ബിജെപിയുടെ ഫിക്‌സ്ഡ് ഡെപ്പോസിറ്റായി കോണ്‍ഗ്രസ് മാറിയെന്ന് മുഖ്യമന്ത്രി പിണറായി വിജയന്‍. 35 സീറ്റു കിട്ടിയാല്‍ കേരളത്തില്‍ ഭരണം പിടിക്കാമെന്ന ബിജെപിയുടെ അവകാശ വാദത്തിനു പിന്നില്‍ കോണ്‍ഗ്രസിലുള്ള ഈ വിശ്വാസമാണെന്നും മുഖ്യമന്ത്രി പറഞ്ഞു.
‘ ബിജെപിയുടെ ഒരു നേതാവ് പറയുകയാണ് ഞങ്ങള്‍ക്ക് മുപ്പത്തിഅഞ്ചോ നാല്‍പ്പതോ സീറ്റുകള്‍ കിട്ടിയാല്‍ മതി, ബാക്കി ഞങ്ങള്‍ ഉണ്ടാക്കിക്കോളുമെന്ന്. 71 സീറ്റു വേണ്ട സ്ഥാനത്ത് 35 സീറ്റു വന്നാല്‍ എങ്ങനെ ഭരിക്കും? അതാണ് കോണ്‍ഗ്രസിലുള്ള വിശ്വാസം. തങ്ങളുടെ ഫിക്‌സഡ് ഡെപ്പോസിറ്റ് കോണ്‍ഗ്രസിലുണ്ടെന്നാണ് അവരുടെ വിശ്വാസം. ഈ ഫിക്‌സഡ് ഡെപ്പോസിറ്റിനെ അയക്കണോ എന്ന് യുഡിഎഫിനെ പിന്താങ്ങുന്ന ജനങ്ങള്‍ തന്നെ ചിന്തിച്ചുകൊണ്ടിരിക്കുകയാണ്. തങ്ങള്‍ വഞ്ചിതരായിക്കൂടാ എന്ന് അവര്‍ ആഗ്രഹിക്കുകയാണ്,’ മുഖ്യമന്ത്രി പിണറായി വിജയന്‍് പറഞ്ഞു.
35 സീറ്റ് കിട്ടിയാല്‍ കേരളത്തില്‍ ബിജെപി സര്‍ക്കാര്‍ ഉണ്ടാക്കാമെന്ന് ഇന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ ആവര്‍ത്തിച്ചിരുന്നു. പിണറായി വിജയന്‍ മത്സരിക്കുന്ന ധര്‍മ്മടത്തും. ഉമ്മന്‍ചാണ്ടി മത്സരിക്കാനിടയുള്ള പുതുപ്പള്ളിയിലും ചെന്നിത്തലയുടെ മണ്ഡലമായ ഹരിപ്പാടും ശക്തരായ സ്ഥാനാര്‍ത്ഥികളെ നിര്‍ത്തുമെന്നും കെ സുരേന്ദ്രന്‍ ഇന്ന് പറഞ്ഞിരുന്നു.