ന്യൂഡൽഹി: ഗുജറാത്തിലെ മോർബി ജില്ലയിൽ ഫാക്ടറിയുടെ മതിൽ ഇടിഞ്ഞു വീണുണ്ടായ അപകടത്തിൽ 12 തൊഴിലാളികൾ കൊല്ലപ്പെട്ടു. ഗുജറാത്ത് ഇൻഡസ്ട്രിയിൽ ഡെവലപ്പ്മെന്റ് കോർപ്പറേഷന്റെ (ജിഐഡിസി) ഉപ്പ് ഫാക്ടറിയിലാണ് അപകടം നടന്നത്.
"ഫൽവാദ് ജിഐഡിസിയിലെ സാഗർ ഉപ്പ് ഫാക്ടറിയിൽ ഉണ്ടായ അപകടത്തിൽ 12 പേർ മരിച്ചു. മരണപ്പെട്ടവരുടെ കുടുംബങ്ങൾക്കൊപ്പം നിലകൊള്ളുന്നു." മന്ത്രി ബ്രിജേഷ് മിർസ പറഞ്ഞു. രക്ഷാ പ്രവർത്തനം പുരോഗമിക്കുകയാണ്.
സംഭവത്തിൽ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. "മോർബിയിൽ മതിൽ ഇടിഞ്ഞു വീണുണ്ടായ അപകടം ഹൃദയഭേദകമാണ്. വിഷമം നിറഞ്ഞ ഈ മണിക്കൂറിൽ ദുഃഖിതരായ കുടുംബാംഗങ്ങളെ ഓർക്കുന്നു. പരിക്കേറ്റവർക്ക് ഉടൻ സുഖംപ്രാപിക്കാൻ കഴിയട്ടെ. പ്രാദേശിക ഭരണകർത്താക്കൾ ദുരിതബാധിതർക്ക് എല്ലാ സഹായവും നൽകുന്നുണ്ട്." പ്രധാനമന്ത്രി ട്വീറ്റ് ചെയ്തു.
"അപകടത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് പിഎംഎൻആർഎഫിൽ നിന്നും രണ്ട് ലക്ഷം വീതം അനുവദിക്കും. പരിക്കേറ്റവർക്ക് 50,000 സഹായ ധനം നൽകും." പ്രധാനമന്ത്രിയുടെ ഓഫീസ് ട്വീറ്റ് വ്യക്തമാക്കി.