അബുദാബി: അക്ഷര്‍ധാം ക്ഷേത്ര മാതൃകയില്‍ അബുദാബിയില്‍ നിര്‍മ്മിക്കുന്ന ആദ്യ ഹൈന്ദവ ക്ഷേത്രത്തിന്റെ നിര്‍മാണം 2024 ഫെബ്രുവരിയോടെ പൂര്‍ത്തിയാക്കി വിശ്വാസികള്‍ക്കായി തുറന്നുകൊടുക്കാനാവുമെന്ന് കരുതുന്നതായി യുഎഇയിലെ ഇന്ത്യന്‍ അംബാസഡര്‍ സഞ്ജയ് സുധീര്‍. ക്ഷേത്രത്തിന്റെ രണ്ടാം നിലയുടെ നിര്‍മാണത്തിന് തുടക്കും കുറിക്കുന്നതിന്റെ ഭാഗമായി നടന്ന മഹാപാഡ് പൂജന്‍ വിധി ചടങ്ങില്‍ പങ്കെടുത്ത ശേഷം സംസാരിക്കുകയായിരുന്നു അദ്ദേഹം. കോവിഡ് പ്രതിസന്ധി നിര്‍മാണത്തിന്റെ വേഗത കുറച്ചെങ്കിലും 2024ഓടെ തന്നെ നിര്‍മാണം പൂര്‍ത്തിയാക്കാനാവുമെന്നാണ് കരുതുന്നതെന്നും അദ്ദേഹം അറിയിച്ചു. ഈ ക്ഷേത്രം സ്‌നേഹത്തിന്റെ ജനങ്ങളുടെ പരസ്പര സഹകരണത്തിന്റെയും പ്രതീകമാണെന്ന് ചടങ്ങില്‍ അദ്ദേഹം അഭിപ്രായപ്പെട്ടു. വ്യത്യസ്ത സമുദായങ്ങള്‍ ഉള്‍പ്പെട്ട മതമൈത്രിയുടെ കഥയാണ് ഈ ക്ഷേത്രത്തിന്റേത്. ഇതിന്റെ കല്‍ ചുവരുകളില്‍ ശില്‍പ്പികള്‍ കൊത്തിവച്ചിരിക്കുന്ന ചിത്രങ്ങള്‍ ഇവിടെയെത്തുന്ന മുഴുവന്‍ സന്ദര്‍ശകര്‍ക്കും പ്രചോദനമാവും. രാജ്യത്ത് മതമൈത്രിയും സമാധാനവും ശക്തിപ്പെടുത്തുന്ന കാര്യത്തില്‍ യുഎഇ ഭരണകൂടം കാണിക്കുന്ന ആത്മാര്‍ഥതയുടെയും താല്‍പര്യത്തിന്റെയും ഉത്തര ഉദാഹരണമാണ് ഈ ക്ഷേത്രമെന്നും അദ്ദേഹം പറഞ്ഞു. ബാപ്‌സ് ഹിന്ദു ക്ഷേത്രത്തിന്റെ തലവന്‍ ബ്രഹ്മവിഹാരിദാസ് സ്വാമികള്‍, ക്ഷേത്ര നിര്‍മാണത്തിന് മേല്‍നോട്ടം വഹിക്കുന്ന അക്ഷയ മുനിദാസ് സ്വാമികള്‍ എന്നിവരുടെ കാര്‍മികത്വത്തില്‍ നടന്ന ചടങ്ങില്‍ നൂറു കണക്കിന് വിശ്വാസികള്‍ പങ്കെടുത്തു. ഇന്നലെ നടന്ന ചടങ്ങ് ചരിത്രപരമായി പ്രധാനപ്പെട്ടതാണെന്ന് സ്വാമികള്‍ പറഞ്ഞു. യോഗിജി മഹാരാജിന്റെ 130ാം ജന്‍മദിനമായിരുന്നു മെയ് 27. ഈ ദിനത്തില്‍ തന്നെ ചടങ്ങ് നടത്താനായതില്‍ സന്തോഷമുണ്ടെന്നും അദ്ദേഹം പറഞ്ഞു. ക്ഷേത്രത്തിന്റെ ഗര്‍ഭഗൃഹം ഉള്‍പ്പെടെയുള്ള പ്രധാന ഭാഗങ്ങള്‍ രണ്ടാം നിലയിലാണ് സ്ഥാപിക്കുന്നത്. 