തിരുവനന്തപുരം: മഴയ്ക്കുള്ള ഒരു സാധ്യതയുമില്ലാത്ത സാഹചര്യം തുടരുന്നതിനാൽ കേരളത്തിൽ ഉയർന്ന താപനില തുടരും. വരും ദിവസങ്ങളിൽ ചൂട് കനക്കുമെന്ന സൂചനയാണ് അധികൃതർ നൽകുന്നത്. ശക്തമായ ചൂട് തുടരുന്ന സാഹചര്യത്തിൽ വിവിധ ജില്ലകളിൽ കേന്ദ്ര കാലാവസ്ഥ വകുപ്പ് യെല്ലോ അലേർട്ട് പ്രഖ്യാപിച്ചു.
കോട്ടയം, തൃശൂർ ജില്ലകളിൽ ഉയർന്ന താപനില 37 ഡിഗ്രിസ് സെൽഷ്യസ് വരെയും ആലപ്പുഴ, എറണാകുളം, കോഴിക്കോട്, കണ്ണൂർ ജില്ലകളിൽ ഉയർന്ന താപനില 36 ഡിഗ്രി സെൽഷ്യസ് വരെയും (സാധാരണയെക്കാൾ 2 - 4 ഡിഗ്രി സെൽഷ്യസ് കൂടുതൽ) താപനില ഉയരാൻ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
സംസ്ഥാനത്തെ എല്ലാ ജില്ലകളിലും ചൂട് ഉയർന്ന തോതിൽ തുടരുകയാണ്. കഴിഞ്ഞ ദിവസങ്ങളിലും വിവിധ ജില്ലകളിൽ യെല്ലോ അലേർട്ട് പ്രഖ്യാപിച്ചിരുന്നു. രാത്രി സമയത്ത് പോലും താപനില ഉയർന്ന തോതിലാണ്. രാവിലെ എട്ടുമണിയോടെ ചൂട് വർധിക്കുന്ന സാഹചര്യമാണ് സംസ്ഥാനത്ത് നിലവിലുള്ളത്. വൈകിട്ട് അഞ്ചുമണിയോടെ വെയിലിൻ്റെ ശക്തി കുറയുമെങ്കിലും ഉയർന്ന താപനില തുടരുകയാണ്. മലയോര പ്രദേശങ്ങളിലടക്കം ചൂടിന് യാതൊരു കുറവും സംഭവിച്ചിട്ടില്ലെന്നാണ് റിപ്പോർട്ടുകൾ.
സംസ്ഥാനത്ത് ഉയർന്ന ചൂട് റിപ്പോർട്ട് ചെയ്യപ്പെടുന്ന സാഹചര്യത്തിൽ സംസ്ഥാന ദുരന്ത നിവാരണ അതോറിറ്റി പുറപ്പെടുവിക്കുന്ന ജാഗ്രതാ നിർദേശങ്ങൾ പൊതുജനങ്ങൾ പിന്തുടരണം. ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി നിരവധി ഗുരുതരമായ ആരോഗ്യപ്രശ്നങ്ങൾക്ക് കാരണമാകും. അതുകൊണ്ട് പൊതുജനങ്ങൾ താഴെ പറയുന്ന നിർദേശങ്ങൾ പാലിക്കേണ്ടതാണ്.