.webp)
പത്തനംതിട്ട: അധികം വിവാദങ്ങൾ സൃഷ്ടിക്കാതെ പത്തനംതിട്ട ജില്ലയിൽ രണ്ടു വർഷത്തിലധികം ഉത്തരവാദിത്തം നിറവേറ്റി കളക്ടർ ഡോ. ദിവ്യ എസ് അയ്യർ പടിയിറങ്ങുന്നു. 2021 ജൂലൈ 12ന് കൊവിഡ് മഹാമാരിയുടെ മൂർധന്യാവസ്ഥയിൽ ജില്ലയിൽ ചുമതല ഏറ്റെടുക്കുമ്പോൾ ഡോക്ടർ കൂടിയായ കളക്ടർക്ക് ഉത്തരവാദിത്തം ഏറെയായിരുന്നു. വൈകാതെ തന്നെ സർക്കാർ പരിപാടികൾ വിജയിപ്പിക്കുന്നതിൽ സജീവമായി ദിവ്യ എസ് അയ്യർ.
സർക്കാർ പരിപാടികൾക്കൊപ്പം സാമൂഹ്യ സാംസ്കാരിക ആധ്യാത്മിക രംഗത്തെയും സജീവ സാന്നിധ്യമായി കളക്ടർ മാറി. ജില്ലാ ഭരണത്തിനൊപ്പം നിരവധി പൊതു ചടങ്ങുകളുടെയും ഭാഗമായി അവർ മാറി. നർത്തകിയും പാട്ടുകാരിയും എഴുത്തുകാരിയും ഒക്കെയായ അവർ ഭരണത്തിനൊപ്പം ഇതിനെല്ലാം സമയം കണ്ടെത്തി. ശബരിമല ഉൾപ്പെടുന്ന പത്തനംതിട്ട ജില്ലയിൽ കൊവിഡ് കാലത്തടക്കം തീർഥാടനം സുഗമമാക്കി.പമ്പയിൽ ക്യാമ്പ് ചെയ്തും ശബരിമല പാതകളിലും എത്തി തീർഥാടനം സുഗമമാക്കിയ ദിവ്യ എസ് അയ്യർ തങ്ക അങ്കി ഘോഷയാത്ര പമ്പ ഗണപതി കോവിലിൽ എത്തിയപ്പോൾ നിർത്താതെ ശരണ മന്ത്രം ചൊല്ലി ഭക്തർക്കൊപ്പം ചേർന്നത് വലിയ പ്രചാരം നേടിയിരുന്നു. അടൂരിൽ നടന്ന ചടങ്ങിൽ സ്വന്തം മകനുമായി എത്തിയത് തുടക്കത്തിൽ വിവാദമായെങ്കിലും കൂടുതൽ പേർ പിന്തുണയുമായി എത്തുകയും ഇതിനു അനുകൂലമായി സർക്കാർ നിലപാട് സ്വീകരിക്കുകയും ചെയ്തു.കോന്നി താലൂക്ക് ഓഫീസിലെ ജീവനക്കാർ അവധിയില്ലാതെ ടൂർ പോയ സംഭവത്തിലും വലിയ നടപടികളിലേക്ക് കടക്കാതെ പ്രശ്നം തീർക്കുകയായിരുന്നു. ഇടയ്ക്കിടെ ഉണ്ടാകുന്ന വെള്ളപ്പൊക്കം നേരിടാൻ ദുരന്തനിവാരണ വിഭാഗത്തോടൊപ്പം സജീവമായി. ഭരണത്തിനൊപ്പം ജില്ലയിലെ കലാ സാംസ്കാരിക മേഖലകളിൽ സജീവമായതും നേട്ടങ്ങളുടെ പട്ടികയിലാണ്. കഥകളി അവതരിപ്പിച്ചതും എംജി യൂണിവേഴ്സിറ്റി കലോത്സവത്തിൽ കുട്ടികൾക്കൊപ്പം നൃത്തം ചെയ്തതും സാമൂഹ്യമാധ്യമങ്ങൾ ഏറ്റെടുത്തിരുന്നു.പൊതു പരിപാടികളിൽ പ്രത്യേകിച്ച് സ്കൂളുകളിൽ പങ്കെടുക്കുകയും വിദ്യാർഥികളെ പ്രോത്സാഹിപ്പിക്കുകയും ചെയ്തിരുന്ന ദിവ്യ എസ് അയ്യർ മാരാമൺ, ചെറുകോൽപ്പുഴ, ആറന്മുള, പരുമല തുടങ്ങി ആധ്യാത്മിക ചടങ്ങുകൾക്ക് തടസം ഉണ്ടാകാതെയുള്ള നടപടികളും സ്വീകരിച്ചിരുന്നു. ജില്ലയിൽ സേവനം അനുഷ്ഠിച്ച മേധാവികളിൽ മോശമല്ലാത്ത പ്രകടനത്തോടെയാണ് മറ്റൊരു പടവ് കയറാനായി പത്തനംതിട്ട കളക്ടറേറ്റിന്റെ പടികൾ ഡോ. ദിവ്യ എസ് അയ്യർ ഇറങ്ങുന്നത്. വിഴിഞ്ഞം തുറമുഖ മാനേജിങ് ഡയറക്ടറാകാനാണ് പുതിയ നിയോഗം. കോൺഗ്രസ് നേതാവും മുൻ എംഎൽഎയുമായ കെഎസ് ശബരീനാഥന്റെ ഭാര്യയാണ് ദിവ്യ എസ് അയ്യർ.