കൊച്ചി: കോതമംഗലത്ത് വീടിൻ്റെ ശുചിമുറിയിൽ നിന്ന് കൂറ്റൻ രാജവെമ്പാലയെ പിടികൂടി. പുന്നേക്കാട് കൊണ്ടിമറ്റം സ്വദേശിയുടെ വീട്ടിലെ ശുചിമുറിയിൽ നിന്നാണ് രാജവെമ്പാലയെ വനപാലകർ പിടികൂടിയത്. ഇന്നലെ വൈകിട്ടാണ് വീട്ടുകാർ ശുചിമുറിയിൽ പാമ്പിനെ കണ്ടത്.
പാമ്പിന്റെ ശീൽക്കാര ശബ്ദ‌ം കേട്ടതോടെയാണ് വീട്ടുകാരുടെ ശ്രദ്ധയിൽപ്പെട്ടത്. കുളിമുറിയിൽ കൂറ്റൻ പാമ്പിനെ കണ്ടതോടെ ഉടൻ തന്നെ പുന്നേക്കാട് വനം വകുപ്പ് ഓഫീസിൽ വിവരം അറിയിക്കുകയായിരുന്നു. തുടർന്ന് പാമ്പുപിടിത്ത വിദഗ്‌ധനുമായി എത്തിയ വനപാലക സംഘം ഏറെ നേരത്തെ ശ്രമത്തിനുശേഷം സുരക്ഷിതമായി പാമ്പിനെ പിടികൂടുകയായിരുന്നു.
പിടികൂടിയ പാമ്പിന് പതിനഞ്ച് അടിയിലേറെ നീളമുണ്ട്. പുന്നേക്കാട് വനമേഖലയുടെ സമീപത്താണ് ഈ വീട്. ചൂട് കാലമായതിനാൽ തണുപ്പ് തേടിയാവാം പാമ്പ് എത്തിയതെന്നാണ് നിഗമനം. പിടികൂടിയ പാമ്പിനെ വനം വകുപ്പ് ഉദ്യോഗസ്ഥർ കാട്ടിൽ തുറന്നു വിട്ടു.