കോന്നി ആനക്കൂട്ടിൽ 3 ഡി തീയേറ്റർ; 35 പേർക്ക് ഒരേസമയം ചിത്രങ്ങൾ കാണാം; ചെലവ് 31 ലക്ഷത്തിലധികം രൂപ

 

പത്തനംതിട്ട: ആനക്കൂട്ടിലും 3 ഡി തീയേറ്റർ വരുന്നു. മലയോര വനമേഖല വിനോദസഞ്ചാരം ഇഷ്ടപ്പെടുന്നവർ ഏറെ എത്തുന്ന കോന്നി എലിഫന്‍റ് വില്ലേജിലാണ് സന്ദർശകർക്കായി ആധുനിക 3 ഡി സംവിധാനങ്ങൾ ഉൾപ്പെടുത്തിയ തീയേറ്റർ. കോന്നി ആനക്കൂട്ടിൽ എത്തിച്ചേരുന്ന സന്ദർശകർക്ക് പുതിയ 3 ഡി തീയേറ്റർ നവ്യാനുഭവം ആയിരിക്കും. ആനക്കൂട്ടിൽ സ്ഥാപിച്ച 3 ഡി തീയേറ്റർ ഡിസംബർ ഒന്നിന് പൊതുജനങ്ങൾക്ക് തുറന്നുകൊടുക്കും.കോന്നി ആനക്കൂട്ടിലെത്തിച്ചേരുന്ന സന്ദർശകർക്ക് 20 മിനിറ്റ് ദൈർഘ്യമുള്ള 3 ഡി വീഡിയോയിൽ കോന്നി ഇക്കോ ടൂറിസത്തെ സംബന്ധിച്ചുള്ള അറിവുകൾ നൽകുകയും 15 മിനിറ്റ് വിനോദോപാധിയായുമുള്ള ഹ്രസ്വ ചിത്രമാണ് പ്രദർശിപ്പിക്കുന്നത്. 31 ലക്ഷത്തിലധികം രൂപ ചെലവഴിച്ചാണ് പൂർണമായും ശീതികരിച്ച 3 ഡി തീയേറ്റർ നിർമിച്ചത്. 3 ഡി തീയേറ്ററിൽ 35 പേർക്ക് ഒരേസമയം ചിത്രങ്ങൾ കാണാം. എറണാകുളം ആസ്ഥാനമായുള്ള സ്വാകാര്യ സ്ഥാപനമാണ് 3 ഡി തീയേറ്റർ നിർമ്മാണപ്രവർത്തി ഏറ്റെടുത്തത്.അഡ്വ. കെയു ജനീഷ് കുമാർ എംഎൽഎ ഉദ്ഘാടനം ചെയ്യുന്ന ചടങ്ങിൽ ജില്ലാ കലക്ടർ എ ഷിബു ഐഎ എസ്, വനം വകുപ്പ് ചീഫ് ഫോറസ്റ്റ് കണ്‍സർവേറ്റർ കമലാഹർ ഐഎഫ്എസ്, കോന്നി ഡിഎഫ്ഒ അയൂഷ്‌ കുമാർ കോറി ഐഎഫ്എസ്, റാന്നി ഡിഎഫ്ഒ ജയകുമാർ ശർമ്മ ഐഎഫ്എസ് തുടങ്ങിയവർ പങ്കെടുക്കും.

ഫോറസ്റ്റ് റെയിഞ്ച് ഓഫീസിന് സമീപത്തായാണ് ഇതിനായി പുതിയ കെട്ടിടം നിർമിച്ചിട്ടുണ്ട്. ആന മ്യൂസിയത്തിന് പുറമെ തീയേറ്റർ കൂടി ആയതോടെ ആനത്താവളം കൂടുതൽ പേരെ ആകർഷിക്കും.ഇപ്പോൾ എല്ലാ ദിവസവും ഇക്കോ ടൂറിസം കേന്ദ്രം പ്രവർത്തിക്കുന്നുണ്ട്. കെഎസ്ആർടിസി ബജറ്റ് ടൂറിസം പദ്ധതിയിൽ ആനത്താവളവും ഉൾപ്പെടുത്തിയതോടെ സന്ദർശകരുടെ തിരക്ക് അവധി ദിവസങ്ങളിൽ കൂടുതലാണ്. അടവിയിലേക്ക് എത്തുന്ന സഞ്ചാരികളിൽ അധികവും ആനക്കുട്ടിലും എത്താറുണ്ട്. പുതിയ സംവിധാനം കൂടി വരുന്നതോടെ സന്ദർശകർ ഇനിയും വർധിക്കും.