തിരുവൈരാണിക്കുളം: നടതുറപ്പ് ഉത്സവത്തോടനുബന്ധിച്ച് തിരുവൈരാണിക്കുളം ശ്രീപാർവ്വതിദേവിയുടെ നടയിൽ ചുമർചിത്രം സമർപ്പിച്ച് അങ്കമാലി വേങ്ങൂർ സ്വദേശി രവിശങ്കർ മേനോൻ. കേരളീയ ചുവർച്ചിത്ര രചനാ സംമ്പ്രദായത്തിൽ രചിച്ച പാർവതി സ്വയംവരം(ഗിരിജ കല്യാണം) ആലേഖനം ചെയ്ത ചിത്രമാണ് ദേവിയുടെ തിരുനടയിൽ സമർപ്പിച്ചത്.
കഴിഞ്ഞ വർഷത്തെ നട തുറപ്പുത്സവത്തിനെത്തിയപ്പോൾ അഭീഷ്ട കാര്യസാധ്യത്തിനായി നടയിൽ നിന്ന് പ്രാർഥിക്കുകയും ഒരു വർഷത്തിനുള്ളിൽ അത് സാധ്യമാവുകയും ചെയ്തു. ദേവിയുടെ അനുഗ്രഹഫലം ലഭിച്ചതിനാൽ മനസ്സിൽ നിനച്ച വഴിപാട് നടത്തുകയായിരുന്നെന്ന് അദ്ദേഹം രവിശങ്കർ മേനോൻപറഞ്ഞു.
അങ്കമാലി സ്വദേശികളായ സുജാത അനിൽകുമാർ, അഭിലാഷ് അരവിന്ദ് എന്നിവർ ചേർന്നാണ് ചിത്രം രചിച്ചത്.
ക്ഷേത്രം മേൽശാന്തിയായ നടുവം നാരായണൻ നമ്പൂതിരിപ്പാട് ചിത്രം അനാച്ഛാദനം നടത്തി. ക്ഷേത്ര ട്രസ്റ്റ് പ്രസിഡന്‍റ് പി. യു. രാധാകൃഷ്ണൻ, സെക്രട്ടറി എ. എൻ. മോഹനൻ, മാനേജർ എം. കെ. കലാധരൻ, ട്രസ്റ്റ് ഭാരവാഹികൾ എന്നിവരും പങ്കെടുത്തു. മൂന്നു വർഷം മുൻപ് ക്ഷേത്രത്തിന്‍റെ ബലിക്കൽപുരയിൽ ക്ഷേത്ര പ്രതിഷ്ഠയുമായും ശിവ കുടുംബവുമായും ബന്ധപ്പെട്ട ചുമർചിത്രം സ്ഥാപിച്ചിരുന്നു.