ദോഹ: ഇതോടെ വിമാനത്തിൽ ഇന്റർനെറ്റ്
സംവിധാനം ഒരുക്കുന്ന മിഡ്ലീസ്റ്റ്‌, വടക്കേ ആഫ്രിക്കൻ മേഖലയിലെ ആദ്യ വിമാനകമ്പനിയാവുകായാണ്‌ ഖത്തർ എയർവെയ്സ്.
ഇനി ഉറ്റവരോട് സംസാരിക്കാനും അവരുമായി ചാറ്റ് ചെയ്യാനും വിമാനം ഇറങ്ങുന്നതു വരെ കാത്തുനില്‍ക്കേണ്ടിവരില്ല. വിമാനം പറന്നുകൊണ്ടിരിക്കെ തന്നെ ഇന്റര്‍നെറ്റിലൂടെ യാത്രക്കാര്‍ക്ക് പുറംലോകവുമായി ബന്ധപ്പെടാന്‍ അവസരമൊരുക്കുകയാണ് ഖത്തറിന്റെ ദേശീയ വിമാനക്കമ്പനിയായ ഖത്തര്‍ എയര്‍വെയ്‌സ്.
തങ്ങളുടെ വിമാനങ്ങളില്‍ ഹൈസ്പീഡ് ഇന്റര്‍നെറ്റ് സൗകര്യം ലഭ്യമാക്കുന്നതിന് സ്റ്റാര്‍ ലിങ്കുമായി കരാറില്‍ ഒപ്പുവച്ചിരിക്കുകയാണ് ലോകത്തെ ഏറ്റവും മികച്ച വിമാനക്കമ്പനി. ഈ വര്‍ഷം അവസാനത്തോടെ തങ്ങളുടെ മൂന്ന് ബോയിംഗ് 777-300 വിമാനങ്ങളില്‍ ഹൈ-സ്പീഡ്, ലോ-ലേറ്റന്‍സി വൈ-ഫൈ ലഭ്യമാക്കുമെന്ന് ഖത്തര്‍ എയര്‍വെയ്‌സ് സിഇഒ എഞ്ചിനീയര്‍ ബദര്‍ മുഹമ്മദ് അല്‍ മീര്‍ അറിയിച്ചു.
സെക്കന്‍ഡില്‍ 500 മെഗാബിറ്റ് വരെ അള്‍ട്രാ ഹൈസ്പീഡ് വൈഫൈ കണക്റ്റിവിറ്റിയാണ് ഖത്തര്‍ എയര്‍വെയ്‌സ് വാഗ്ദാനം ചെയ്യുന്നത്. അതിവേഗം വീഡിയോകള്‍ കാണാനും ഓണ്‍ലൈന്‍ ഗെയിമിംഗിനും മികച്ച വെബ് ബ്രൗസിംഗിനും ഇത് സൗകര്യമൊരുക്കും. അടുത്ത രണ്ട് വര്‍ഷത്തിനുള്ളില്‍ തങ്ങളുടെ മുഴുവന്‍ ആധുനിക വിമാനങ്ങളിലും സ്പേസ് എക്സ്-പവര്‍ സാങ്കേതികവിദ്യ ഉപയോഗിച്ചുള്ള വൈഫൈ സേവനം ക്രമേണ വ്യാപിപ്പിക്കാനാണ് ഖത്തര്‍ എയര്‍വെയ്‌സ് പദ്ധതിയിടുന്നത്.
ജര്‍മനിയിലെ ഹാംബര്‍ഗില്‍ നടന്ന എയര്‍ക്രാഫ്റ്റ് ഇന്റീരിയര്‍ എക്സ്പോയിലാണ് ഖത്തര്‍ എയര്‍വേഴ്സും സ്റ്റാര്‍ലിങ്കും ഇക്കാര്യത്തില്‍ ധാരണയിലെത്തിയത്. ഖത്തര്‍ എയര്‍വേഴ്സ് സിഇഒ എഞ്ചിനീയര്‍ ബദര്‍ മുഹമ്മദ് അല്‍ മീറും സ്റ്റാര്‍ ലിങ്ക് വൈസ് പ്രസിഡന്റ് മൈക്ക് നിക്കോള്‍സുമാണ് ധാരണാപത്രത്തില്‍ ഒപ്പുവെച്ചത്. ഉപഗ്രഹങ്ങള്‍ വഴി ഇന്റര്‍നെറ്റ് സേവനം ലഭ്യമാക്കുന്ന സ്ഥാപനമാണ് എലോണ്‍ മസ്‌ക്കിന്റെ സ്റ്റാര്‍ലിങ്ക്