യുകെ : യുകെയില്‍ ഉള്ള മണര്‍കാട് നിവാസികള്‍ ഈമാസം 27, 28, 29 തീയതികളില്‍ ഡിവൈസസില്‍ ഒത്തുചേരുന്നു. ഇത് ആറാം തവണയാണ് സംഗമം നടക്കുന്നത്. കോവിഡിന്റെ ഇടവേളയ്ക്ക് ശേഷം നടക്കുന്ന പ്രഥമ സംഗമത്തിനായി എവരും കാത്തിരിക്കുന്നു. നാലുമണി കാറ്റിന്റെ കുളിരും, പെരുന്നാളിലെ പാച്ചോറിന്റെ രുചിയും പത്താമുദയ ഘോഷയാത്രയുടെ വര്‍ണകാഴ്ചകളും അയവിറക്കാന്‍ മണര്‍കാട് പ്രദേശത്തുനിന്നും യുകെയില്‍ കുടിയേറിയ എല്ലാവരേയും ക്ഷണിക്കുന്നു. നാടിന്റെ വിവിധ ഭാഗത്തുനിന്നും എത്തിച്ചേരുന്ന വ്യക്തികളും കുടുംബങ്ങളുമായി സൗഹൃദം പങ്കിടാനും ബന്ധങ്ങള്‍ ഊട്ടി വളര്‍ത്താനും കുട്ടികളുടെ കഴിവുകള്‍ കണ്ടെത്താനും പ്രോത്സാഹിപ്പിക്കാനും ഉള്ള വേദി കൂടിയാണ് സംഗമം. മെയ് അവസാനത്തെ വീക്കെന്‍ഡില്‍ വിപുലമായ കലാ-കായിക പരിപാടികളോട് കൂടെ ഈ വര്‍ഷത്തെ സംഗമം നടത്തപ്പെടുന്നു.