ദുബായ്: പ്രായപൂര്‍ത്തിയാകാത്ത പെണ്‍കുട്ടിയെ വേശ്യാവൃത്തിക്ക് നിര്‍ബന്ധിച്ച നാല് സ്ത്രീകള്‍ക്ക് ദുബായില്‍ ജയില്‍ശിക്ഷ. കിഴക്കന്‍ യൂറോപ്യന്‍ സ്വദേശിനികള്‍ക്കാണ് ശിക്ഷ വിധിച്ചത്. രണ്ടുപേര്‍ക്ക് മൂന്ന് വര്‍ഷത്തെ തടവുശിക്ഷയും മറ്റ് രണ്ടുപേര്‍ക്ക് ആറുമാസം തടവുശിക്ഷയുമാണ് ദുബായ് ക്രിമനല്‍ കോടതി വിധിച്ചത്. ജയില്‍ശിക്ഷയ്ക്ക് ശേഷം പ്രതികളെ നാടുകടത്തും. അല്‍ ഹുദൈബയിലെ ഒരു ഹോട്ടല്‍മുറിയില്‍ നിന്നാണ് ക്രിമിനല്‍ ഇന്‍വെസ്റ്റിഗേഷന്‍ വിഭാഗം പ്രതികളെ പിടികൂടിയതെന്ന് പോലീസ് അറിയിച്ചു. പ്രായപൂര്‍ത്തിയാകാത്ത പെണ്‍കുട്ടിയെ ഇവര്‍ 2021 നവംബറില്‍ ലൈംഗികമായി ചൂഷണം ചെയ്തിരുന്നു. 'സാമൂഹിക മാധ്യമത്തിലൂടെയാണ് പ്രതികളിലൊരാളായ സ്ത്രീയെ താന്‍ പരിചയപ്പെടുന്നതെന്ന്' ഇരയായ പെണ്‍കുട്ടി പറഞ്ഞു. 'താന്‍ നാട്ടിലായിരുന്നപ്പോഴാണ് ഈ സ്ത്രീയെ പരിചയപ്പെട്ടത്. പിന്നീട് ഇവര്‍ വിമാന ടിക്കറ്റും വിസയും അയച്ചു നല്‍കി. യുഎഇയിലെ ഒരു മാളിലെ തുണിക്കടയില്‍ സെയില്‍സ് വുമണായി ജോലി നല്‍കാമെന്ന് വാഗ്ദാനം നല്‍കിയാണ് തന്നെ യുഎഇയിലേക്ക് വിളിച്ചുവരുത്തിയത്. എന്നാല്‍, യുഎഇയില്‍ എത്തിയപ്പോള്‍ ഒരു അപ്പാര്‍ട്ട്‌മെന്റില്‍ പൂട്ടിയിട്ട് വേശ്യാവൃത്തിയ്ക്ക് നിര്‍ബന്ധിച്ചതായി' പെണ്‍കുട്ടി പറഞ്ഞു. അപ്പാര്‍ട്‌മെന്റില്‍ നിന്ന് രക്ഷപെടാന്‍ പെണ്‍കുട്ടി ശ്രമിച്ചെങ്കിലും സാധിച്ചില്ല. മോചിപ്പിക്കണമെങ്കില്‍ പണം നല്‍കണമെന്ന് പ്രതിയായ സ്ത്രീകള്‍ ആവശ്യപ്പെട്ടു. പിന്നീട് ഡേറ്റിങ് ആപ്പ് വഴി പരിചയപ്പെട്ട മറ്റൊരു സ്ത്രീയാണ് മോചനദ്രവ്യം നല്‍കിയതെന്നും അങ്ങനെ സംഘത്തിന്റെ പിടിയില്‍ നിന്നും രക്ഷപ്പെടുകയായിരുന്നെന്നും പെണ്‍കുട്ടി വ്യക്തമാക്കി.