കൊല്‍ക്കത്ത: ബംഗാൾ ചലച്ചിത്ര രംഗത്തെ ഞെട്ടിച്ച് മറ്റൊരു നടിയെയും മരിച്ച നിലയിൽ കണ്ടെത്തി. നടിയും മോഡലുമായ മഞ്ജുഷ നിയോഗിയെയാണ് കൊൽക്കത്തയിലെ വീട്ടിൽ മരിച്ച നിലയിൽ കണ്ടെത്തിയത്. ആത്മത്യയാണെന്നാണ് പ്രാഥമിക നിഗമനം. മൂന്ന് ദിവസത്തിനിടെ ബംഗാൾ ചലച്ചിത്ര രംഗത്തുണ്ടായ രണ്ടാമത്തെ ആകസ്മിക വേർപാടാണ് മഞ്ജുഷയുടേത്.മഞ്ജുഷയുടെ അടുത്ത സുഹൃത്തും സഹപ്രവര്‍ത്തകയുമായിരുന്ന ബിദിഷ ഡി മജുംദാറിനെ കഴിഞ്ഞദിവസമായിരുന്നു മരിച്ച നിലയിൽ കണ്ടെത്തിയത്. ബിദിഷയുടെ മരണത്തെത്തുടർന്ന് മകള്‍ വിഷാദത്തിലായിരുന്നുവെന്ന് മഞ്ജുഷയുടെ അമ്മ പറഞ്ഞു. ബിദിഷയുടേതും ആത്മഹത്യ തന്നെയാണെന്നാണ് വിലയിരുത്തൽ. കൊല്‍ക്കത്തയിലെ പട്ടുലി പ്രദേശത്തെ വീട്ടിലാണ് മഞ്ജുഷ നിയോഗിയെ മരിച്ചനിലയില്‍ കണ്ടെത്തിയത്. ഇവരുടെ മൃതദേഹം പോസ്റ്റ്മോർട്ടത്തിന് അയച്ചതായി പോലീസ് അറിയിച്ചു. "ബിദിഷയെക്കുറിച്ച് അവൾ നിരന്തരം സംസാരിക്കാറുണ്ടായിരുന്നു. മാധ്യമങ്ങൾ വൈകാതെ തന്നെ ബിദിഷയുടേതുപോലെ നമ്മുടെ വീട്ടിലേക്കും ശ്രദ്ധ കേന്ദ്രീകരിക്കുമെന്ന് അവൾ പറഞ്ഞപ്പോൾ ഞാൻ അവളെ ശകാരിച്ചിരുന്നെന്നും" മഞ്ജുഷയുടെ അമ്മ പറഞ്ഞു. ബംഗാളി മോഡലും നടിയുമായ ബിദിഷ ഡി മജുംദാറിനെ കഴിഞ്ഞദിവസമാണ് മരിച്ച നിലയിൽ കണ്ടെത്തിയത്. കൊൽക്കത്തയിലെ ഡം ഡമിലെ അപ്പാർട്ട്മെന്‍റിലാണ്. 21 കാരിയായ നടി കഴിഞ്ഞ നാല് മാസമായി അവിടെ വാടകയ്ക്ക് താമസിച്ചു വരികയായിരുന്നു. മേയ് 25 ബുധനാഴ്ച വൈകുന്നേരമാണ് നാഗർബസാർ ഏരിയയിലെ ഫ്ലാറ്റിൽ നിന്ന് പോലീസ് മൃതദേഹം കണ്ടെടുത്തത്. സംഭവത്തിൽ അന്വേഷണം പുരോഗമിക്കുന്നതിനിടെയാണ് മഞ്ജുഷയുടെ മരണം.