ലണ്ടൻ: കൈത്തണ്ടയിൽ ഒട്ടിച്ചേർന്നിരിക്കുന്ന ലിംഗവുമായി ജീവിക്കുന്നത് നിങ്ങൾക്ക് സങ്കൽപിക്കാനാകുമോ? നീണ്ട കൈയ്യുള്ള ഷര്ട്ട് ധരിച്ചും വസ്ത്രം കുറച്ചൊന്നു മാറിയാൽ കൈത്തണ്ടയിലെ ലിംഗം പുറത്തു കണ്ടാലോ എന്നു ഭയന്നുമുള്ള ജീവിതം. എന്നാൽ മാൽക്കോം മക്ഡോണൾഡ് എന്ന 47കാരന് ജീവിതത്തിൽ ആറു വര്ഷമാണ് ഈ അനുഭവം നേരിടേണ്ടി വന്നത്. ഗുരുതരമായ ഒരു രക്താണുബാധ ഉണ്ടായതോടെയാണ് മാൽക്കോമിന് അപൂര്വമായ ദുരവസ്ഥ നേരിടേണ്ടി വന്നത്. അണുബാധയെത്തുടര്ന്ന് യഥാര്ഥ ലിംഗം നഷ്ടപ്പെട്ടതോടെ ചികിത്സയുടെ ഭാഗമായി കൃത്രിമമായി നിര്മിച്ച ജനനേന്ദ്രിയം താത്കാലികമായി ഇദ്ദേഹത്തിൻ്റെ കൈത്തണ്ടയിൽ തുന്നിച്ചേര്ക്കുകയായിരുന്നു. ഒടുവിൽ കൃത്രിമലിംഗം വീണ്ടും തുടയിടുക്കിൽ തുന്നിച്ചേര്ത്തതോടെ വീണ്ടും താനൊരു പുരുഷനായി മാറി എന്നായിരുന്നു മാൽക്കോമിൻ്റെ പ്രതികരണം. അപൂര്വമായ ശസ്ത്രക്രിയയുടെ വിവരങ്ങളും യുവാവിൻ്റെ അനുഭവകഥയും ഉള്പ്പെടുന്ന പുതിയ ഡോക്യുമെൻ്ററിയിലാണ് മാൽക്കോം ഇക്കാര്യങ്ങള് വെളിപ്പെടുത്തുന്നത്. രണ്ട് കുട്ടികളുടെ പിതാവ് കൂടിയാണ് ഇദ്ദേഹം. ഇംഗ്ലണ്ടിലെ നോര്ഫ്ലോക്ക് സ്വദേശിയാണ് മാൽക്കോം. മെക്കാനിക്ക് ആയി ജോലി ചെയ്യുന്ന മാൽക്കോമിൻ്റെ ജീവിതത്തിൽ 2010ലാണ് ഞെട്ടിക്കുന്ന സംഭവമുണ്ടായത്. പെട്ടെന്നൊരു ദിവസം തന്റെ ലിംഗം മുറിഞ്ഞു തറയിൽ വീഴുകയായിരുന്നു എന്നാണ് മാൽക്കോം പറയുന്നത്. ഒരു അണുബാധയെത്തുടര്ന്നായിരുന്നു ഇത്. തുടര്ന്ന് പ്ലാസ്റ്റിക് സര്ജറിയിലൂടെ ഒരു ലിംഗമുണ്ടാക്കിയ ഡോക്ടര്മാര് ഇത് മാൽക്കോമിൻ്റെ ഇടതുകൈത്തണ്ടയിൽ ഘടിപ്പിക്കുകയായിരുന്നു. കൃത്രിമലിംഗം മാൽക്കോമിൻ്റെ തുടയിടുക്കിൽ ഘടിപ്പിക്കാനായിരുന്നു ശ്രമമെങ്കിലും പെട്ടെന്ന് രക്തത്തിലെ ഓക്സിജൻ്റെ അളവ് കുറഞ്ഞതോടെ ഡോക്ടര്മാര് ഈ ശ്രമം ഉപേക്ഷിക്കുകയായിരുന്നു. ഇതോടെയാണ് ലിംഗം മാൽക്കോമിൻ്റെ കൈത്തണ്ടയിൽ ഘടിപ്പിക്കേണ്ടി വന്നത്.തുടര്ന്ന് ശസ്ത്രക്രിയ പലവട്ടം മാറ്റി വെക്കേണ്ടി വരികയും ആശുപത്രികളിൽ ആവശ്യത്തിന് ജീവനക്കാരില്ലാതെ വരികയും ചെയ്തതോടെ പുതിയ ലിംഗം മാൽക്കോമിൻ്റെ കൈത്തണ്ടയിൽ തന്നെ തുടര്ന്നു. ഇടയ്ക്ക് കൊവിഡ് മഹാമാരി കൂടി വന്നതോടെ ഈ കാലാവധി ആറു വര്ഷം നീണ്ടു. കൈത്തണ്ടയിൽ ലിംഗവുമായി ജീവിക്കുന്ന മാൽക്കോമിൻ്റെ കഥ മുൻപും മാധ്യമങ്ങളിൽ ഇടം പിടിച്ചിട്ടുണ്ടെങ്കിലും ഒടുവിൽ ലിംഗം തുടയിടുക്കിൽ ഘടിപ്പിക്കാനായെന്നതാണ് പുതിയ വാര്ത്ത.പലപ്പോഴും ആളുകള് തന്റെ കൈയ്യിലെ ലിംഗം കണ്ട് പരിഹസിച്ചിട്ടുണ്ടെങ്കിലും എന്നാൽ താൻ ഇതൊരു തമാശയായാണ് എടുത്തിട്ടുള്ളതെന്നും മാൽക്കോം പറയുന്നു. അതല്ലാതെ മറ്റൊരു വഴിയില്ലായിരുന്നു എന്നാണ് ഇദ്ദേഹം പറയുന്നത്. ഒടുവിൽ ഈ വര്ഷം ആദ്യം ശസ്ത്രക്രിയ നടത്തിയ ഡോക്ടര്മാര് ലിംഗം യഥാര്ഥ സ്ഥാനത്ത് തുന്നിച്ചേര്ക്കുകയായിരുന്നു. ഒൻപതു മണിക്കൂറോളം ശസ്ത്രക്രിയ നീണ്ടു. കൈത്തണ്ടയിൽ നിന്നെടുത്ത രക്തക്കുഴലുകള് ഉപയോഗിച്ചാണ് തുടയിടുക്കിൽ നിന്ന് പുതുതായി ഘടിപ്പിച്ച കൃത്രിമലിംഗത്തിലേയ്ക്ക് രക്തം എത്തിക്കുന്നത്. യൂറോളജിസ്റ്റുകളും പ്ലാസ്റ്റിക് സര്ജറി വിദഗ്ധരും ചേര്ന്നാണ് ലിംഗം തയ്യാറാക്കിയത്. മൂത്രനാളിയും കൃത്രിമായി നിര്മിച്ചിട്ടുണ്ട്. ഇതോടൊപ്പം ഒരു ഹാൻഡ് പമ്പ് ഉപയോഗിച്ച് ലിംഗം ഉദ്ധരിക്കാനുള്ള മാര്ഗവും ഡോക്ടര്മാര് ഒരുക്കിയിട്ടുണ്ട്. ആറു വര്ഷത്തിനു ശേഷം വീണ്ടും ലൈംഗികബന്ധത്തിൽ ഏര്പ്പെടാനാകുന്നതിൻ്റെ ആവേശത്തിലാണ് വിവാഹമോചിതനായ മാൽക്കം.