ടോക്കിയോ: ചൈനയ്ക്കെതിരെ മുന്നറിയിപ്പുമായി അമേരിക്കൻ പ്രസിഡന്റ് ജോ ബൈഡൻ. ചൈന തായ്വാനെ ആക്രമിച്ചാൽ പ്രതിരോധിക്കുന്നതിന് സൈന്യത്തെ ഇറക്കുമെന്ന് യുഎസ് പ്രസിഡന്റ് ജോ ബൈഡൻ. ടോക്കിയോയിൽ ക്വാഡ് ഉച്ചകോടിയിൽ പങ്കെടുക്കാനെത്തിയപ്പോഴാണ് അമേരിക്കൻ പ്രസിഡന്റിന്റെ ആരോപണം. യുക്രൈനിൽ റഷ്യ നടത്തുന്ന അധിനിവേശത്തിന്റെ പശ്ചാത്തലത്തിൽ തായ്വാന്റെ പരമാധികാരം സംരക്ഷിക്കാനുള്ള ബാധ്യത ഏറിയതായും അദ്ദേഹം പറഞ്ഞു. ജപ്പാൻ പ്രധാനമന്ത്രി ഫുമിയോ കിഷിദയ്ക്കൊപ്പം വാർത്താസമ്മേളനം നടത്തവേയായിരുന്നു ഇക്കാര്യം വ്യക്തമാക്കിയത്. തായ്വാന്റെ കാര്യത്തിൽ യുക്രൈനെ സഹായിക്കുന്നതിലും കൂടുതൽ മുന്നോട്ട് പോകുവാൻ തയ്യാറാണെന്നും ബൈഡൻ വ്യക്തമാക്കി. റഷ്യയുമായി യുദ്ധത്തിൽ ഏർപ്പെട്ടിരിക്കുന്ന യുക്രൈന് ദശലക്ഷക്കണക്കിന് ഡോളറിന്റെ ആയുദ്ധ ഇന്റലിജൻസ് അസിസ്റ്റൻസ് സഹായങ്ങളാണ് നൽകിയിരിക്കുന്നത്. എന്നാൽ, റഷ്യക്കെതിരെ സൈന്യത്തെ ഇറക്കാൻ യുഎസ് തയ്യാറായിരുന്നില്ല.“തായ്വാനെ പ്രതിരോധിക്കാൻ സൈനികമായി ഇടപെടാൻ നിങ്ങൾ തയ്യാറാണോ?” എന്ന റിപ്പോർട്ടറുടെ ചോദ്യത്തിന് അതെ എന്നായിരുന്നു ബൈഡന്റെ മറുപടി. അതാണ് ഞങ്ങളുടെ പ്രതിബന്ധത എന്നും അദ്ദേഹം പറഞ്ഞു.തായ്വാൻ വിഷയത്തിൽ ചൈനയുടെ കളി അപകടകരമാണ്. ചൈന തായ്വാനെ ബലമായി കൂട്ടിച്ചേർക്കാൻ ചൈന ശ്രമിക്കാതിരിക്കണമെങ്കിൽ ലോകം ശക്തമായി ചെറുക്കേണ്ടതുണ്ട്. യുക്രൈൻ അധിനിവേശത്തിന്റെ ഭവിഷ്യത്ത് റഷ്യൻ പ്രസിഡന്റ് വ്ലാഡിമർ പുട്ടിൻ അനുഭവിക്കുന്നത് ചൈനയ്ക്കുള്ള മുന്നറിയിപ്പാണെന്നും അദ്ദേഹം പറഞ്ഞു.യുഎസ് ഇതാദ്യമായാണ് ഔദ്യോഗിക നയതന്ത്ര സുരക്ഷാ കരാറുകൾ ഇല്ലാത്ത ഒരു രാജ്യമായ തായ്വാന് സൈനിക പിന്തുണ പ്രഖ്യാപിക്കുന്നത്. യുഎസിന്റെ പിന്തുണയ്ക്ക് നന്ദി അറിയിച്ച് തായ്വാനും രംഗത്തുവന്നിട്ടുണ്ട്. ബൈഡന്റെ പിന്തുണയ്ക്ക് നന്ദി പറഞ്ഞ് തായ്വാൻ വിദേശകാര്യ മന്ത്രാലയമാണ് രംഗത്തുവന്നിരിക്കുന്നത്. യുഎസുമായുള്ള സഹകരണം ശക്തമാക്കുമെന്നും കൂട്ടിച്ചേർത്തിട്ടുണ്ട്.