ഹരിത പരിപാലനത്തിൽ പുലർത്തുന്ന മികവ് പരിഗണിച്ച് പാമ്പാടി കെ.ജി. കോളേജിനെ ഹരിത ക്യാമ്പസ് പുരസ്കാരം ലഭിച്ചു. ഹരിത കേരള മിഷനും പാമ്പാടി ഗ്രാമപഞ്ചായത്തും ഒത്ത് ചേർന്നാണ് പുരസ്കാരം പ്രഖ്യാപിച്ചത്. മാലിന്യ സംസ്കരണം, ജൈവവൈവിധ്യം, കൃഷി, ഊർജ്ജ സംരക്ഷണം, ജലസുരക്ഷ, ഹരിത പെരുമാറ്റം എന്നിവ വിലയിരുത്തിയാണ് എ പ്ലസ് ഗ്രേഡ് കോളേജിന് ലഭിച്ചത്.
ട്രോപ്പിക്കൽ ഇൻസ്റ്റിറ്റ്യൂട്ട് ഓഫ് ഇക്കോളജിക്കൽ സയൻസിൻ്റെ നേതൃത്വത്തിൽ കഴിഞ്ഞ വർഷം കെ.ജി. കോളജ് ഗ്രീൻ ഓഡിറ്റ് പൂർത്തീകരിച്ചതിനെ തുടർന്ന് ഐ.എസ്.ഒ. അംഗീകൃത ഗ്രീൻ ഓഡിറ്റ് പൂർത്തീകരിച്ച കേരളത്തിലെ ആദ്യത്തെ ക്യാമ്പസ് എന്ന നേട്ടം കൈവരിച്ചിരുന്നു.
പാമ്പാടി ഗ്രാമപഞ്ചായത്ത്‌ പ്രസിഡന്റ്‌ ശ്രീമതി. ഡാലി റോയിയുടെ അധൃക്ഷതയിൽ ചേർന്ന യോഗം കോട്ടയം ജില്ലാ പഞ്ചായത്ത് വികസനകാര്യ സ്റ്റാൻ്റിങ് കമ്മറ്റി ചെയർപേഴ്സൺ ശ്രീമതി മഞ്ജു സുജിത്ത് ഉദ്ഘാടനം നിർവ്വഹിച്ചു.
ബ്ലോക്ക് പഞ്ചായത്ത് സ്റ്റാൻ്റിങ് കമ്മറ്റി ചെയർപേഴ്സൺ സി.എം. മാത്യൂ കോളജ് പ്രിൻസിപ്പാൾ പ്രൊഫ. (ഡോ.) റെന്നി പി. വർഗ്ഗീസിന് പുരസ്കാരം കൈമാറി.