ന്യൂഡല്‍ഹി: ഹെൽമെറ്റിന്‍റെ സ്ട്രാപ്പ് ശരിയായ വിധം ധരിക്കാത്ത ഇരുചക്ര വാഹന യാത്രക്കാര്‍ക്ക് 2000 രൂപ വരെ പിഴ. ബിഐഎസ് അല്ലെങ്കില്‍ ഐഎസ്‌ഐ മാര്‍ക്ക് ഇല്ലാത്ത ഹെല്‍മറ്റ് ധരിച്ചാലും പിഴ ചുമത്തും. മോട്ടോര്‍ വാഹന നിയമത്തിലാണ് പുതിയ ഭേദഗതി.
ഹെല്‍മെറ്റിന്‍റെ സ്ട്രാപ്പ് കെട്ടാതെ യാത്ര ചെയ്യുന്നവരുടെ എണ്ണം വര്‍ദ്ധിച്ചുവരുന്നതും ഇതുമൂലം അപകടങ്ങള്‍ വര്‍ദ്ധിക്കുന്നതും കണക്കിലെടുത്താണു നടപടി. മോട്ടോര്‍ വാഹനനിയമത്തിലെ 194 ഡി വകുപ്പ് അനുസരിച്ചാകും പിഴ ഈടാക്കുക. നിയമം അനുസരിച്ച് മൂന്ന് മാസം വരെ ലൈസന്‍സ് സസ്‌പെന്‍ഡ് ചെയ്ത് വെയ്ക്കാനും വ്യവസ്ഥ ഉണ്ട്. 2021 ജൂണ്‍ ഒന്നു മുതലാണ് അംഗീകാരമില്ലാത്ത ഹെല്‍മറ്റുകള്‍ ധരിക്കുന്നത് നിരോധിച്ചത്.