10 സന്യാസിമാരുടെ നേതൃത്വത്തില്‍ 3000 വാസ്തുശില്‍പികള്‍ ചേര്‍ന്നാണ് ക്ഷേത്രം നിര്‍മിക്കുന്നതെന്നും അദ്ദേഹം പറഞ്ഞു. ക്ഷേത്ര നിര്‍മാണത്തിന്റെ ഭാഗമായുള്ള ശിലകള്‍ പാകാന്‍ ഓരോ ഞായറാഴ്ചകളിലും ആയിരക്കണക്കിന് വിശ്വാസികളാണ് ഇവിടെ എത്തുന്നത്. ജനങ്ങളുടെ സ്‌നേഹത്തിന്റെയും ആവേശത്തിന്റെയും പ്രതിഫലനമാണ് അതെന്നും അദ്ദേഹം കൂട്ടിച്ചേര്‍ത്തു. യുഎഇയുടെ പുതിയ പ്രസിഡന്റ് ശെയ്ഖ് മുഹമ്മദ് ബിന്‍ സായിദ് അല്‍ നഹ്യാനാണ് അദ്ദേഹം അബൂദാബി കിരീടാവകാശി ആയിരിക്കെ ക്ഷേത്രനിര്‍മ്മാണത്തിനുള്ള സ്ഥലം അനുവദിച്ചത്. അബൂദാബി-ദുബായ് അതിര്‍ത്തിയില്‍ അബൂ മുറൈഖയില്‍ ഹൈവേയോട് ചേര്‍ന്ന് കിടക്കുന്ന 10.9 ഹെക്ടര്‍ സ്ഥലത്ത് നിര്‍മിക്കുന്ന ക്ഷേത്രത്തിന് ഏഴ് കൂറ്റന്‍ ഗോപുരങ്ങളുണ്ടാവും. യുഎഇയിലെ ഏഴ് എമിറേറ്റുകളുടെ പ്രതീകമായാണിത്. ക്ഷേത്രനിര്‍മ്മാണത്തിനുള്ള ശിലകള്‍ ഇന്ത്യയില്‍ നിന്നാണെത്തിച്ചിരിക്കുന്നത്. 2019 ഏപ്രില്‍ മാസത്തില്‍ തറക്കല്ലിട്ട ക്ഷേത്രത്തിന്റെ നിര്‍മാണം ഡിസംബറിലായിരുന്നു ആരംഭിച്ചത്. ഹൈന്ദവ പുരാണങ്ങള്‍, കഥകള്‍ എന്നിവയില്‍ നിന്നുള്ള സംഭവങ്ങള്‍ ആവിഷ്‌കരിക്കുന്ന ചിത്രങ്ങള്‍ കൊത്തിവെച്ച കല്ലുകളാല്‍ അലംകൃതമാണ് ക്ഷേത്രത്തിന്റെ മുന്‍വശം. പരമ്പരാഗത ഡിസൈനില്‍ ഇന്ത്യയില്‍ തയ്യറാക്കിയ, കൊത്തുപണിയില്‍ തീര്‍ത്ത തൂണുകളാല്‍ നിര്‍മിക്കുന്ന ക്ഷേത്രം ഒരു നിര്‍മാണ വിസ്മയമായി മാറുമെന്നാണ് വിലയിരുത്തപ്പെടുന്നത്. ലൈബ്രറി, ക്ലാസ്റൂം, ആളുകള്‍ക്ക് ഒത്തുചേരാനുള്ള മജ്ലിസ്, കമ്മ്യൂണിറ്റി സെന്റര്‍, തുടങ്ങിയവയും നിര്‍മാണം പുരോഗമിക്കുന്ന ക്ഷേത്രത്തിന്റെ ഭാഗമായി ഒരുക്കിയിട്ടുണ്ട്. ക്ഷേത്രപ്പടികളിലെ ഇരുവശങ്ങളിലൂടെ ഒഴുകിയിറങ്ങുന്ന ജലധാരയും ക്ഷേത്രസമുച്ചയത്തെ ചുറ്റിയൊഴുകുന്ന അരുവിയും മനോഹരമായ കാഴ്ചകളാണ് സന്ദര്‍ശകര്‍ക്ക് സമ്മാനിക്കുക. ചുരുങ്ങിയത് 1000 വര്‍ഷത്തേക്ക് ക്ഷേത്രം സുരക്ഷിതമായി നിലനില്‍ക്കുമെന്നാണ് അധികൃതരുടെ കണക്കുകൂട്ടല്‍.