മനാമ: പലസ്തീനിലെ ഇസ്രായേല്‍ കൂട്ടുക്കുരുതിയില്‍ പ്രതിഷേധിച്ച് ഗള്‍ഫ് നാടുകളില്‍ പാശ്ചാത്യ ഉത്പന്ന ബഹിഷ്‌കരണം വ്യാപിക്കുന്നു. സമൂഹ മാധ്യമങ്ങളില്‍ പ്രചാരണം ശക്തമായതോടെ അറിയപ്പെടുന്ന പാശ്ചാത്യ ബ്രാന്‍ഡുകളുടെ ഉത്പന്നങ്ങള്‍ ജനങ്ങള്‍ ഒഴിവാക്കുന്നതായി ബഹ്‌റൈനില്‍നിന്ന് എഎഫ്പി റിപ്പോര്‍ട്ട് ചെയ്തു.കുവൈറ്റ് സിറ്റിയില്‍ 'ഇന്ന് നിങ്ങള്‍ ഒരു പലസ്തീനിയെ കൊന്നുവോ?' എന്നെഴുതിയ ബില്‍ബോഡര്‍ഡ് പ്രത്യക്ഷപ്പെട്ടു. പരാതിയെ തുടര്‍ന്ന് മുനിസിപ്പാലിറ്റി അധികൃതര്‍ ഇത് നീക്കംചെയ്തു. ഇസ്രായേലിനെ പിന്തുണയ്ക്കുന്ന അന്താരാഷ്ട്ര ഫ്രാഞ്ചൈസികളെ ബഹിഷ്‌കരിക്കാന്‍ ജനങ്ങളെ പ്രോത്സാഹിപ്പിക്കുകയാണ് ഉത്പന്ന ബഹിഷ്‌കരണ കാമ്പയിന്റെ ലക്ഷ്യം. നിരോധിത ഉത്പന്നങ്ങള്‍ തിരിച്ചറിയുന്നതിന് വെബ്‌സൈറ്റുകളും സ്മാര്‍ട്ട്‌ഫോണ്‍ ആപ്പുകളും പുറത്തിറങ്ങി.പലസ്തീനിലെ ഇസ്രായേല്‍ അതിക്രമങ്ങളെ പിന്തുണയ്ക്കുന്നു എന്ന് ആരോപിച്ചാണ് അമേരിക്കന്‍ ഉത്പന്നങ്ങള്‍ ബഹിഷ്‌കരിക്കുന്നത്. ടിക്‌ടോകിലൂടെയും മറ്റ് സമൂഹ മാധ്യമങ്ങളിലും ഇത് സംബന്ധിച്ച പ്രചാരണം നടന്നു. യമന്‍ ഉള്‍പ്പെടെയുള്ള അറബ് രാജ്യങ്ങളിലും ജനങ്ങള്‍ ഈ സമരമുറ സ്വീകരിക്കാന്‍ ആഹ്വാനം ചെയ്യുന്നു. യമനിലെ തെരുവുകളില്‍ ബാനര്‍ പ്രചാരണത്തിന്റെ ചിത്രങ്ങള്‍ മാധ്യമങ്ങള്‍ പുറത്തുവിട്ടു.