറിഗേഷന്‍ പ്രദേശമായ ഇവിടെ വിഗ്രഹം പൊങ്ങി വന്നതായി കാണുന്നത്.ക്ഷേത്രത്തിനു മുന്‍വശത്തായി ബലിതര്‍പ്പണം നടത്തുന്ന സ്ഥലത്താണ് വിഗ്രഹം കണ്ടെത്തിയത്. ഇത് പഞ്ചലോഹ നിര്‍മ്മിതമാണോ അല്ലെങ്കില്‍ മറ്റുവല്ല ലോഹവുമാണോ എന്ന് തിരിച്ചറിയേണ്ടതുണ്ട്. ഇത് എവിടെനിന്ന് എങ്ങിനെ ഇവിടെ എത്തിയെന്ന അന്വേഷണവും നടന്നു വരികയാണ്. നാട്ടുകാരുടെ സഹായത്തോടെ പുഴയില്‍ നിന്നും വിഗ്രഹം കരയിലെത്തിച്ചു. ഇരിട്ടി പ്രിന്‍സിപ്പല്‍ എസ്‌ഐയുടെ നേതൃത്വത്തില്‍ എത്തിയ പോലിസ് വിഗ്രഹം സ്റ്റേഷനിലേക്ക് മാറ്റിയിട്ടുണ്ട്. സ്റ്റേഷന്‍ പരിധിയില്‍ വിഗ്രഹങ്ങള്‍ മോഷണം പോയതുമായി ബന്ധപ്പെട്ട കേസുകളും പരിശോധിക്കുന്നുണ്ട്.